وفاقی دارالحکومت اچ خودکش حملے دی منصوبہ بندی افغانستان توں تھئی، پاکستانی حکام، حملے اچ مدد کرݨ آلے چار لوک گرفتار، وفاقی وزیر اطلاعات عطاء اللہ تارڑ دی پریس کانفرنس

اسلام آباد۔ 25 نومبر(اے پی پی)وفاقی دارالحکومت اچ ایں مہینے تھیوݨ آلے خودکش حملے دی منصوبہ بندی افغانستان توں تھئی۔ تحقیقات اچ حملہ آور دی سنڄاݨ کر ڳھدی اے جݙاں جو حملے اچ معاونت اچ ملوث چار لوکاں کوں گرفتار کیتے ڳن۔ وفاقی وزیر اطلاعات پریس کانفرنس اچ صحافیاں کوں ݙسایا جو 11 نومبر کوں تھیوݨ آلا دھماکہ جیںدے اچ 12 بے گناہ شہری جاں بحق اتے 28 زخمی تھئے، ہک افغان شہری گنجان عوامی جاء تے کیتا۔ انہاں آکھیا جو ایں موقع تے پہلے توں موجود سکیورٹی انتظامات وݙی تباہی کوں تھیوݨ توں روکݨ اچ اہم کردار ادا کیتا۔ عطاء اللہ تارڑ آکھیا جو تحقیقاتی ادارے ایں نتیجے تے پڄین جو حملے دی منصوبہ بندی افغانستان توں تھئی ہئی۔ انہاں مشتبہ منصوبہ ساز دا ناں ساجد اللہ عرف شینا ݙسیا جیئں سرحد پار عسکری تربیت حاصل کرݨ دا اعتراف وی کیتا۔ وفاقی وزیر اطلاعات دے مطابق، سکیورٹی فورسز حملے دے صرف ݙو ݙینہاں دے اندر چار مشتبہ لوکاں کوں گرفتار کر ڳھدے۔ انہاں انٹیلی جنس بیورو ڈویژن (آئی بی ڈی) اتے کاؤنٹر ٹیررازم ڈیپارٹمنٹ (سی ٹی ڈی) دی مؤثر کارکردگی کوں سراہیا۔ گرفتار کیتے ڳئے لوکاں ساجد اللہ، کامران خان، محمد زالی اتے شاہ منیر تے الزام اے جو انہاں دھماکے دی منصوبہ بندی اچ مدد کیتی اتے او خودکش جیکٹ ݙتی جیڑھی حملہ آور استعمال کیتی۔ حملہ آور دی سنڄاݨ افغان شہری عثمان شنواری دے طور تے تھئی اے جیڑھا جو صوبہ ننگر ہار دا رہائشی ہئی۔ وفاقی وزیر اطلاعات آکھیا جو ساجد اللہ عرف شینا 2015ء اچ افغانستان اچ تحریک طالبان اچ شمولیت اختیار کیتی اتے کئی عسکری کیمپاں اچ تربیت حاصل کیتی۔ انہاں 2023ء اچ اتے ول اگست 2025ء اچ اپݨے سینئر لیڈراں جنہاں اچ داد اللہ اتے نور ولی محسود شامل ہن، نال ملاقات کیتی جِتّھاں اسلام آباد اتے راولپنڈی اچ حملیاں دی منصوبہ بندی کیتی ڳئی۔ تحقیقاتی اداریں کولو قابل اعتماد ثبوت موجود ہن جو ساجد اللہ بعد اچ شینواری کوں ہائر کیتا اتے اوکوں خودکش جیکٹ ݙتی اتے کئی ممکنہ اہداف وی ݙکھائے۔ وفاقی وزیر اطلاعات آکھیا جو ساجد اللہ دے اعترافی بیان دے مطابق، خودکش جیکٹ پشاور دے ہک قبرستان توں چاتی ڳئی اتے گڑ دے ہک ٹرک دے ذریعے راولپنڈی سمگل کیتی ڳئی۔ شینواری مقامی ہوٹل اچ ݙو ݙینہاں رہیا اتے ایندے بعد اوکوں ہک ٻئے آپریٹر دے حوالے کر ݙتا ڳیا۔ عطاء اللہ تارڑ آکھیا جو انٹیلی جنس اداریں آئی بی ڈی اتے سی ٹی ڈی ہک وݙے دہشت گرد نیٹ ورک دا پردہ فاش کیتا اتے ݙو ݙینہاں دے اندر چار مشتبہ لوکاں کوں گرفتار کر ڳھدا۔ انہاں سکیورٹی اداریں دی مؤثر کارکردگی کوں سراہیا اتے آکھیا جو وزیراعظم شہباز شریف وی آئی بی ڈی اتے سی ٹی ڈی دی ویلھے سر دی کارروائی دی تعریف کیتی اے۔ وفاقی وزیر اطلاعات ساجد اللہ عرف شینا دی اعترافی بیان تے مبنی ہک ویڈیو وی ݙیکھائی جیڑھا جو خودکش حملہ آور دا مرکزی رابطہ کار اتے سہولت کار ہئی۔ ساجد اللہ عرف شینا نے اپݨے اعترافی بیان اچ آکھیا جو:”میں 2016ء اچ کنڑ افغانستان ڳیا جِتّھاں میری ملاقات ابو حمزہ نال تھئی جیڑھا جو امارت اسلامیہ دا کمانڈر ہئی۔ ہک مہینہ اُتھاں رہ تے ٹریننگ گھدی اتے واپس پاکستان آ ڳیا۔ 2023ء اچ ول افغانستان ڳیا اتے ابو حمزہ دے ݙیرے تے رہیا۔ کجھ ݙینہاں بعد تحریک طالبان دے کمانڈر داد اللہ نال ملاقات تھئی، ایں اپݨی بیعت تے مجبور کیتا۔ اڄ توں چھی مہینے پہلے داد اللہ ول رابطہ کیتا اتے اپݨے ساتھی دے نال افغانستان آوݨ دا آکھیا۔ میں اتے محمد زالی افغانستان جلال آباد ڳئے، اُتھاں انہاں آکھیا جو کابل آ ڄائو، اُتھاں اساں ہوٹل اچ کھاݨا کھادا اتے اوندے گھر ڳئے، ایں آکھیا جو ہک بندہ اے جیڑھا خودکش حملہ کریسی اوکوں جیکٹ پُجاوݨی اے، اساں اُتھاں ہک رات لنگھا تے واپس آ ڳئے اتے اوندے نال رابطے اچ ہاسے، ایں آکھیا جو اساں تہاݙی کوں تصویراں ٻھڄیندے ہیں تساں اُتھاں قبرستان وَنڄ تے خودکش جیکٹ گھن ونڄو، جݙاں اساں پشاور آئے تاں قبرستان اچ ہک قبر دے اُتے کالے اتے چِٹے رنگ دے پتھر پئے ہن جِتّھاں خودکش جیکٹ رکھی ہئی، او جیکٹ چا تے میں گڑ دی بوری اچ رکھی اتے اسلام آباد پُج ڳیا، اسلام آباد پُج تے اے جیکٹ میں ہک نالے اچ رکھی اتے شاہد منیر نامی بندے کول آ ڳیا اتے اوکوں جیکٹ بارے ݙسایا اتے او جیکٹ اوندے حوالے کر ݙتی جیں اونکوں اپݨی دُکان تے رکھ ڳھدا۔ کجھ ݙینہاں بعد پیغام آیا جو تہاݙے کول ݙو ترائے ݙینہاں اچ عثمان نامی بندہ افغانستان توں آسی، کجھ ݙینہاں بعد ایں اتھاں پُج تے اپݨی تصویر ٻھیڄی، میں او جاء سنڄاݨ ڳھدی اتے اونکوں اپݨے نال گھن آیا، ہک ݙو ݙینہنہ او میرے نال رہیا، گھر آلی کوں ݙسایا جو اے مہمان اے، اُتھاں توں میں اوکوں منیر نامی بندے کول گھن آیا، اُتھاں وی اے ہک ݙو ݙینہ رہیا اتے ول محمد زالی کمرہ کرائے تے گھنّا جِتّھاں اے رہندا ہئی، کجھ ݙینہ لنگھݨ دے بعد میں اونکوں آکھیا جو اپݨے رہݨ دی جاء دا آپ انتظام کر، جمعے دے ݙینہہ محمد زالی میکوں کال کیتی جو جی الیون کچہری اچ ونڄݨے، اُتھاں پولیس آلے ٻہوں زیادہ ہوندن، منگل دی سویل ݙاہ وَجّے میں شاہ منیر کوں فون کیتا، شاہ منیر توں جیکٹ گھدی اتے محمد زالی دے نال رَل تے خودکش بمبار کوں جیکٹ پوائی، جیکٹ پوواوݨ دے بعد قاری عثمان جیڑھا جو خودکش بمبار ہئی، ایں دعا کرائی، ایندے بعد او بائیکیا تے ٻیہہ تے جی الیون کچہری ڳیا اتے اساکوں ہک وَجّے اطلاع مِلی جو ایں خودکش حملہ کر ݙتے۔“