پاک فوج، انٹیلی جنس اتے قانون نافذ کرݨ آلے ادارے قومی سلامتی دے تحفظ کیتے پکے عزم اتے پیشہ ورانہ مہارت دا مظاہرہ کریندے پئن، فیلڈ مارشل سید عاصم منیر دی قومی سلامتی ورکشاپ دے شرکاء نال ڳالھ مہاڑ

راولپنڈی۔ 26 نومبر (اے پی پی) آرمی چیف فیلڈ مارشل سید عاصم منیر آکھیا جو پاک فوج، انٹیلی جنس اتے قانون نافذ کرݨ آلے ادارے قومی سلامتی دے تحفظ کیتے پکے عزم اتے پیشہ ورانہ مہارت دا مظاہرہ کریندے پئن۔ آئی ایس پی آر دے مطابق او بدھ کوں قومی سلامتی ورکشاپ (این ایس ڈبلیو 27) دے شرکا نال ڳالھ مہاڑ کریندے پئے ہن جنہاں بدھ کوں پاک فوج دے جنرل ہیڈکوارٹرز (جی ایچ کیو) دا دورہ کیتا۔ ایں موقع تے انہاں کوں پاکستان دی علاقائی اتے داخلی سکیورٹی صورتحال اتے مجموعی قومی سلامتی دے ماحول تے تفصیلی بریفنگ ݙتی ڳئی۔ دورے دے دوران وفد آرمی چیف فیلڈ مارشل سید عاصم منیر نال وی تفصیلی ملاقات کیتی۔ آرمی چیف خطے دی بدلدی ہوئی صورتحال تے روشنی پیندیں ہوئیں آکھیا جو ودھدی ہوئی جغرافیائی سیاسی مسابقت، سرحد پار دہشت گردی اتے ہائبرڈ خطرات علاقائی ماحول کوں پیچیدہ بݨا ݙتے۔ انہاں آکھیا جو ٻاہرلے ملک دی سرپرستی اچ جاری دہشت گردی اتے اطلاعاتی جنگ جیڑھے چیلنجز دے باوجود پاک فوج، انٹیلی جنس ادارے اتے قانون نافذ کرݨ آلے ادارے قومی سلامتی دے تحفظ کیتے پکے عزم اتے پیشہ ورانہ مہارت دا مظاہرہ کریندے پئن۔ فیلڈ مارشل سید عاصم منیر آکھیا جو پاکستان ہک اہم اتے باوقار ملک اے اتے آپݨا جائز مقام حاصل کرݨ کیتے پرعزم اے۔ انہاں آکھیا جو معرکۂ حق دے دوران افواجِ پاکستان دی پیشہ ورانہ صلاحیت، عزم اتے کمٹمنٹ نے پوری دنیا اچ پاکستان دی ساکھ کوں ٻیا مضبوط کیتے۔ انہاں دا آکھݨ ہئی جو اساݙی ساریں توں وݙی طاقت قومی یکجہتی اے اتے اساں سارے رَل تے دشمناں دے ناپاک عزماں کوں ناکام بݨیسوں۔ ایں موقع تے شرکا کوں ملک اچ غیر قانونی سرگرمیاں دے خلاف جاری اقدامات، خاص کر اسمگلنگ، نشہ آور شئیں دی ترسیل اتے منظم جرائم دے نیٹ ورکس دے خلاف کارروائیاں تے وی بریفنگ ݙتی ڳئی۔ اجلاس اچ سرحدی کنٹرول کوں ٻیا مؤثر بݨاوݨ اتے غیر قانونی غیر ملکیاں دی واپسی نال متعلق تازہ صورتحال توں وی خبردار کیتا ڳیا، جئیں دا مقصد داخلی نظم و ضبط اتے قومی مفادات دا تحفظ اے۔ آرمی چیف ݙو ٹوک لفظاں اچ آکھیا جو ہر پاکستانی شہری دی سلامتی، تحفظ اتے مُلکی سرحداں دا دفاع پاک فوج دی پہلی ترجیح اے اتے ایں تے کہیں قسم دا سمجھوتہ نہ کیتا ویسی۔ انہاں ایں عزم کوں دوہرایا جو پاک فوج، وفاقی تے صوبائی حکومتاں دی مکمل معاونت جاری رکھیسی۔ انہاں آکھیا جو پائیدار امن، استحکام اتے خوشحالی کیتے قومی سطح تے ہم آہنگی اتے ادارہ جاتی تعاون ضروری اے۔ واضح رہے جو ’’نیشنل سکیورٹی ورکشاپ۔ 27‘‘ نیشنل ڈیفنس یونیورسٹی (NDU) دا ہک مشہور پروگرام اے، جئیں اچ ارکانِ پارلیمنٹ، سینئر سول تے عسکری افسران، تعلیمی ماہرین اتے سول سوسائٹی دے نمائندے شریک ہوندن۔