وزیراعظم شہباز شریف دا ہانگ کانگ دی عمارت اچ ٻھاہ لڳݨ نال جانی تے مالی نقصان تے افسوس ، چینی صدر اَتے قوم نال تعزیت

اسلام آباد۔ 27 نومبر (اے پی پی) وزیر اعظم محمد شہباز شریف ہانگ کانگ دی اُچی عمارت اچ تباہ کن ٻھاہ لڳݨ نال قیمتی جانی تے مالی نقصان تے ݙکھ اَتے افسوس کیتا اَتے چین دے صدر شی جن پنگ، چینی قوم اَتے متاثرین نال تعزیت کیتی اے۔ خمیس کوں سماجی رابطے دی ویب سائٹ “ایکس” تے بھیجے ڳئے سنیھے اچ وزیراعظم آکھیا جو تباہ کن آتشزدگی دے ایں واقعے اچ قیمتی جانی تے مالی نقصان تے ݙکھ اَتے افسوس تھئے، چین دے صدر شی جن پنگ، چینی قوم اَتے متاثرین نال تعزیت کریندوں، اساݙی دعائیں اَتے ہمدردیاں سوگوار خانداناں دے نال ہن، زخمیاں دی جلدی صحت یابی اَتے متاثرین دی ہمت اَتے بحالی کیتے وی دعا کریندوں۔ وزیراعظم آکھیا جو پاکستان مشکل دی ایں گھڑی اچ چین دی عوام، حکومت خاص طور تے ہانگ کانگ خصوصی انتظامی خطے دے نال مکمل یکجہتی دا اظہار کریندے، پاکستان اَتے چین ہمیشہ ہک ݙوجھے دے نال کھڑے رہسن۔