وزیراعظم شہباز شریف وفد دے نال بحرین پڄ ڳئے، منامہ ایئرپورٹ تے بحرین دے ولی عہد، فوجاں دے نائب سپریم کمانڈر تے وزیراعظم، نائب وزیراعظم، وزیر خارجہ اتے ٻئی قیادت استقبال کیتا

منامہ۔ 26 نومبر (اے پی پی) وزیراعظم محمد شہباز شریف ݙو ݙینہ دے سرکاری دورے تے بحرین دے دارالحکومت منامہ پڄ ڳئے۔ وزیراعظم آفس دے میڈیا ونگ دی طرفوں بدھ کوں جاری بیان دے مطابق منامہ ایئرپورٹ تے بحرین دے ولی عہد، بحرینی فوجاں دے نائب سپریم کمانڈر تے وزیراعظم شہزادہ سلمان بن حمد الخلیفہ، بحرینی نائب وزیراعظم خالد بن عبداللہ الخلیفہ، بحرینی وزیر خارجہ ڈاکٹر عبد اللطیف بن رشید الزایانی اتے بحرینی قیادت دے سینئر ارکان وزیراعظم محمد شہباز شریف اتے پاکستانی وفد دا پرتپاک استقبال کیتا۔ بیان دے مطابق وزیراعظم محمد شہباز شریف 26 توں 27 نومبر تئیں بحرین دا سرکاری دورہ کریسن۔ نائب وزیراعظم تے وزیر خارجہ سینیٹر محمد اسحاق ڈار، وزیر داخلہ سید محسن رضا نقوی، وفاقی وزیر اطلاعات تے نشریات عطاء اللہ تارڑ، وزیر مملکت بلال اظہر کیانی اتے سینئر افسران وی وزیراعظم دے وفد اچ شامل ہن۔ دورے دے دوران وزیراعظم بحرین دی قیادت نال اُچی سطح دی ملاقاتاں کریسن۔ انہاں ملاقاتاں اچ بحرین دے بادشاہ شاہ حمد بن عیسیٰ الخلیفہ، بحرین دے ولی عہد تے وزیراعظم شہزادہ سلمان بن حمد الخلیفہ اتے بحرین دے نائب وزیراعظم شیخ خالد بن عبداللہ الخلیفہ نال ملاقاتاں شامل ہن۔ اے سرکاری دورہ مملکت بحرین دے نال پاکستان دے دیرینہ خوشگوار تعلقات کوں نشابر کریندے جئیں دا مقصد ݙوہیں ملکاں وچال نتاواں تے مبنی اتے تزویراتی شراکت داری کوں ودھاوݨ اے۔ ایں دورے نال روایتی طور تے خوشگوار تعلقات کوں تقویت مِلسی، شراکت داری دی نویاں راہواں بݨسن اتے عوام توں عوام دے رابطیاں کوں گھاٹا کیتا ویسی جیڑھا جو آپسی فیدہ ݙیوݨ آلے تعاون اچ حصہ ݙیسی۔