چیئرمین جوائنٹ چیفس آف سٹاف کمیٹی جنرل ساحر شمشاد مرزا دی فیلڈ مارشل سید عاصم منیر نال الوداعی ملاقات

راولپنڈی۔ 25 نومبر(اے پی پی)چیئرمین جوائنٹ چیفس آف سٹاف کمیٹی جنرل ساحر شمشاد مرزا راولپنڈی اچ پاک فوج دے جنرل ہیڈکوارٹرز (جی ایچ کیو) اچ فیلڈ مارشل سید عاصم منیر نال الوداعی ملاقات کیتی۔ ملاقات اچ آرمی چیف، جنرل ساحر شمشاد مرزا دی مثالی قیادت، سٹرٹیجک وژن اتے پاک افواج کیتے انہاں دیاں مخلصانہ خدمتاں کوں سراہیا۔ آئی ایس پی آر دے مطابق، آرمی چیف سہ فریقی افواج (ٹرائی سروسز) وچال ہم آہنگی کوں مضبوط بݨاوݨ، رَل تے آپریشنل تیاری بہتر کرݨ اتے قومی سلامتی دے سٹرٹیجک اہداف کوں اگو تے ودھاوݨ اچ چیئرمین جوائنٹ چیفس آف سٹاف کمیٹی دے اہم کردار دی تعریف کیتی۔ آرمی چیف خطے اچ استحکام، عسکری سفارت کاری اتے دوست ملکاں دے نال پاکستان دے تعلقات کوں مضبوط بݨاوݨ کیتے جنرل ساحر شمشاد مرزا دیاں کوششاں کوں وی سراہیا۔ جنرل ساحر شمشاد مرزا اپݨیاں پیشہ ورانہ ذمہ داریاں دے دوران تعاون اتے اعتماد تے آرمی چیف اتے پاک افواج دا شکریہ ادا کیتا۔ ایں توں پہلے جی ایچ کیو آوݨ تے چیئرمین جوائنٹ چیفس آف سٹاف کمیٹی یادگار شہداء تے پھلاں دی چادر چڑھائی اتے پاک فوج دے چاک و چوبند دستے انہاں کوں گارڈ آف آنر پیش کیتا۔