پاکستان دا بھارت دے غیر قانونی طور تے زیر تسلط جموں و کشمیر اچ بھارت دے غیر قانونی اقدامات دے بارے اچ اقوام متحدہ دے خصوصی ماہرین دی تازہ ترین رپورٹ تے تشویش دا اظہار

اسلام آباد۔ 26 نومبر (اے پی پی) پاکستان بھارت دے غیر قانونی طور تے زیر تسلط جموں و کشمیر اچ بھارت دے غیر قانونی اقدامات دے بارے اچ اقوام متحدہ دے خصوصی ماہرین دی تازہ ترین رپورٹ تے تشویش دا اظہار کریندے آکھیا جو پاکستان غیر ملکی قبضے دے خلاف کشمیریاں دی منصفانہ جدوجہد اچ انہاں دی اخلاقی، سیاسی اَتے سفارتی حمایت جاری رکھیسی۔ ترجمان دفتر خارجہ موجب 24 نومبر 2025 کوں جاری تھیوݨ آلی اے رپورٹ ہک واری ول بھارتی قبضے دے تحت کشمیری عوام دی طرفوں انسانی حقوق دی سنگین اَتے منظم خلاف ورزیاں دی نشاندہی کریندی اے۔ بیان موجب پاکستان ماہرین دے مشاہدات کوں خطرے دی گھنٹی نال نوٹ کریندے جیڑھا بھارتی اقدامات دے نتیجے اچ صحافیاں، طلباء اَتے انسانی حقوق دے علمبرداراں سودھے تقریباً 2,800 بندے وݙے پیمانے تے من مانی گرفتاریاں کر تے حراست اچ ڳھدے ڳئن، سخت قانون سازی جیں اچ پبلک سیفٹی ایکٹ اَتے غیر قانونی سرگرمیاں (روک تھام) ایکٹ دا مسلسل اطلاق غیر معینہ مدت تئیں اَتے بلاجواز حراستاں کوں سوکھا کیتے۔ ترجمان اپݨے بیان اچ آکھیا جو تشدد، حراستی اموات، غیر قانونی حراست، قانونی عمل اَتے خاندان نال رابطے توں انکار، تعزیری گراوݨ اَتے زبردستی بے دخلی، ول ول مواصلاتی بلیک آؤٹ اَتے اٹھ ہزار سوشل میڈیا اکاؤنٹس کوں بلاک کرݨ سودھے پریس دی آزادی کوں دٻاوݨ دے واقعے اَتے کشمیریاں اَتے بھارت بھر اچ مسلمان کمیونٹی دے خلاف نفرت انگیز ڳالھ مہاڑ، زندے ساڑیے ونڄݨ اَتے ہراساں کرݨ دے واقعیں اچ ودھارا تھئے جیہڑے ہکو جیہے قابل مذمت اَتے افسوسناک ہن۔ بیان اچ آکھیا ڳیا اے جو اے نتیجے کشمیری مسلماناں تے ریاستی سرپرستی اچ تھیوݨ آلے ظلم و ستم دے نال نال بھارت بھر اچ اقلیتاں نال امتیازی سلوک دے حوالے نال پاکستان دے پراݨے خدشات دی تصدیق کریندن ۔ انہاں آکھیا جو پاکستان بھارت توں مطالبہ کریندے جو او اپݨے زبردستی اقدامات بند کرے اَتے مقبوضہ کشمیر اچ من مانی طور تے نظر بند سارے بندے کوں غیر مشروط طور تے رہا کرے۔ انہاں بھارت تے زور ݙتا جو او سارے مذہبی اقلیتاں خاص طور تے مسلماناں اَتے عیسائیاں تے ظلم و ستم دے خاتمے کیتے ٹھوس اقدامات کرے۔ پاکستان اقوام متحدہ دی سلامتی کونسل دیاں متعلقہ قرارداداں اَتے کشمیری عوام دیاں امنگاں موجب جھیڑا جموں و کشمیر دے پرامن، منصفانہ اَتے پائیدار حل کیتے اپݨے عزم دا اعادہ کریندے۔ بیان اچ بھارت تے زور ݙتا ڳئے جو او اپݨیاں جابرانہ پالیسیاں کوں روکیے، آبادیاتی اَتے قانونی تبدیلیاں کوں واپس گھنے، بنیادی آزادیاں کوں بحال کرے اَتے بامعنی ڳالھ مہاڑ اچ خلوص نیت نال شامل تھیوے۔ انہاں آکھیا جو پاکستان غیر ملکی قبضے دے خلاف کشمیریاں دی منصفانہ جدوجہد اچ انہاں دی اخلاقی، سیاسی اَتے سفارتی حمایت جاری رکھیسی۔