پاکستان لک تے نئیں کھل تے کارروائی کریندے، افغان عبوری حکومت دہشت گرد گروہاں دے خلاف مؤثر اتے قابل تصدیق کارروائیاں نئیں کریندی، ڈی جی آئی ایس پی آر

راولپنڈی۔ 25 نومبر(اے پی پی)پاک فوج دے ترجمان لیفٹیننٹ جنرل احمد شریف چوہدری واضح کیتے جو پاکستان جݙاں وی کہیں جاء تے کارروائی کریندے تاں کھُل تے کریندے اتے کݙاہیں وی سویلین آبادی کوں نشانہ نئیں بݨیدا، نان کسٹم پیڈ ڳاݙیاں تے فوری پابندی لائی ونجے کیوں جو دہشت گردی دے کئی واقعیاں اچ انہاں ڳاݙیاں دا استعمال سامݨے آئے۔ صحافیاں کوں بریفنگ ݙیندے انہاں آکھیا جو پاکستان ہک ذمہ دار ریاست اے جیڑھی ریاست دی حیثیت نال ای ردعمل ݙیندی اے۔ انہاں واضح کیتا جو اساݙی اکھ اچ کوئی چنڳا یا گندا طالبان نئیں، سارے دہشت گرداں دے نال ہکو جھیاں سلوک ورتیا ویندے ۔ ڈی جی آئی ایس پی آر آکھیا جو پاکستان افغانستان اچ کہیں حالیہ واقعے اچ کوئی لکی کارروائی نئیں کیتی اتے جݙاں وی کوئی اقدام کیتا ویندے تاں ایندا پہلے باضابطہ اعلان کیتا ویندے۔ انہاں دا آکھݨ ہئی جو پاکستان افغان عوام دے خلاف نئیں ٻھل دہشت گردی دے خلاف اے، مسئلہ صرف افغان عبوری حکومت دے رویے نال اے جیڑھی دہشت گرد گروہاں دے خلاف مؤثر اتے قابل تصدیق کارروائیاں نئیں کریندی پئی۔ انہاں سوال چاتا جو طالبان حکومت کے تئیں عبوری حیثیت اچ رہسی اتے کݙاں ہک ریاست وانگوں فیصلہ کریسی؟ انہاں دا آکھݨ ہئی جو نان سٹیٹ ایکٹرز دے انداز نال فیصلے ناقابل قبول ہین، 4 نومبر دے بعد توں ہݨ تئیں 206 دہشت گرد مارے ڳن، خیبرپختونخوا اتے بلوچستان اچ 4,910 آپریشنز کیتے ڳئن۔ انہاں دعویٰ کیتا جو حالیہ سالاں اچ تھیوݨ آلے خودکش حملیاں اچ ملوث عناصر اچ اکثریت افغان شہریاں دی سامݨے آئی اے۔ انہاں زور ݙتا جو پاک افغان سرحد تے سمگلنگ اتے سرحد پار منظم جرماں دا گٹھ جوڑ تروڑݨ ضروری اے کیوں جو دہشت گردی دی معاونت دا وݙا ذریعہ ایہے نیٹ ورکس ہن۔ ڈی جی آئی ایس پی آر مطالبہ کیتا جو نان کسٹم پیڈ ڳاݙیاں تے فوری پابندی لائی ونجے کیوں جو دہشت گردی دے کئی واقعیاں اچ انہاں ڳاݙیاں دا استعمال سامݨے آئے۔ ترجمان پاک فوج آکھیا جو پاکستانی عوام اتے مسلح افواج دہشت گردی دے خلاف متحد ہن اتے دہشت گرداں دا آخری ساہ تئیں پیچھا کیتا ویسی ٻھل ایں جنگ کیتے اندرونی کمزوریاں کوں وی دور کرݨا ضروری اے۔ انہاں انکشاف کیتا جو ٻاہرلے ملک توں چلائے ونڄݨ آلے سوشل میڈیا اکاؤنٹس ریاستِ پاکستان دے خلاف منفی پروپیگنڈا کریندے پئن جنہاں دا مقصد عوام اتے اداریں وچال بے اعتمادی پیدا کرݨ اے۔