پاکستان اچ زیتون دی کاشت دا سفر بین الاقوامی سطح تے تکھے تسلیم کیتا ویندا پئے ، وفاقی وزیر قومی غذائی تحفظ و تحقیق رانا تنویر حسین

اسلام آباد۔ 26 نومبر(اے پی پی) وفاقی وزیر قومی غذائی تحفظ و تحقیق رانا تنویر حسین آکھیے جو پاکستان اچ زیتون دی کاشت دا سفر بین الاقوامی سطح تے تکھے تسلیم کیتا ویندا پئے اَتے اے شعبہ ملک دی پائیدار زراعت کیتے نویں رستے بݨیندا پئے ۔ عالمی یوم زیتون دے موقع تے اپݨے خصوصی پیغام اچ وفاقی وزیر آکھیا جو پاکستان زیتون دی کاشت دے ذریعے نہ صرف پائیدار زرعی ترقی دی طرف ویندا پئے بلکہ ایں نال زمین دی بحالی، پاݨی دے محفوظ استعمال اَتے بہتر ماحولیاتی توازن دے مقصد وی حاصل تھیندے پئن۔انہاں مزید آکھیا جو ملک دا وسیع جغرافیہ زیتون دی کاشت کیتے موزوں اے، جیں نال زیتون دی صنعت کیتے نویں رستے کھُلدے پئن اَتے لکھاں لوکاں کوں روزگار دے موقع مِلدے پئن۔ رانا تنویر حسین ایں ڳالھ تے زور ݙتا جو زیتون دی کاشت پاکستان دی دیہی معیشت اچ نویں رُوح پھوک ݙتی اے، اَتے ملکی سطح تے تیار تھیوݨ آلا زیتون دا تیل بین الاقوامی معیار موجب ڈھل ڳئے۔ انہاں آکھیا جو پاکستان اپݨے جنگلی زیتون دے وسائل کوں جدید تحقیق، جدید ٹیکنالوجی اَتے عالمی معیار دی پروسیسنگ دے ذریعے ہک مضبوط صنعت اچ بدل ݙتے۔وفاقی وزیر آکھیا جو زیتون دی صنعت اچ ترقی عالمی سانجھ اَتے تکنیکی تعاون دا نتیجہ اے۔ پاکستان عالمی شراکت داراں نال مِل تے زیتون دی پیداوار، معیار اَتے ویلیو ایڈیشن کوں مزید بہتر بݨاوݨ کیتے پرعزم اے۔ انہاں آکھیا جو پاکستان دا ہدف زیتون دے تیل دیاں عالمی برآمدات اچ اپݨا حصہ ودھاوݨا اے جیں نال معاشی استحکام اَتے تجارتی توازن تے چنڳے اثرات پوسن۔اپݨے پیغام اچ رانا تنویر حسین ایں ڳالھ تے وی روشنی پاتی جو زیتون دی وݙے پیمانے تے کاشت موسمیاتی تبدیلیاں دا مقابلہ کرݨ دی ہک موثر حکمت عملی بݨ ڳئی اے۔ ایں صنعت دے ودھارے نال نہ صرف ماحول دوست زراعت کوں تحفظ مِلیے بلکہ پاکستان کیتے ہک پائیدار، ساوے اَتے محفوظ مستقبل دی بنیاد وی مزید مضبوط تھئی اے۔انہاں امید ظاہر کیتی جو زیتون دی صنعت نال نہ صرف ملک اچ غربت مکاوݨ اچ مدد مِلسی بلکہ پاکستان وقتی زیتون دے تیل دی عالمی صنعت اچ قابل ذکر مقام حاصل کریسی۔