تریمتیں تے تشدد دے خلاف ساریاں کوں متحد تھیوݨا ہوسی، وزیراعظم شہباز شریف دا تریمتاں اُتے تشدد مکاوݨ دے عالمی ڈینہہ تے سنیہا

اسلام آباد۔ 25 نومبر(اے پی پی)وزیر اعظم محمد شہباز شریف تریمتیں اُتے تشدد اتے اُنہاں کوں ہراساں کرݨ دے واقعیاں کوں روکݨ کیتے کثیرالجہتی حکمت عملی اپناوݨ دی لوڑ تے زور ݙیندے آکھیے جو حکومت تریمتیں دے حقوق دے تحفظ اتے اُنہاں کوں با اختیار بݨاوݨ کیتے پیکج سودھا کئی اہم اقدامات کریندی پئی اے، تریمتیں اُتے تشدد دے خلاف ساریاں کوں متحد تھیوݨا ہوسی۔ اُنہاں اے گالھ تریمتیں تے تشدد مکاوݨ دے عالمی ڈینہہ سانڳے اپݨے سنیہے اچ آکھی جو پاکستان پورے ڄڳ نال ایں اہم مقصد کوں اڳونہا کرݨ کیتے آواز چیندا پئے، ایں سال اے ڈینہہ “تریمتیں دے خلاف ڈیجیٹل تشدد دے خاتمے کیتے متحد” تھیوݨ دے عنوان نال منایا ویندا پئے۔ انہاں اکھیا جو اے ویلھا اے جو اساں سوچوں اتے ایں عہد دی تجدید کریندے ہک مٹھ تھی تے تریمتیں تے تشدد روکݨ کیتے کردار ادا کروں، ایں سانڳے کثیرالجہتی حکمت عملی اپناوݨی ہوسی، تریمتیں تے تشدد روکݨ سودھا متاثرہ تریمتیں نال ہمدردی اتے معاشرے دے استحصالی نظام دی اصلاح کرݨی ہوسی، تریمتیں دے خلاف تشدد نہ صرف انسانیت اتے بنیادی انسانی حقوق دی خلاف ورزی اے ٻھل معاشرے دے امن و سکون اتے ترقی و خوشحالی اچ بہوں وݙی رکاوٹ اے۔ انہاں آکھیے جو آئین پاکستان تریمتیں دی عزت و تکریم دی ضمانت ݙیندے اتے اُنہاں کوں برابری دے حقوق ݙیندے، ایں سانڳے حکومتی سطح تے تریمتیں دے حقوق دے تحفظ کیتے پالیسیاں، قانون سازی، انتظامی، ادارہ جاتی اتے ٻئے اقدامات کیتے ویندے پئن، جیندے اچ تریمتیں کوں بااختیار بݨاوݨ دا پیکج وی شامل اے، حکومت پاکستان تریمتیں دے قانونی تحفظ، اُنہاں دی انصاف تئیں رسائی کیتے وی کوشاں اے، حکومت پاکستان ساریاں متعلقہ اداریاں، سول سوسائٹی اتے انسانی حقوق کیتے کم کرݨ آلے دے نال وی تعاون جاری رکھیسی تاں جو تریمتیں دے تحفظ، خود مختاری اتے اُنہاں دی خوشحالی کوں یقینی بݨایا ونج سڳے۔ اُنہاں ساریاں شہریاں، نینگراں، ساریاں سماجی و مذہبی رہنماواں اتے استاداں اُتے زور ݙتا جو تریمتیں اُتے تشدد دے خلاف رل تے پاکستان دی ترقی و خوشحالی کوں مضبوط اتے یقینی بݨاوݨ کیتے آپݨے عزم دا اعادہ کریندے ہیں۔ اُنہاں آکھیا جو ساریاں متعلقہ حکومتی ادارے، معاشرہ، سرکاری اتے غیر سرکاری آرگنائزیشنز اتے عالمی تعاون رَل تے ہی محفوظ، انصاف پسند اتے تریمتیں کیتے برابری اُتے مشتمل ماحول کوں پاکستان اچ یقینی بݨا سڳدے ہیں۔