سیلاباں پاروں پاکستان کوں ہر سال تقریباً 9.5 فیصد جی ڈی پی دے براہِ راست اَتے بالواسطہ نقصانات برداشت کرݨے پوندن، ڈاکٹر مصدق ملک

اسلام آباد۔ 26 نومبر(اے پی پی)وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو سیلاباں پاروں پاکستان کوں ہر سال تقریباً 9.5 فیصد جی ڈی پی دے براہِ راست اَتے بالواسطہ نقصانات برداشت کرݨے پوندن، گلیشیئر پگھرݨ نال بارشاں دے پیٹرن، دریاواں دے وَہاؤ اَتے نہری نظام اچ خاص تبدیلیاں آندیاں پئن جیہڑیاں مستقبل اچ غذائی تحفظ کیتے ہک وݙا چیلنج ثابت تھیسن۔ انہاں اے گالھ پاکستان بزنس کونسل دے پینل مباحثے “کلائمیٹ ریزیلینس تاخیر دی قیمت کون ݙیسی؟” اچ خطاب کریندے آکھی۔ مکالمے اچ مختلف سٹیک ہولڈرز موسمیاتی تبدیلیاں پاروں ودھدے انسانی، معاشی اَتے ماحولیاتی نقصانات تے ڳالھ مہاڑ کیتی۔ وفاقی وزیر ڈاکٹر مصدق ملک اپݨے خطاب اچ پاکستان اچ موسمیاتی آفتاں دے تباہ کن اثرات کوں اڳونہا کیتا۔ وفاقی وزیر آکھیا جو موسمیاتی تبدیلی دی قیمت صرف معاشی نئیں، ایںدے اچ معذوری، موتاں، تعلیمی نقصان اَتے معاش دے وگاڑ جھئیں پہلو شامل ہن۔ انہاں نشاندہی کیتی جو سیلاباں پاروں پاکستان کوں ہر سال تقریباً 9.5 فیصد جی ڈی پی دے براہِ راست اَتے بالواسطہ نقصانات برداشت کرݨے پوندن۔