جناح میڈیکل کمپلیکس منصوبہ نہ صرف پاکستان ٻھل پورے خطے اچ صحت دے شعبے دا مثالی منصوبہ تھیسی، وزیراعظم دا جناح میڈیکل کمپلیکس بورڈ دے اجلاس نال خطاب

اسلام آباد۔ 24 نومبر(اے پی پی)وزیراعظم محمد شہباز شریف آکھیے جو جناح میڈیکل کمپلیکس منصوبہ نہ صرف پاکستان ٻھل پورے خطے اچ صحت دے شعبے دا ہک مثالی منصوبہ ثابت تھیسی۔ انہاں اے ڳالھ جناح میڈیکل کمپلیکس (جے ایم سی) دے بورڈ دے اجلاس دی صدارت کریندے ہوئیں کیتی۔ اجلاس اچ بورڈ دے ارکان اتے متعلقہ اداریاں دے وݙے افسر وی موجود ہَن۔ وزیراعظم آکھیا جو جناح میڈیکل کمپلیکس اساں ساریاں دیاں سانجھیاں کوششاں نال ٻہوں تیکھے پورا تھیسی۔

وزیراعظم جناح میڈیکل کمپلیکس دی تعمیر دے مختلف مرحلیاں اچ تکنیکی تعاون ݙیوݨ اُتے آغا خان یونیورسٹی دا شکریہ ادا کیتا۔ وزیراعظم ہدایت کیتی جو جناح میڈیکل کمپلیکس دے علاج معالجے دے ساریاں مجوزہ مرکزاں تے کم تیکھا کیتا ونڄے۔ اجلاس اچ جے ایم سی دے بورڈ جناح میڈیکل کمپلیکس دے منصوبے دی تعمیر دے ساریاں مرحلیاں وچ وزیراعظم دے مسلسل تعاون اتے راہنمائی سانڳے شکریہ ادا کیتا۔ اجلاس کوں ݙسایا گیا جو جناح میڈیکل کمپلیکس اچ نہ صرف طبی خدمات ٻھل بین الاقوامی معیار دی طبی تربیت، تعلیم اتے تحقیق کیتے ضروری سہولتاں ݙیوݨ تے کم تیکھا تھیندا پئے۔ جناح میڈیکل کمپلیکس کوں عالمی معیار دے مطابق گھن آوݨ کیتے جدید ٹیکنالوجی دے ذریعے تحقیق اتے آرٹیفیشل انٹیلیجنس اتے روبوٹکس دا استعمال کیتا ویسی۔