پی ٹی وی روایتاں دا امین، ہمیشہ اپݨیاں روایتاں اَتے قدراں کوں سامݨے رکھیا، اصلاحاتی عمل اچ نجی شعبے اَتے پاکستان دی جنریشن زی دی شمولیت ضروری اے، وفاقی وزیر اطلاعات عطا اللہ تارڑ

اسلام آباد۔ 26 نومبر (اے پی پی) وفاقی وزیر اطلاعات و نشریات عطا اللہ تارڑ پاکستان ٹیلی ویژن دی 61 ویں سالڳنڈھ تے پی ٹی وی کوں مبارخ ݙیندے آکھیا جو پی ٹی وی روایتاں دا امین اے جیں ہمیشہ اپݨیاں روایتاں اَتے قدراں کوں سامݨے رکھیا، معرکہ حق دے دوران پی ٹی وی نیوز بہترین بیانیہ کوں ودھارا ݙتا، پی ٹی وی دا ماضی وی شاندار ہئی اَتے مستقبل وی شاندار ہوسی۔ پاکستان ٹیلی ویژن دی 61 ویں سالگنڈھ دے موقع تے پی ٹی وی نیوز دے مارننگ شو اچ خصوصی ڳالھ مہاڑ کریندے وفاقی وزیر اطلاعات پی ٹی وی دے شاندار ماضی دی بحالی اَتے ادارے دے مستقبل کیتے قومی یکجہتی، ڈیجیٹل جدت اَتے پائیدار اصلاحات دی لوڑھ تے زور ݙتا۔ انہاں آکھیا جو اصلاحاتی عمل اچ نجی شعبے اَتے پاکستان دی جنریشن زی دی شمولیت ضروری اے جݙاں جو تعمیری تنقید کوں چنڳاں سمجھدے پی ٹی وی کوں مزید مضبوط بݨایا ونڄ سڳدے۔ انہاں آکھیا جو پاکستان ہک گھر وانڳوں اے جئیں کوں عزت اَتے وقار نال محفوظ رکھݨ اساں ساریں دی ذمہ واری اے۔ تنقید کوں کھلے دل نال قبول کرݨ اَتے آپت دے اتحاد برقرار رکھݨ قومی ترقی اَتے اقدار دے تحفظ کیتے بنیادی اہمیت رکھیندے۔ ہک سوال دے جواب اچ وفاقی وزیر اطلاعات آکھیا جو معرکہ حق دے دوران پاکستان دی جنریشن زی بھرپور اَتے سرگرم کردار ادا کیتا، دشمن حیران ہئی جو جنگ دے ماحول اچ پاکستانی عوام مطمئن کیویں ہن۔ انہاں نینگر نسل دے حب الوطنی دے جذبے دی تعریف کریندے آکھیا جو ایہا نسل ملک دے مستقبل دی رُخ مقرر کرݨ اچ مرکزی کردار ادا کریسی۔ انہاں آکھیا جو ہݨ جنریشن زی دا ویلھا اے جو او اڳوں ودھ تے ملک دی خدمت کرے اَتے پاکستان دے شاندار ورثے کوں جدید تقاضیں نال ہَم آہنگ کریندے ترقی دے نویں رستے مقرر کرے۔ وفاقی وزیر اطلاعات آکھیا جو پی ٹی وی دے تاریخی ورثے کوں مستقبل دیاں ضرورتاں موجب جدید خطوط تے استوار کرݨ ضروری اے تانجو قومی نشریاتی ادارہ تکھے بدلدی پئے میڈیا دے ماحول اچ موثر انداز اچ اڳوں ودھ سڳے۔ انہاں ایں امر تے زور ݙتا جو نجی شعبے نال سانجھ نال ادارے اچ اصلاحات دے عمل کوں تکھا اَتے ودھ موثر بݨایا ونڄ سڳدے جیں نال پی ٹی وی نہ صرف سامعین نال بہتر رابطہ قائم کریسی بلکہ پائیدار اَتے دور اندیش نشریاتی مستقبل وی یقینی بݨیسی۔ عطا اللہ تارڑ پی ٹی وی دے سامعین اَتے وزارت اطلاعات دی ٹیم کوں ڈیجیٹلائزیشن اَتے ادارے کوں جدید خطوط تے استوار کرݨ اچ انہاں دی خدمات تے خراج تحسین پیش کیتا۔ انہاں خصوصی طور تے پاکستان دی جنریشن دی تعریف کریندے آکھیا جو اے نسل ملک دے روشن ماضی کوں بہتر مستقبل نال جوڑݨ اچ کلیدی کردار ادا کریسی۔ وفاقی وزیر اطلاعات وزارت اطلاعات دے جاری منصوبیں دا ذکر کریندے ݙسایا جو انگریزی زبان دے نشریاتی چینلز دے ودھارے اَتے تعارف تے کم جاری اے جݙاں جو الجزیرہ جیھے عالمی میڈیا پلیٹ فارمز دے تجربیں توں رہنمائی گھندے پاکستان دے موقف کوں بین الاقوامی سطح تے موثر انداز اچ پیش کرݨ کیتے اقدامات چاتے ویندے پئن۔ مستقبل کوں سامݨے رکھیندے اساں درست رُخ تے ہاسے۔ انہاں آکھیا جو پی ٹی وی نویں ضرورتاں نال ہَم آہنگ انگلش چینل ”پاکستان ٹی وی“ لانچ کیتے، ایجھا پی ٹی وی بݨاوݨا اے جیں توں ہر پاکستانی آکھ سڳے جو اے میݙا ٹی وی اے۔ انہاں آکھیا جو براڈ کاسٹ میڈیا اچ نیوز، انٹرٹینمنٹ اَتے سپورٹس دے شعبیں اچ پی ٹی وی بانی اے۔ وفاقی وزیر آکھیا جو پی ٹی وی دے ڈرامے اڄ وی ذہناں تے نقش ہن۔ انہاں آکھیا جو پاکستان آئیڈل دے ذریعے نینگراں کوں ٹیلنٹ دا موقع ݙتا۔ وفاقی وزیر آکھیا جو پاکستان اے تاں اساں سارے ہیسے، ملکی وقار اَتے قومی مفاد توں ودھ تے کُجھ کائںی۔ عطا اللہ تارڑ ڳالھ مہاڑ دے اختتام تے آکھیا جو اصلاحات دا تسلسل پاکستان دی لمبے ویلھے دی ترقی کیتے ٻہوں اہم اے۔ انہاں آکھیا جو سارے سٹیک ہولڈرز کوں چاہیدے جو او دیانت داری اَتے جذبے نال مِل تے کم کرن تانجو ڈیجیٹلائزیشن، میڈیا دی جدت کاری اَتے قومی ترقی دے منصوبے آندیاں نسلاں کیتے دیرتئیں فیدے یقینی بݨا سڳن۔ بعد اچ وفاقی وزیر اطلاعات عطا اللہ تارڑ پی ٹی وی دی 61 ویں سالگنڈھ دا کیک وی کٹیا۔ ایں موقع تے سیکرٹری اطلاعات اشفاق احمد خلیل اَتے پی ٹی وی دے اعلیٰ حکام وی موجود ہن۔