سی پیک دے پہلے مرحلے دی کامیاب تکمیل، ݙوجھا مرحلہ پاکستان دی معاشی ترقی دا نویکلا دور ثابت ہوسی

اسلام آباد۔ 26 نومبر (اے پی پی) چین۔پاکستان اقتصادی راہداری (سی پیک) دے پہلے مرحلے دی کامیاب تکمیل پاکستان اتے چین وچال مضبوط تزویراتی تعلقات دی نویں مثال بݨ ڳئی مے۔ فیز ون دے دوران 43 منصوبیاں دی تکمیل، جنہاں تے 25 ارب ڈالر دی سرمایہ کاری کیتی ڳئی، نہ صرف پاکستان دے بنیادی ڈھانچے اچ وݙی تبدیلی دا سبب بݨی بلکہ خطے اچ معاشی سرگرمیاں دے ودھاوݨ اچ وی اہم کردار ادا کیتا۔ سی پیک دے پہلے مرحلے اچ توانائی دے شعبے تے خاص توجہ ݙتی ڳئی۔ مختلف توانائی منصوبیاں دے ذریعے 8,800 میگاواٹ بجلی قومی گرڈ اچ شامل کیتی ڳئی، جذیں نال ملک اچ گزریل کئی سالاں توں جاری توانائی دے بحران اچ واضع ڳھٹکی تھئی۔ روڈ نیٹ ورک، پُلاں اتے ٹرانسپورٹ دے ٻئے منصوبیاں دی تکمیل نال تجارتی ہلّݨ جُلّݨ اچ بہتری آئی اتے کاروباری سرگرمیاں کیتے نویاں راہواں کھُل ڳئی۔ حکام دے مطابق اے ساریاں کامیابیاں ݙوہاں ملکاں دی سانجھی کوشش، ہزاراں انجینئرز اتے کارکناں دی ݙینہہ رات دی محنت اتے مستحکم ݙو پاسہ تعاون دا نتیجہ ہن۔ سی پیک دا ݙوجھا مرحلہ پاکستان دی معاشی اتے سماجی ترقی کیتے ٻہوں اہم قرار ݙتا ویندا پئے۔ ایں مرحلے اچ خصوصی اقتصادی زونز (SEZs) دی ترقی تے خاص توجہ ݙتی ویندی پئی اے، جنہاں دے ذریعے مُلکی اتے غیر مُلکی سرمایہ کاری اچ نمایاں اضافہ اتے لکھاں روزگار دے موقع پیدا تھیوݨ دی امید اے۔ زرعی شعبے اچ تعاون وی فیز ݙو دا اہم حصہ اے۔ جدید ٹیکنالوجی، مشینری اتے چینی ماہرین دی معاونت نال پاکستان دی زرعی پیداوار ودھاوݨ اتے غذائی تحفظ کوں یقینی بݨاوݨ دے اقدامات کیتے ویسن۔ ایندے نال نال صنعتاں اچ جدید ٹیکنالوجی دی منتقلی اتے نویاں تربیتی سکیماں دے ذریعے پاکستانی نینگراں کیتے ہنرمندی دے نویں رستے کھُلسن۔ گرین انرجی اتے ماحولیاتی تحفظ دے منصوبیاں کوں وی فیز ݙو اچ مرکزی اہمیت ݙتی ویندی پئی اے تانجو پاکستان دے توانائی نظام کوں پائیدار اتے ماحول دوست بݨایا ونڄ سڳے. ایں توں علاوہ صحت، تعلیم اتے بنیادی سہولتاں دے سماجی ترقیاتی منصوبے پسماندہ علاقیاں اچ زندگی دے معیار کوں بہتر بݨاوݨ اچ مدد ݙیسن۔ ماہرین دے مطابق سی پیک دا ݙوجھا مرحلہ نہ صرف پاکستان دی صنعتی بنیاد کوں مضبوط کریسی بلکہ خطے اچ تجارتی رابطیاں، برآمدات اچ اضافہ اتے مجموعی اقتصادی ترقی کیتے نویں دروازے کھلیسی۔