صدر آصف علی زرداری نال پاکستان دے روس کیتے نامزد سفیر فیصل نیاز ترمذی دی ملاقات

اسلام آباد۔ 24 نومبر(اے پی پی)صدر مملکت آصف علی زرداری نال پاکستان دے روس کیتے نامزد سفیر فیصل نیاز ترمذی ایوان صدر اچ ملین۔ صدر مملکت انہاں کوں تقرری تے مبارکباد ݙتی اتے روس دی پاکستان نال شراکت داری کوں اہم قرار ݙتا۔ صدر مملکت سیاسی، اقتصادی، تکنیکی اتے دفاعی تعاون دے ودھارے سانڳے سفیر دے کردار کوں منیندے ݙوہاں ملکاں وچال ݙو طرفہ تجارت اچ اڄوکی کمی بارے مسئلیاں دے حل نال توانائی، سرمایہ کاری، نقل و حمل اتے زراعت دے شعبیاں اچ تعلقات کوں ودھاوݨ کیتے کوششاں دی ہدایت کیتی۔ صدر مملکت آصف علی زرداری دہشت گردی دے خلاف جنگ اتے رابطیاں ڄھیں علاقائی مسئلیاں تے روسی قیادت نال نیڑے مشاورت دی اہمیت ودھائی۔ انہاں اعلیٰ تعلیم، تحقیق، خلائی شعبہ، ڈیجیٹل ٹیکنالوجیز، دفاع، دفاعی پیداوار اتے روسی اداریاں توں پاکستانی طلبہ و پیشہ ور بندیاں کیتے سکالرشپس اتے تربیتی موقع حاصل کرݨ کیتے تعاون کوں وی ودھاوݨ دا آکھیے۔ صدر مملکت ثقافتی تبادلیاں، سیاحت اتے روس اچ رہݨ آلی پاکستانی برادری دے مسئلیاں دے حل اتے فلاح و بہبود کیتے اقدامات تے وی زور ݙتا، نال ہی روسی میڈیا اتے تھنک ٹینکس نال تعلقات بݨا تے پاکستان دے نقطہ نظر کوں موثر طریقے نال پیش کرݨ دی ہدایت کیتی۔ صدر مملکت نامزد سفیر دی کامیابی کیتے دعا کیتی اتے اُنہاں کوں اپݨے ہر ممکن تعاون دی یقین دہانی کرائی۔