تریمتیں اُتے تشدد انسانی حقوق دی سنگین خلاف ورزی، انسانی وقار دے منافی عمل اتے معاشریاں دی ترقی اچ وݙی رکاوٹ اے، صدر مملکت دا تریمتیں تے تشدد مکاوݨ دے عالمی ڈینہہ تے سنیہا

اسلام آباد۔ 25 نومبر(اے پی پی)صدر مملکت آصف علی زرداری پورے ڄڳ دیاں تریمتیں نال یکجہتی کریندے آکھیے جو عورت تے تشدد نہ صرف انفرادی سطح تے غلط اے ٻھل انسانی حقوق دی وی سنگین خلاف ورزی اے، حکومت پاکستان تریمتیں دے تحفط کیتے ودھ اقدامات کیتن۔ اے ڳالھ انہاں تریمتیں تے تشدد مکاوݨ دے عالمی ݙینھ سانڳے اپݨے سنیہے اچ آکھی اے۔ صدر مملکت آصف علی زرداری آکھیا جو تریمتیں اتے ٻالڑیاں کوں تعلیم، ہنر اتے معاشی خود مختاری دے ذریعے بااختیار بݨاوݨ تشدد کوں ختم کرݨ دی بنیادی شرط اے، مضبوط قانونی ڈھانچے، ادارہ جاتی سہارے، آگاہی دا ودھارا اتے ثقافتی رویّاں اچ مثبت تبدیلی وی ایں سانڳے وݙی اہم اے۔ اُنہاں آکھیا جو ایں سال دا موضوع “تریمتاں اتے ٻالڑیاں دے خلاف ڈیجیٹل تشدد دے خاتمے کیتے اتحاد”  اے جیڑھا ساکوں پہل کیتے حکمت عملیاں، متاثرہ تریمتیں دی مدد اتے نظام اچ اصلاحات اتے سرمایہ کاری ودھاوݨ دو توجہ ݙویندے، اے موضوع ڈیجیٹل دنیا اچ تریمتیں اتے ٻالڑیاں دے خلاف ودھدے تشدد کوں روکݨ کوں اڳونہا کریندے، اے مہم حکومتاں، ٹیکنالوجی کمپنیاں اتے ہر بندے کوں ایں مسئلے دے خاتمے کیتے متحرک تھیوݨ دا سنیہا ݙیندی اے۔ انہاں آکھیا جو حکومت تریمتیں دے تحفظ اتے حقوق کیتے کئی اقدامات کیتن، ایندے اچ تحفظ خواتین برائے ہراسگی بمقام کار (ترمیمی) ایکٹ 2022، انسداد تجاوز بالجبر (تفتیش و ٹرائل) ایکٹ 2021، نفاذ حقوق ملکیت نسواں ایکٹ 2020 شامل ہِن، ایندے علاوہ نیشنل کمیشن آن دی سٹیٹس آف ویمن (این سی ایس ڈبلیو)، فیملی پروٹیکشن سینٹر اتے ٹول فری ہیلپ لائن 1099 جیہوجے معاون ادارے قائم کیتے گئن۔ صدر مملکت آکھیا جو گھٹ عمری دی شادی روکݨ کیتے قانون سازی وی اہم اے، ایں سانڳے سندھ 18 سال دی حد مقرر کر تے اڳو رہے، جݙاں جو اسلام آباد اتے پنجاب وی اے قانون بݨا چکین، توقع اے جو ٻئے ݙو صوبے وی تیکھے ایندے تے عمل کریسن۔ صدر مملکت آصف علی زرداری آکھیا جو ایں موقع اُتے میں ساریاں سرکاری اداریاں، سول سوسائٹی اتے برادریاں توں اپیل کرینداں جو اُو تریمتیں دے خلاف تشدد روکݨ کیتے کردار ادا کرن، اساں عہد کروں جو ہک اینڄھا مستقبل بݨیسوں جتھاں ہر عورت اتے ہر ٻالڑی خوف اتے تشدد توں آزاد زندگی گزار سڳے اتے آپݨیاں پوریاں صلاحیتاں استعمال کر سڳے، میں اُنہاں ساریاں متاثرین، کارکناں، مدد ݙیوݨ آلے اداریاں اتے بندیاں کوں خراج تحسین پیش کرینداں جیڑھے تریمتاں دی عزت، تحفظ اتے سلامتی کیتے کوشاں ہین۔