سپیکر قومی اسمبلی سردار ایاز صادق نال جرمنی دی سفیر اینا لیپل نال ملاقات

اسلام آباد۔ 26 نومبر(اے پی پی) سپیکر قومی اسمبلی سردار ایاز صادق نال جرمنی دی سفیر اینا لیپل پارلیمنٹ ہاؤس اچ ملی، جیں اچ پاک-جرمنی دے ݙو پاسے تعلقات سودھے آپت دت دلچسپی دے ٻئے معاملیں تے ڳالھ مہاڑ کیتی ڳئی۔ سپیکر، جرمن سفارتکار نال ڳالھ مہاڑ کریندے آکھیا جو پاکستان اَتے جرمنی وچال پارلیمانی اَتے عوامی رابطے اہم ہن۔ ݙوہیں رہنماواں پارلیمانی وفداں دے وٹاندرے کوں ودھاوݨ تے اتفاق کیتا۔ سپیکر آکھیا جو پاکستان دی پارلیمنٹ کوں مکمل طور تے شمسی توانائی تے منتقل تھیوݨ آلی دنیا دی پہلی پارلیمان ہووݨ دا اعزاز حاصل اے۔ پارلیمنٹ اچ تریمتاں اَتے ٻالاں دے حقوق دے تحفظ کیتے خصوصی کاکسز بݨائے ڳئن۔ پاکستان اچ تھیوݨ آلے اڄوکے دہشت گردی دے واقعات دیاں تاراں افغانستان نال مِلدن۔ افغان سرزمین پاکستان دے خلاف دہشتگردی کیتے استعمال تھیندی پئی اے۔ پاکستان گزریل چار ݙکیں توں 40 لکھ توں ودھ افغان مہاجراں دی میزبانی کریندا پئے۔ سارے مذہب انتہا پسندی اَتے دہشت گردی توں منع کریندن۔ جھیڑے دا پر امن حل خطے دی سلامتی کیتے ضروری اے۔ پارلیمانی رابطے ݙو پاسے تعلقات کوں مضبوط بݨاوݨ اچ اہم کردار ادا کر سڳدن۔ پارلیمنٹ اچ صنفی مساوات کیتے ݙوہیں ایواناں تے مشتمل خصوصی کمیٹی بݨائی ڳئی اے۔ پاکستان موسمیاتی تبدیلیاں توں متاثر تھیوݨ آلے ملکاں اچ شامل اے۔ سپیکر سردار ایاز صادق موسمیاتی تبدیلیاں دے چیلنجز نال نبڑݨ کیتے سانجھی کوششاں دی لوڑھ تے زور ݙتا۔ جرمن سفیر اینا لیپل پاکستان دیاں پارلیمانی روایتاں اَتے اصلاحاتی اقدامات دی تعریف کیتی اَتے آکھیا جو پاکستان اچ جاری صنفی مساوات دے ودھارے اَتے ٻالاں دے حقوق کیتے اصلاحات تعریف دے لائق ہن۔ جرمنی پاکستان نال پارلیمانی رابطیں کوں مزید ودھاوݨ دا خواہشمند اے۔ جرمنی پاکستان نال اقتصادی اَتے سماجی شعبیں اچ تعاون کوں مزید ودھاوݨ چاہندے۔ سردار ایاز صادق آکھیا جو پاکستان دے دہشت گردی دے خاتمے کیتے چاتے ڳئے اقدامات تعریف دے لائق ہن۔ پاکستان دہشت گردی دے خلاف جنگ اچ لازوال قربانیاں ݙتن۔