ملک اچ دیرپا سیاسی استحکام، آئینی عملداری اتے جمہوری تسلسل ای قومی ترقی دی بنیاد اے، یوسف رضا گیلانی

ملتان۔ 24 نومبر (اے پی پی) قائم مقام صدر پاکستان تے چیئرمین سینیٹ سید یوسف رضا گیلانی آکھیا جو ملک اچ دیرپا سیاسی استحکام، آئینی عملداری اتے جمہوری تسلسل ای قومی ترقی دی بنیاد اے۔ اے گالھیں اُنہاں اتوار رات کوں اتھاں پنجاب بار کونسل دے ملتان توں نویں منتخب ممبران اتے ہائی کورٹ تے ڈسٹرکٹ بار ایسوسی ایشن نال ملاقات دے دوران گالھ مہاڑ کریندیں ہوئیں آکھی ۔ سید یوسف رضا گیلانی آکھیا جو جڈاں او وزیراعظم بݨے تاں آپݨٰی شروع دی تقریر اچ اُنہاں عدلیہ دی بحالی ہک ایگزیکٹو آرڈر دے ذریعے کیتی ہئی، جیڑھا جو جمہوریت اتے آئین دی بالادستی دی جدوجہد دا حصہ ہئی۔ اُنہاں آکھیا جو چارٹر آف ڈیموکریسی اچ طے شدہ نکتے دے مطابق ہک آئینی عدالت دے قیام اُتے وی اتفاق تھیا ہئی۔ ایں تسلسل اچ 27ویں آئینی ترمیم غیر آئینی طریقیاں نال صدر یا وزیراعظم کوں ہٹاوݨ دے دروازے بند کرݨ اچ اہم کردار ادا کریسی۔ چیئرمین سینیٹ آکھیا جو اڄوکی انٹرنیشنل کانفرنس اچ اُنہاں کوں چیئرمین/ اسپیکر دے طور اُتے نامزد کیتا گیا، جیندے اچ 40 توں ودھ ملکاں دے اسپیکرز، ڈپٹی اسپیکرز، سابق صدور اتے مختلف ملکاں دے سابق وزراء شرکت کیتی۔ دنیا بھر دے پارلیمنٹرینز دہشت گردی دی سخت مذمت کیتی اتے پاکستان دے کردار دی تعریف کیتی۔ ایں دوران قائم مقام صدر پاکستان تے چیئرمین سینیٹ پنجاب بار کونسل آوݨ دی دعوت قبول کریندیں ہوئیں آکھیا جو بار قانون دی حکمرانی کیتے ستون دی حیثیت رکھیندی اے۔ایں موقع اُتے پنجاب بار کونسل دے نویں منتخب ممبران خواجہ قیصر بٹ، چودھری محمد سعید، مالک خان لنگا سودھا ہائی کورٹ بار ایسوسی ایشن ملتان دے صدر محمد اظہر خان مغل، جنرل سیکرٹری صفدر حسین سرسانہ، صدر ڈسٹرکٹ بار ایسوسی ایشن ملتان جاوید علی ڈوگر، جنرل سیکرٹری ملک عدنان احمد اتے چودھری داؤد احمد و ہائی کورٹ و ڈسٹرکٹ بار ایسوسی ایشن دے بئے ایگزیکٹو ممبران وی موجود ہَن۔