ملکی برآمدات اچ ودھارے کیتے صنعتکاراں کوں ہر ممکن سہولتاں دی فراہمی پہلی ترجیح اے، وزیراعظم محمد شہباز شریف

اسلام آباد۔ 24 نومبر (اے پی پی) وزیراعظم محمد شہباز شریف ملکی برآمد کنندگان اُتے ایکسپورٹ ڈویلپمنٹ سرچارج مکاوݨ اتے ایکسپورٹ ڈویلپمنٹ فنڈ دا پچھلے پنج سال دا تھرڈ پارٹی آڈٹ کراوݨ دی ہدایت کریندیں ہوئیں آکھیا جو ملکی برآمدات اچ ودھارے کیتے صنعتکاراں کوں ہر ممکن سہولتاں دی فراہمی حکومت دی اولین ترجیح اے۔ ایکسپورٹ ڈویلپمنٹ فنڈ دا غیر متعلقہ اتے غیر منطقی استعمال کہیں صورت قبول نئی۔وزیراعظم آفس دے میڈیا ونگ توں جاری بیان موجب اے گالھیں وزیراعظم شہباز شریف ملکی برآمدات اچ ودھارے کیتے بݨائے گئے ذیلی ورکنگ گروپ دی سفارشات متعلق جائزہ اجلاس دی صدارت کریندیں ہوئیں آکھی اے۔ اجلاس اچ وفاقی وزیر منصوبہ بندی تے ترقی احسن اقبال، وفاقی وزیر خزانہ محمد اورنگزیب، وفاقی وزیر تجارت جام کمال، وفاقی وزیر موسمیاتی تبدیلی ڈاکٹر مصدق ملک، وفاقی وزیر پیٹرولیم علی پرویز ملک، وزیر مملکت خزانہ اظہر بلال کیانی، چیئرمین ایس آئی ایف سی اتے بئے متعلقہ سرکاری افسراں شرکت کیتی۔اجلاس اچ چیئر پرسن ذیلی ورکنگ گروپ مصدق ذوالقرنین ساریاں ممبران دی موجودگی اچ ملکی برآمدات اچ ودھارے کیتے شعبے متعلق تحقیق دے بعد آپݨی سفارشات پیش کیتی۔وزیراعظم ورکنگ گروپ دے کم دی تعریف کیتی اتے سفارشات اُتے مثبت انداز اچ غور کریندیں ہوئیں ساریاں متعلقہ اداریاں کوں فوری اقدامات کرݨ دے موثر احکامات جاری کیتے۔ وزیراعظم ملکی برآمدگان اُتے لائے گئے ایکسپورٹ ڈویلپمنٹ سرچارج کوں فوری طور اُتے مکاوݨ اتے ایکسپورٹ ڈویلپمنٹ فنڈ دا پچھلے پنج سال دا عالمی معیار دے مطابق تھرڈ پارٹی آڈٹ کراوݨ دی ہدایت کیتی۔ وزیراعظم آکھیا جو ایکسپورٹ ڈویلپمنٹ فنڈ اچ موجودہ رقم دے بہترین استعمال کیتے پرائیویٹ سیکٹر توں مناسب چیئرمین کوں چُݨیا ونڄے۔ وزیراعظم ہدایت کیتی جو ایکسپورٹ ڈویلپمنٹ فنڈ اچ موجود رقم کوں صرف ملکی برآمدات اچ ودھارے، متعلقہ ریسرچ اینڈ ڈویلپمنٹ، برآمدی سیکٹر دی افرادی قوت دی ہنرمندی، ٹریننگ اتے عالمی معیار دی جدید سہولتاں کیتے استعمال کیتا ونڄے۔ ملکی برآمدات اچ ودھارے کیتے ٹی ڈی اے پی دے کردار دا اصلاحاتی جائزہ اتے نویں سروں بݨت کیتی ونڄے۔ وزیراعظم آکھیا جو ایکسپورٹ ڈویلپمنٹ فنڈ دے تحت جاری پروگرام اتے ساری سکیمز دا وی تھرڈ پارٹی آڈٹ کرایا ونڄے۔ ایکسپورٹ ڈویلپمنٹ فنڈ دا غیر متعلقہ اتے غیر منطقی استعمال کہیں صورت قبول کائنی۔ اُنہاں آکھیا جو دنیا بھر اچ پاکستان دی برآمدی شئیں دی تشہیر وفاقی حکومت دی ذمہ واری اے۔ ملکی برآمدات اچ ودھارے کیتے صنعتکاراں کوں فوری طور اُتے ہر ممکن سہولت پُڄاوݨ حکومت دی اولین ترجیحات اچ شامل اے۔