وفاقی وزیر تجارت جام کمال خان بین الاقوامی فوڈ تے ایگریکلچر نمائش ”فوڈ ایگ 2025” دا افتتاح کر ݙتا

اسلام آباد۔ 25 نومبر (اے پی پی) وفاقی وزیر تجارت جام کمال خان منگل کوں کراچی ایکسپو سینٹر اچ تریجھی بین الاقوامی فوڈ تے ایگریکلچر نمائش ”فوڈ ایگ 2025” دا افتتاح کیتا۔ نمائش اچ 350 توں ودھ پاکستانی نمایاں ایکسپورٹرز نے باسمتی چاول، سُکّے اَمب، کینو، کھجوراں، ہمالین گُلابی لُوݨ، معیاری سی فوڈ، حلال گوشت تے ڈیری مصنوعات، مصالحے اتے ویلیو ایڈڈ فوڈز سودھے پاکستان دی بہترین زرعی تے غذائی مصنوعات نمائش اچ پیش کیتی۔ 27 نومبر 2025ء تئیں جاری رہݨ آلی ایں نمائش اچ دنیا دے 80 توں ودھ ملکاں دے 800 توں ودھ پری کوالیفائیڈ خریدار شامل تھیسن جیڑھا جو پاکستان دی تاریخ اچ کہیں ہک تجارتی ایونٹ کیتے ساریں توں وݙا بین الاقوامی خریدار ڈیلگیشن اے۔ نمائش دے افتتاح دے موقع تے وفاقی وزیر تجارت جام کمال خان آکھیا جو پاکستان دے مختلف زرعی تے موسمیاتی خطے اتے وزیراعظم دی مارکیٹ اوپننگ سفارت کاری دے تحت بݨائی ڳئی حکومتی پالیسیاں اساکوں صرف ہک وݙی پیداوار رکھݨ آلے ملک توں عالمی سطح دے برانڈڈ سپلائر اچ بدلݨ شروع کر ݙتے، فوڈ ایگ 2025 اچ دنیا بھر دے سنجیدہ خریداراں دی ایں تاریخی شرکت نال ثابت تھیندے جو اساݙی حکمت عملی واضح طور تے کامیاب تھیندی پئی اے۔ انہاں آکھیا جو خریدار وفد اچ ایشیا دے نمایاں درآمد کنندگان شامل ہن جنہاں دی تعداد ترائے سَو توں ودھ اے، ایں وفد دی قیادت چین دی وݙی سرکاری اتے نجی کمپنیاں، برناس ملائیشیا (BERNAS)، پی ٹی لارس مانس اتاما انڈونیشیا (PT Laris Manis Utama) اتے سری لنکا دے وݙے کاروباری گروپس کریندے پئن۔ یورپ توں شامل خریداراں اچ سریا فوڈز (یورپ دا ساریں توں وݙا باسمتی خریدار)، اے آئی بی فوڈز، آئیتاچ فوڈز، سکیپنز اینڈ کمپنی بیلجیم اتے میگروس ترکیہ شامل ہن۔ مشرق وسطیٰ اتے خلیجی خطے توں مرکری می ڈی ایم سی سی، سنڈر ٹریڈنگ قطر اتے ݙی اوشن فشرریز بحرین شریک تھیندےپئن۔ جام کمال آکھیا جو افریقہ دے کینیا، صومالیہ، کیمرون، انگولا، روانڈا، ماریشس اتے ٻئے ملکاں توں ݙو سَو توں ودھ خریدار شامل ہن جݙاں جو آسٹریلیا، کینیڈا، امریکا اتے روس دے اہم تجارتی گروپس وی ایں ریکارڈ وفد دا حصہ ہن۔ انہاں آکھیا جو ہزاراں طے شدہ بی ٹو بی ملاقاتاں، پائیداری اتے ٹریس ایبلٹی تے نو اُچی سطح دی کانفرنساں اتے پاکستانی غذائیں دا خصوصی پویلین جئیں اچ پنج براعظماں دے 21 عالمی شہرت یافتہ شیف صرف پاکستانی اجزاء نال لائیو کوکنگ کریسن، فوڈ ایگ 2025 کوں ہک سنگ میل ایونٹ بݨیسن جیں نال ہک ارب ڈالر توں ودھ دے ایکسپورٹ کاروبار دی توقع اے۔