جی الیون کچہری اچ خودکش دھماکے دے تار افغانستان نال مِلدے پئن، خوارج نور ولی محسود اسلام آباد اچ وݙی تباہی دا منصوبہ بݨایا، سکیورٹی اداریں نیٹ ورک کوں بے نقاب کر ݙتا، وفاقی وزیر اطلاعات تے نشریات عطاء اللہ تارڑ

اسلام آباد۔ 25 نومبر (اے پی پی) وفاقی وزیر برائے اطلاعات تے نشریات عطاء اللہ تارڑ آکھیا جو جی الیون کچہری اچ خودکش حملے دے تار افغانستان نال مِلدے پئن، کالعدم تحریک طالبان پاکستان دے سربراہ خوارج نور ولی محسود اسلام آباد اچ وݙی تباہی دا منصوبہ بݨایا ہئی، حملے دے فوری بعد سکیورٹی اداریں پوری کارروائی کوں ٹریس کر تے نیٹ ورک کوں بے نقاب کیتا، انٹیلی جنس بیورو اتے کاؤنٹر ٹیررازم ڈیپارٹمنٹ (سی ٹی ڈی) رَل تے کارروائی دے دوران خودکش حملے اچ ملوث چار دہشت گرداں کوں گرفتار کیتا۔ منگل کوں اتھاں پی ٹی وی ہیڈ کوارٹرز اچ پریس کانفرنس نال خطاب کریندیں ہوئیں وفاقی وزیر اطلاعات آکھیا جو جی الیون اسلام آباد کچہری اچ 11 نومبر کوں تھیوݨ آلے خودکش حملے دی تحقیقات اچ اہم پیشرفت تھئی اے، ایں واقعے دے محرکات، ایندے اچ شامل عنصر، منصوبہ بݨاوݨ آلے اتے متعلقہ تنظیم بارے حقائق قوم سامݨے رکھݨ ضروری اے۔ وزیر اطلاعات آکھیا جو سکیورٹی انتظامات چنڳے ہن ایں کیتے دہشت گرد کہیں اُچی سکیور جاء تے نئیں پُج سڳے، ایں کیتے انہاں اسلام آباد دے باہروار جیڑھی پہلی جاء مِلی، اونکوں ٹارگٹ کیتا۔ انہاں آکھیا جو انٹیلی جنس بیورو اتے سی ٹی ڈی خودکش حملے دے 48 گھنٹے دے اندر چار ملزماں کوں وݙی مہارت نال گرفتار کیتا، اے آپریشن ݙوہیں اداریں دا رَلیا مِلیا اقدام ہئی۔ انہاں دا آکھݨ ہئی جو حملے اچ ملوث عنصراں اچ ساریں توں پہلے ساجد اللہ عرف شینا کوں حراست اچ گھدا ڳیا جیندے بعد کامران خان، محمد زالی اتے شاہ منیر کوں وی انٹیلی جنس بیورو اتے سی ٹی ڈی گرفتار کر ڳھدا۔ انہاں آکھیا جو ساجد اللہ عرف شینا خودکش بمبار کوں گھن تے آیا، ایں 2015ء اچ تحریک طالبان افغانستان اچ شمولیت اختیار کیتی اتے مختلف افغان تربیتی کیمپاں اچ ٹریننگ گھدّی۔ 2023ء اچ ایندی ملاقات داد اللہ نامی کمانڈر نال تھئی جیندے ذریعے ایں حملے دی مکمل منصوبہ بندی فتنہ الخوارج ٹی ٹی پی دے سربراہ نور اللہ محسود کیتی۔ وفاقی وزیر اطلاعات تے نشریات ݙسایا جو داد اللہ باجوڑ دا رہائشی اے اتے ایں ویلھے افغانستان اچ موجود اے، خودکش حملے دے سلسلے اچ ساجد اللہ عرف شینا اگست 2025ء اچ افغانستان ونڄ تے داد اللہ نال ملاقات کیتی جݙاں جو ݙوہیں ہک ایپ دے ذریعے رابطے اچ ہن۔ انہاں آکھیا جو ساجد اللہ 2024ء اچ وی جلال آباد ڳیا جِتّھاں او داد اللہ دے نال ایں کارروائی دی منصوبہ بندی اچ رُجھیا رہیا، ایں واپسی تے ݙو دہشت گرد محمد زالی اتے کامران خان کوں ہائر کیتا، اگست 2025ء اچ ساجد اللہ عرف شینا اتے محمد زالی رَل تے داد اللہ نال مِلݨ افغانستان ڳئے اتے فتنہ الخوارج دے دہشت گرد عبداللہ جان عرف ابو حمزہ نال شیگل ڈسٹرکٹ اچ مِلے اتے اُتھاں رات لنگھائی، اُتھاں توں کابل پُجّے جِتّھ انہاں دی داد اللہ نال ملاقات تھئی، داد اللہ انہاں کوں نور ولی محسود دے احکامات پُجائے جو راولپنڈی اسلام آباد دے باہروار خودکش حملے کرݨے ہن، انہاں کابل اچ پوری پلاننگ کیتی، انہاں دا ہدف راولپنڈی اتے اسلام آباد اچ کہیں وݙی تخریبی کارروائی کوں انجام ݙیوݨا ہئی۔ وزیر اطلاعات تے نشریات آکھیا جو ساجد اللہ عرف شینا پاکستان واپس آ تے خودکش بمبار عثمان شنواری نال ملاقات کیتی جیڑھا جو ننگر ہار افغانستان دا رہائشی اے اتے اونکوں ساجد اللہ خودکش جیکٹ اتے ٻیا سامان ݙتا، ساجد اللہ عرف شینا اتے عثمان شنواری رَل تے مختلف جہیں کوں ݙیکھدے رہیے، اے ٻہوں وݙا نقصان کرݨ چاہندے ہن، او کہیں مین ٹارگٹ کوں ہِٹ نئیں کر سڳے اتے سڑک وچال ای دھماکہ تھیا، او اپݨے ٹارگٹ تئیں نئیں پُج سڳے جِتّھاں اے ٻہوں وݙا نقصان کرݨ چاہندے ہن، پر اللہ دے فضل و کرم نال ملک وݙے سانحے توں محفوظ رہیا، واقعے دے 48 گھنٹے دے اندر سی ٹی ڈی اتے انٹیلی جنس بیورو چاریں ملزماں کوں گرفتار کر ڳھدا۔ وفاقی وزیر اطلاعات آکھیا جو ایں اچ کوئی شک نئیں جو جِتنے وی لوک ایں واقعے اچ ملوث ہن، انہاں دے تار افغانستان نال مِلدے پئن، داد اللہ وی افغانستان اچ موجود اے، واقعے دا مرکزی کردار ساجد اللہ عرف شینا تحریک طالبان افغانستان دا رُکن رہیا، ایں افغانستان دے بے شمار دورے کیتے اتے جی الیون خودکش حملے دی پلاننگ وی کیتی۔ پریس کانفرنس دے دوران ساجد اللہ عرف شینا دا اعترافی بیان وی میڈیا کوں ݙکھایا ڳیا جئیں اچ ایں ݙسایا جو 2016ء اچ افغانستان دے صوبہ کنڑ اچ ایندی ملاقات امارت اسلامیہ دے کمانڈر ابو حمزہ نال تھئی جِتّھاں او ہک مہینہ رُکیا اتے تربیت حاصل کرݨ دے بعد واپس پاکستان آ ڳیا، ایں آکھیا جو 2023ء اچ او ول افغانستان ڳیا اتے ابو حمزہ دے ڈیرے تے رہیا جِتّھاں کجھ عرصے بعد تحریک طالبان دے کمانڈر داد اللہ نال ملاقات تھئی جئیں اونکوں آپݨی بیعت تے مجبور کیتا۔ اعترافی بیان اچ ٻیا انکشاف کیتا ڳیا جو چھی مہینے پہلے داد اللہ ولا رابطہ کر تے ساجد اللہ کوں افغانستان آوݨ دی ہدایت کیتی اتے آکھیا جو اپݨے ساتھی محمد زالی کوں وی نال گھن آوے۔ اُتھاں داد اللہ انہاں کوں ہک ہوٹل اچ کھاݨا کھواوݨ دے بعد ݙسایا جو خودکش حملہ آور تئیں جیکٹ پُجاوݨی اے، او ہک رات رہݨ دے بعد پاکستان واپس آ ڳئے اتے لڳاتار رابطے اچ رہے۔ ساجد اللہ بیان اچ آکھیا جو کجھ ݙینہ بعد ہدایت مِلی جو ہک قبرستان توں خودکش جیکٹ چاتی ونڄے، پشاور پُج تے ہک قبر تے کالے اتے چِٹے پتھراں دی سݨݨ ݙتی ڳئی جِتّھوں ایں جیکٹ چا تے گڑ دی بوری اچ رکھی اتے اسلام آباد گھن آیا۔ اسلام آباد اچ جیکٹ ہک نالے دے نیڑے لُکا تے رکھ ݙتی جیندے بعد او شاہ منیر کول پُجّا اتے جیکٹ اوندے حوالے کر ݙتی جئیں اونکوں آپݨی دُکان اچ محفوظ کر ڳھدا۔ بیان دے مطابق بعد اچ اونکوں ݙسایا ڳیا جو افغانستان توں عثمان نامی بندہ ݙو توں ترائے ݙینہاں اچ آسی، عثمان پاکستان پُجّا تاں ایں اپݨی تصویر گھلّی جئیں دی بنیاد تے ساجد اللہ اونکوں سنڄاتا اتے آپݨے کول گھن آیا۔ عثمان ݙو ݙینہ اوندے گھر مہمان دے طور تے رہیا، ول او اونکوں شاہ منیر کول گھن ڳیا جِتّھاں ایں ٻئے کجھ ݙینہ قیام کیتا، بعد اچ محمد زالی اونکوں رہائش کیتے ہک کمرہ کرائے تے گھن ݙتا۔ اعترافی بیان اچ آکھیا ڳیا جو کجھ عرصے بعد ساجد اللہ عثمان کوں اپݨی رہائش دا انڄ انتظام کرݨ دی ہدایت کیتی۔ جمعے دے ݙینہہ محمد زالی ݙسایا جو انہاں کوں جی الیون کچہری ونڄݨے جِتّھ پولیس اہلکار زیادہ ہوندن۔ منگل دی سویل ݙاہ وَجّے ساجد اللہ شاہ منیر توں جیکٹ گھدّی اتے محمد زالی دے نال رَل تے عثمان کوں خودکش جیکٹ پوائی، ایں موقع تے قاری عثمان دعا کرائی۔ بعد اچ حملہ آور بائیکیا تے جی الیون کچہری روانہ تھیا اتے ݙیہنہ دے ہک وَجّے اطلاع مِلی جو ایں خودکش دھماکہ کر ݙتے۔ وفاقی وزیر اطلاعات آکھیا جو ساجد اللہ عرف شینا افغانستان نال تعلق، افغانستان توں خودکش بمبار دے آوݨ، اُتھاں ٹریننگ گھنّݨ اتے ٻئے معاملیاں دا اعتراف کیتا، اے ٹھوس ثبوت ہن جو اے خودکش دھماکہ ٹی ٹی اے اتے ٹی ٹی پی رَل تے کیتا اتے خودکش بمبار افغانستان دا رہائشی اے، ٻئے لوک وی کہیں خودکش دھماکے اچ ملوث ہن۔ انہاں آکھیا جو اساݙی مسلح فوجاں روزانہ قربانیاں ݙیندی پئن، آپݨے شہریاں کوں محفوظ رکھݨ کیتے دہشت گرداں نال لڑدی پئن۔ انہاں دا آکھݨ ہئی جو خودکش دھماکے نال اسلام آباد دے اندر ٻہوں وݙا نقصان پُجاوݨ دی کوشش کیتی ڳئی۔ انہاں آکھیا جو ایں اچ کوئی شک نئیں جو ایں واقعے دے سارے تار افغانستان نال مِلدے پئ۔ انہاں آکھیا جو اساݙی سکیورٹی ایجنسیاں، قانون نافذ کرݨ آلے ادارے اتے پاک فوج پوری طرح متحرک ہن، انشاء اللہ دہشت گردی دا خاتمہ ہوسی اتے دہشت گرداں کوں سزا ݙیونّ۔ وفاقی وزیر آکھیا جو خودکش دھماکہ دے 48 گھنٹے دے اندر انٹیلی جنس بیورو اتے سی ٹی ڈی کوں وݙی کامیابی مِلی۔ انہاں آکھیا جو وزیراعظم محمد شہباز شریف دا شہریاں دے تحفظ بارے وݙا فوکس اے، فیلڈ مارشل سید عاصم منیر دی قیادت اچ مسلح فوجاں وی مکمل طور تے متحرک ہن، وزیراعظم انٹیلی جنس بیورو اتے سی ٹی ڈی دی ایں وݙی کامیابی تے انہاں کوں سراہیا۔ صحافیاں دے سوالاں دا جواب ݙیندیں ہوئیں وفاقی وزیر اطلاعات آکھیا جو خوارج ہائی ویلیو ٹارگٹ تئیں نئیں پُج سڳے، سکیورٹی سخت ہوݨ پاروں انہاں سڑک تے ای بلاسٹ کیتا، سارے ملزماں دا پَکّڑیا وݨجݨ وݙی کامیابی اے، ایں نال آوݨ آلے واقعیاں دی روک تھام اچ مدد مِلسی۔ انہاں آکھیا جو جیڑھے لوک انہاں عنصراں کوں آپݨے گھراں اچ پناہ ݙیندن، انہاں دا وݙا قصور اے، ایں طرح دے ماحول دا تدارک ٻہوں ضروری اے۔ ہک سوال دے جواب اچ وفاقی وزیر اطلاعات آکھیا جو خوارج نور ولی محسود آپݨے کمانڈر داد اللہ کوں افغانستان اچ بہہ تے اے ٹارگٹ ݙتا، داد اللہ باجوڑ دا رہائشی اے اتے افغانستان اچ رہندے، او ساجد اللہ عرف شینا اتے محمد زالی نال ملاقاتاں کریندا رہیا۔