صدر مملکت آصف علی زرداری نال ایران دی سپریم نیشنل سکیورٹی کونسل دے سیکرٹری ڈاکٹر علی اردشیر لاریجانی دی ملاقات

اسلام آباد۔ 25 نومبر(اے پی پی)صدر مملکت آصف علی زرداری آکھیے جو پاکستان اتے ایران وچال تاریخ، عقیدے اتے ثقافت دے تکڑے دوستانہ تعلقات ہن، بھارت نال جنگ ویلھے ایران دی لڳاتار حمایت تے ایران دے شکر گزار ہیں اتے اسرائیلی جارحیت تے ایران کیتے پاکستان دی سیاسی اتے سفارتی حمایت جاری رکھݨ دا عزم دوہریندے ہیں۔ صدر مملکت آصف علی زرداری نال ایران دی سپریم نیشنل سکیورٹی کونسل دے سیکرٹری ڈاکٹر علی اردشیر لاریجانی ایوان صدر اچ ملاقات کیتی۔ صدر مملکت آصف علی زرداری ڈاکٹر علی اردشیر لاریجانی دا ایوان صدر آمد تے خیرمقدم کیتا اتے سپریم نیشنل سکیورٹی کونسل دی ذمہ داری سنبھالݨ تے انہاں کوں مبارکباد ݙتی۔ انہاں آکھیا جو اسلام آباد اتے تہران وچال تھیوݨ آلے آپسی تبادلے ݙو طرفہ تعلقات اچ مثبت رفتار کوں ݙکھیندن۔ انہاں گزریل اگست اچ ایرانی صدر نال اپݨی ملاقات وی یاد کیتی۔ انہاں حالیہ سیلاب دے بعد پاکستان نال یکجہتی تے ایرانی قیادت دا شکریہ ادا کیتا جیںدے اچ ایرانی ہلال احمر دی گھولی ڳئی انسان دوست امداد وی شامل ہئی۔ انہاں آکھیا جو پڑوسی ملکاں وچال تعاون ضروری ہے اتے ݙوہاں ملکاں دے عوام دے آپسی مفاد اچ اے۔ ڳالھ مہاڑ اچ صدر مملکت آکھیا جو پاکستان اتے ایران وچال تاریخ، عقیدے اتے ثقافت تے مبنی دیرینہ دوستانہ تعلقات ہن۔ انہاں بھارت نال جنگ دے ویلھے ایران دی لڳاتار حمایت تے شکریہ ادا کیتا اتے اسرائیلی جارحیت تے ایران کیتے پاکستان دی سیاسی اتے سفارتی حمایت دا عزم دوہرایا۔ انہاں حالیہ جنگ اچ ایرانی عوام دے ثابت قدمی دے عزم کوں سراہیا اتے سپریم لیڈر دی قیادت دی تعریف کیتی۔ انہاں مقبوضہ جموں و کشمیر اتے فلسطین دے عوام کیتے ایران دی اصولی حمایت تے شکریہ ادا کیتے۔ صدر مملکت آصف علی زرداری آکھیا جو پاکستان ݙو طرفہ تجارت اچ اضافے کیتے ایران نال رَل تے کم کرݨ چاہندے۔ انہاں آکھیا جو تجارت کوں سپورٹ کرݨ اتے سیاحت کوں ودھاوݨ کیتے پاکستان اتے ایران وچال ریل لنک کوں ترجیحی بنیاداں تے مضبوط بݨایا ونجے۔ انہاں آکھیا جو بہتر رابطہ کاری تاجراں اتے مسافراں، خاص طور تے زائراں کیتے آسانی بݨسی اتے ݙوہاں ملکاں وچال اقتصادی تعاون کوں ڳُوڑھا کرݨ اچ مدد مِلسی۔ صدر مملکت آصف علی زرداری ایران-پاکستان گیس پائپ لائن دے حوالے نال پاکستان دیاں ودھدیاں توانائی دی لوڑھاں کوں سامݨے رکھدے ہوئیں آپسی طور تے قابل عمل حل دی لوڑھ تے زور ݙتا۔ انہاں اسلام آباد اچ حالیہ تکنیکی مذاکرات دا خیرمقدم کیتا اتے آکھیا جو پاکستان تہران نال ڳالھ مہاڑ جاری رکھݨ چاہندے۔ ڈاکٹر علی اردشیر لاریجانی سپریم لیڈر آیت اللہ علی حسینی خمینی اتے صدر مسعود پزشکیان ولوں صدر مملکت آصف علی زرداری کوں نیک خواہشات اتے سلامتی دا سنیہا ݙتا۔ انہاں ایں سال تھیوݨ آلی 12 ݙینہاں دی جنگ دے دوران پاکستان دی سفارتی اتے اخلاقی حمایت تے شکریہ ادا کیتا۔ انہاں حالیہ واقعیاں اچ پاکستان دیاں مسلح افواج دی بہادری اتے کامیابی دی تعریف کیتی اتے آکھیا جو پاکستان دی فتح اساݙی اپݨی فتح اے۔ انہاں مزید آکھیا جو ایرانی صدر دے دورہ پاکستان دے بعد پاکستانی مصنوعات کوں ایران اچ ترجیحی رسائی ݙیوݨ کیتے کئی ہدایات جاری کیتیاں ڳئن جیںدے نال ݙاہ ارب ڈالر دے ݙو طرفہ تجارتی ہدف دے حصول دی راہ کھُل ڳئی اے۔ ایں ملاقات اچ خطے اتے بین الاقوامی صورتحال دے نال نال سکیورٹی اتے دہشت گردی دے خلاف کارروائی دے امور تے وی ڳالھ مہاڑ کیتی ڳئی۔ ملاقات اچ ݙوہاں ملکاں دے سینئر عہدیداران شریک ہن۔ ایرانی وفد اچ سپریم نیشنل سکیورٹی کونسل سیکرٹریٹ اچ فارن پالیسی اتے انٹرنیشنل سکیورٹی دے ڈپٹی علی باقری، سکیورٹی دے ڈپٹی علی رضا بیات اتے کونسل دی ایشیا، یوریشیا اتے اوشیانا کمیٹی دے سیکرٹری علی رضا تقوائی زادہ شامل ہن۔ پاکستانی پاسوں وزیر دفاع خواجہ محمد آصف، سید نیر حسین بخاری، سیکرٹری خارجہ اتے سیکرٹری نیشنل سکیورٹی شریک ہن۔