پاکستان معاشی اصلاحات تے نِجی شعبے دی اڳواݨی اچ ترقی دے نوِیں دور اچ داخل تھیوݨ آلا اے، وزیراعظم شہباز شریف دا پاکستان تے بحرین دے مضبوط تعلقات کوں معاشی تعاون اچ بدلݨ دم عزم

منامہ۔ 27 نومبر (اے پی پی) وزیراعظم محمد شہباز شریف پاکستان تے بحرین دے مضبوط تعلقات کوں معاشی تعاون اچ بدلݨ دم عزم کیتے ، اَتے بحرین دے سرمایہ کاراں کوں پاکستان اچ مُختلف شعبیں اچ سرمایہ کاری دی دعوت ڈیندے ہوئیں آکھیا اے جو پاکستان معاشی اصلاحات اَتے نِجی شعبے دی اڳواݨی اچ ترقی دے نوِیں دور اچ داخل تھیوݨ آلا اے۔ زراعت، آئی ٹی، معدنیات، توانائی تے بئے شعبیں اچ سرمایہ کاری دے نویں دروازے کُھل ڳِن ، بحرین دے سرمایہ کار پاکستان آوݨ اَتے اساݙے نال سانجھ کرݨ، اساں سرمایہ کاری، سانجھے منصوبیں اَتے کاروباری تعاون کیتے ہر ممکن سہولت ݙیسوں۔ پاکستان کول افرادی قوت، وسیلے، اُبھرݨ آلی منڈی، سٹرٹیجک محل وقوع اَتے نینگراں دی وݙی طاقت موجود اے، پاکستان تے خلیج تعاون کونسل (GCC) دے وچال آزاد تجارت دا معاہدہ آخری مرحلیاں اچ اے، اِے معاہدہ تجارتی تعلقات کوں نوِیں اُچائیاں تئیں پُڄا ݙیسی۔ وزیر اعظم اے ڳالھیں خمیس کوں اتھاں کاروباری برادری دی ہک تقریب توں خطاب کریندیں  ہوئیں کیتے۔ وزیر اعظم آکھیا جو انتہائ فیاضی اَتے گرمجوشی نال خوش آمدید آکھݨ تے بحرین دی حکومت اَتے عوام دا شکر گزار ہاں، اساں آپݨے بحرینی بھراواں، خاص طور تے شاہ بحرین اَتے ولی عہد تے وزیراعظم دی مہمان نوازی توں فائیدہ چاوݨے ۔ جئیں انداز اچ اساݙا استقبال کیتا ڳئے، او ہمیشہ اساکوں یاد راہسی، بحرین آ تے اینویں لگدا پئے جیویں اساں آپݨے گھر آئے ہووں۔ وزیر اعظم آکھیا جو بحرین تے پاکستان ݙو بھرا مُلک ہِن اَتے اساݙے تعلقات کئی ݙہاکیاں تے پھیلے ہوئِن، اے تعلقات ثقافتی، مذہبی، آپسی احترام اَتے اعتماد تے مبنی ہِن اَتے ایہو اساݙے تعلقات دے ستون ہِن، ݙوہیں مُلکاں وچال تزویراتی تعاون کئی ݙہاکیاں توں موجود اے، لیکن اڄ اساں انہاں تعلقات کوں ٻیا ودھاوݨ کیتے آیوں۔ وزیر اعظم آکھیا جو انہاں شاہ حمد بن عیسی الخلیفہ تے ولی عہد تے وزیراعظم کوں آکھیا جو پاکستان بھرا مُلک بحرین دے نال زراعت، آئی ٹی، اے آئی (AI)، فن ٹیک تے ٻئے سارے شعبیں سمیت اقتصادی تعاون کوں ودھاوݨ کیتے تیار اے، اساں انہاں شعبیں اچ آپݨی کوششاں، علم، تجربے اَتے ہک ݙوجھے دے نال تعاون دے عزم دے ذریعے ہم آہنگی پیدا کر سڳدوں۔ وزیر اعظم آکھیا جو انہاں دے دورے دا مقصد اقتصادی شعبیں اچ نوِیں پیش رفت گھن آوݨ اے، شاہ بحرین اَتے ولی عہد تے وزیراعظم دی پاکستان نال نہ بدلݨ آلی وابستگی تے اُنہاں دا انتہائ شکر گزار اے۔ وزیر اعظم آکھیا جو اساݙی ملاقاتاں دا ماحول بالکل ہک خاندان دے رَل ٻہݨ وانڳوں ہئی اَتے اے ملاقاتاں انتہائ بامقصد تے نتیجہ خیز رہیِن، اِیہو بنیاد تے میں آکھ سڳداں جو میں اتھاں مہمان کائن، بلکہ آپݨے خاندان دے لوکاں، آپݨے بحرینی بھراواں اَتے بھیݨیں نال مِلݨ آیاں۔ وزیر اعظم آکھیا جو پاکستان اچ آبادی دی اکثریت نینگراں تے مشتمل اے، نیگر اساݙی طاقت ہِن، اساݙے 60 فیصد نینگراں دی عمر 15 توں 30 سال دے وچال اے، نوجوان آبادی ہک چیلنج، وݙی نعمت اَتے ہک موقع وی اے ۔ چینی کہاوت دے مطابق اے ہک چیلنج وی اے اَتے ہک زبردست موقع وی اے، اساں آپݨے نینگراں کوں بااختیار بݨا تے ایں چیلنج کوں وݙے موقع اچ بدلݨ کیتے پرعزم ہیسے، انہاں کوں آئی ٹی، اے آئی، فنی تے پیشہ ورانہ مہارت اَتے ٻئے شعبیں اچ تربیت ݙے تے ایں چیلنج کوں موقع اچ بدل سڳسوں اَتے آپݨے بحرینی کاروباری بھراواں نال رَل تے اساں انہاں شعبیں اچ ہک زبردست قوت بݨسوں۔ وزیر اعظم آکھیا جو ایہو ویلھا اے جو ایں موقع توں فائیدہ چاتا ونجے کیوں جو وقت اَتے لہر کہیں دا انتظار نئی کریندی، اے ݙیکھ تے دِلی خوشی تھیندی اے جو بحرین اچ اساݙی متحرک پاکستانی کمیونٹی ہک لکھ توں ودھ تعداد اچ موجود اے، اِے کمیونٹی اساݙے کیتے باعث فخر اے۔ جیہڑے ملک دا وی میں دورہ کیتے، میں پاکستانی کمیونٹی نال ڳالھ مہاڑ کیتی اے اَتے میں اوتھ پاکستانیاں دی کہانیاں سُݨیِن جنہاں دی پاکستان نال محبت کݙاہیں گھٹ نئی تھئی، بھانویں انہاں آپݨی صلاحیتاں اَتے محنت کوں ݙوجھے ملکاں اَتے ثقافتاں دی ترقی کیتے وقف کر ݙتے۔ وزیر اعظم آکھیا جو پاکستانی شناخت کہیں جغرافیہ دی پابند کائنی، او جتھاں وی ہووݨ اے شناخت انہاں پاکستانیاں دے دِلاں اچ موجود ہوندی اے۔ وزیر اعظم آکھیا جو شاہ حمد بن عیسی الخلیفہ دی بصیرت افروز، متحرک تے دانشمندانہ اڳواݨی اَتے بحرین دے ولی عہد تے وزیراعظم دی عظیم اڳواݨی اَتے رہنمائی اچ بحرین معاشی ترقی، مالیاتی جدت اَتے انسانی مرکزیت تے مبنی ترقی دی ہک مشعل دے طور تے اُبھریے، پاکستان بحرین دی ترقی دے ماڈل توں بہوں متاثر اے ۔ انہاں آکھیا جو پاکستان وسیع موقع، ہنرمندی، وسیلیں اَتے صارفین دی ودھدی ہوئی تعداد آلی مارکیٹ دا حامل ملک اے جیڑھا تزویراتی محل وقوع رکھیندے، بحرین دی مالیاتی مہارت، کاروباری بصیرت اَتے عالمی نقطہ نظر دا اشتراک تھی ونجے تاں پاکستانی منڈیاں وسیع امکانات رکھیندن۔ انہاں آکھیا جو پاکستان ڈھانچہ جاتی اصلاحات دے عمل توں لنگھدا پئے جیڑھا معاشی اصلاحات، ڈیجیٹل جدیدیت اَتے نِجی شعبے دی اڳواݨی اچ ترقی کیتے فیصلہ کن کردار رکھدا پئے، اساں سُرخ فیتے دی رکاوٹاں کوں ہمیشہ کیتے مُکا ݙتے ، آپݨے ضابطیاں کوں مضبوط بݨائے، زرعی کاروبار، آئی ٹی، معدنیات، توانائی اَتے سیاحت جیہڑے نویں شعبیں کوں لمبے عرصے دی سانجھ داری کیتے کھول ݙتے۔وزیر اعظم آکھیا جو بحرین دے نائب وزیراعظم، وزیر خزانہ، وزیر صنعت، وزیر خارجہ اَتے بحرین دے کاروباری اداریں دے سرمایہ کار پاکستان آوݨ، اساں تہاݙے نال رَل تے کم کرݨ چاہندوں۔ تہاݙے عظیم تجربے اَتے مہارت توں اساں سِکھسوں، تساں آپݨے مشورے اَتے علم نال پاکستان دی صنعت اَتے زراعت کوں متحرک بݨاؤ۔وزیر اعظم آکھیا جو پاکستان تے خلیج تعاون کونسل (GCC) وچال آزاد تجارت دا معاہدہ آخری مرحلے اچ اے، جئیں تے جلدی دستخط تھیوݨ دی توقع اے، ایں معاہدے نال پاکستان تے جی سی سی ملکاں خاص طور تے بحرین وچال تجارت کوں ہتھ ݙیسوں۔بحرین دے وزیر خزانہ شیخ سلمان بن خلیفہ الخلیفہ آکھیا جو وزیر اعظم محمد شہباز شریف دی موجودگی اساݙے تعلقات دی تجدید اے، نسل در نسل پاکستانی شہریاں بحرین دی ترقی اچ نمایاں کردار ادا کیتے اَتے اڄ بہوں سارے پاکستانی مملکت بحرین کوں آپݨا ݙوجھا گھر سمجھدِن۔ انہاں آکھیا جو حبیب بینک، یونائیٹڈ بینک اَتے نیشنل بینک جیڑھے پاکستانی مالیاتی ادارے نصف صدی توں ودھ عرصے توں اساݙے مالیاتی شعبے اچ اہم کردار ادا کریندے پئِن، پاکستان تے بحرین دے رشتے تاریخ نال جُڑے ہوئن ۔ انہاں آکھیا جو خلیج تعاون کونسل اچ ہک وݙی تبدیلی آندی پئی اے، اِے خطہ جدت، پائیداری تے تکنیکی برتری دا مرکز بݨدا پئے ، مملکت بحرین کوں ایں تبدیلی اچ قائدانہ کردار ادا کرݨ تے فخر اے، بحرین ہک ایجھا ماحول بݨیندا پئے جتھاں تخلیقی صلاحیت، کاروباری جذبہ اَتے جرأت مندانہ خیال خوشحال مستقبل دی بنیاد بݨن۔ مالیاتی خدمات کیتے بحرین دا جدید نظام بہترین افرادی قوت اَتے اُبھردے ہوئے فن ٹیک موجود اے، بحرین دا جدید نظام پاکستانی بینکاں اَتے جدت کاراں کیتے علاقائی اَتے عالمی سطح تے بہترین پلیٹ فارم مہیا کریندے۔ انہاں آکھیا جو بحرین وژن 2030 کوں اڳوں ودھیندے ہوئیں وژن 2050 دی بنیاد رکھدا پئے، اساں پاکستان کوں ہک سانجھے معاشی مستقبل دے حامل شراکت دار دے طور تے ݙیکھدوں۔