تھاݨہ آبپارہ کیس اچ اے پی پی دے 10 ملازم اَتے افسر باعزت بَری

اسلام آباد۔ 26 نومبر (اے پی پی) سول جج جوڈیشل مجسٹریٹ شائستہ خان کنڈی تھاݨہ آبپارہ دے مبینہ تشدد کیس اچ نامزد اے پی پی (قومی خبر رساں ایجنسی) دے 10 ملازم اَتے افسراں کوں دفعہ 249 دے تحت درخواست تے باعزت بَری کر ݙتا۔عدالت اپݨے فیصلے وچ قرار ݙتا جو مقدمے اچ نہ کوئی ثبوت موجود اے اَتے نہ ہی کوئی ایجھی شہادت اے جیں نال ملزماں تے الزام ثابت تھی سڳے۔ سماعت دا آغاز تھیا تاں عدالت کوں ݙسایا ڳیا جو مدعی مقدمہ فرقان راؤ دا وکیل پیش نی تھیا، جیں تے فاضل جج کاوڑ کریندے ریمارکس ݙتے جو مدعی مقدمہ یا اوں دا وکیل مستقل طور تے غیر حاضر رہندے، ساڈھے 11 وڄے مول سماعت تھیسی اَتے ملزماں دی بَری دی درخواست تے دلائل مکمل کیتے ویسن۔وقفے دے بعد ول سماعت شروع تھئی تاں مدعی فرقان راؤ دا وکیل ول وی عدالت اچ پیش نی تھیا۔ وکیل دے مُنشی استدعا کیتی جو انہاں دا وکیل مصروف اے تاں جو عدالت کاوڑ کریندے آکھیا جو اے پہلا مقدمہ اے جیں اچ مدعی اَتے اوں دا وکیل عدالت توں رستہ بچیندے پئن جݙاں جو 10 ملزم سویلے توں عدالت اچ موجود ہن، انہاں نال ناانصافی تھیندی پئی اے، سزا توں پہلے سزا ݙتی ویندی پئی اے۔سماعت دے دوران ملزم سمیع اللہ دے وکیل معروف قانون دان رانا روحیل ایڈووکیٹ ایف آئی آر پڑھ تے سُݨائی۔ ایں موقع تے فاضل جج سوال کیتا جو “غیر متعلقہ غُنڈے کیا ہوندن؟ جیں تے وکیل ݙسایا جو اے سارے ملزم سرکاری افسر ہن جݙاں جو مدعی فرقان راؤ خود ہک ارب روپے توں ودھ کرپشن کیس اچ نامزد اے اَتے سپیشل جج سینٹرل توں ضمانت تے اے، ایں بدنیتی تے ایہہ مقدمہ درج کرائے۔عدالت سرکاری پراسیکیوٹر کوں سݙیا اَتے اوں کوں دلائل ݙیوݨ دی ہدایت کیتی۔ سرکاری وکیل فائل دا جائزہ گھنݨ دے بعد عدالت کوں ݙسایا جو تفتیشی دی طرفوں جمع کرائے ڳئے چالان اچ واضح طور تے لِکھیے جو نہ کوئی ریکوری تھئی اے، نہ کوئی ثبوت موجود اے اَتے نہ ہی ایجھے شواہد سامݨے آئن جو الزام کوں ثابت کرسڳن، ملزماں کنے اسلحہ دی موجودگی دا وی کوئی ثبوت نی مِلیا۔فاضل جج شائستہ خان سماعت دے بعد ریمارکس ݙتے جو ملزماں کوں باعزت بَری کریندی پئی ہاں، مَن گھڑت اَتے بے بنیاد ایف آئی آر ݙتیاں ڳئن جیں نال عدالت دا ویلھا ضائع تھئے، میں سارے ملزماں کوں ہدایت کریندی ہاں جو او اپݨے ٻالاں دا خیال رکھن۔سماعت دے موقع تے اے پی پی ایمپلائز یونین دے سابق صدر خضر ملک فاضل جج کوں مخاطب کریندے آکھیا جو جیویں انصاف تے مبنی جلدی فیصلہ تساں جاری کیتے ایں دی مثال نی مِلدی، اساں تہاݙے شکر گزار ہیسے جیں تے فاضل جج آکھیا جو میݙا کم قانون موجب فیصلے کرݨ اے اَتے میݙا ضمیر مطمئن اے جو میں انصاف ݙتے