بین الاقوامی مالیاتی اداریں دے نال پاکستان دی سانجھے داری اچ یو اے ای دی اہم معاونت قابل تعریف اے، وزیر خزانہ محمد اورنگزیب

اسلام آباد۔ 27 نومبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو تجارت، سرمایہ کاری، ترسیلات زر، بین الحکومتی تعاون اَتے بین الاقوامی مالیاتی اداریں دے نال پاکستان دی سانجھے داری اچ یو اے ای دی اہم معاونت قابل تعریف اے، پاکستان یو اے ای دے نال آپݨے برادرانہ تعلقات کوں مزید ودھاوݨ اچ پرعزم اے۔وزیر خزانہ اے ڳالھ پاکستان اچ متحدہ عرب امارات (یو اے ای) دے نویں سفیر سالم ایم سالم البواب الزابی نال ملاقات اچ ڳالھ مہاڑ کریندے کیتی۔ متحدہ عرب امارات دے نویں سفیر پاکستان اچ آپݨیاں سفارتی ذمہ داریاں سنبھالݨ دے بعد جئیں گرمجوشی نال خیرمقدم کیتا ڳئے، اُنہاں اُتے شکریہ ادا کیتے۔پاکستان اَتے یو اے ای دے عوام وچکار گھاٹے تاریخی رشتیں دا ذکر کریندے انہاں آکھیا جو پاکستان دے پیشہ ورانہ مہارت دے حامل لوکاں یو اے ای اچ بینکاری، مالیات، دفاع اَتے پبلک ایڈمنسٹریشن سودھے مُختلف شعبیں اچ لمبے عرصے تئیں اہم کردار ادا کیتے، انہاں ایں ڳالھ تے زور ݙتا جو خاص طور تے اسٹریٹجک، معاشی اَتے ثقافتی شعبیں اچ ݙو طرفہ تعلقات کوں مزید مضبوط بݨاوݨ انہاں دی سفارتی ترجیح رہسی۔وزیر خزانہ نویں سفیر دا خیر مقدم کریندے آکھیا جو پاکستان یو اے ای دے نال آپݨے برادرانہ تعلقات کوں مزید گہرا کرݨ اچ پرعزم اے، انہاں تجارت، سرمایہ کاری، ترسیلات، بین الحکومتی تعاون اَتے بین الاقوامی مالیاتی اداریں دے نال پاکستان دی سانجھ داری اچ یو اے ای دی اہم معاونت دی تعریف کیتی۔ وزیر خزانہ ݙوہیں ملکاں دی قیادت وچال اڄوکے اعلیٰ سطح دے رابطیں کوں وی پراݨے اَتے مستحکم تعلقات دی علامت قرار ݙتا۔وزیر خزانہ آکھیا جو پاکستان دی معاشی پالیسی دی سِمَت تجارت کوں ودھاوݨ اَتے لمبے عرصے دی سرمایہ کاری حاصل کرݨ تے مرکوز اے اَتے روایتی تعاون توں اڳوں ودھیندی پئی اے ۔ انہاں بندرگاہواں، ڈیجیٹل بینکاری، لاجسٹکس اَتے بنیادی ڈھانچہ جیھے کلیدی شعبیں اچ یو اے ای دی جاری سرمایہ کاری دی تعریف کیتی اَتے یو اے ای دے خود مختار فنڈز، نِجی شعبے اَتے بین الاقوامی کمپنیاں دی مزید شمولیت دی حوصلہ افزائی کیتی، انہاں آئی ٹی، اے آئی (AI)، فِن ٹیک، زراعت، معدنیات، لاجسٹکس اَتے اعلیٰ تعلیم اچ تعاون دے وسیع امکانات کوں وی اُجاگر کیتے۔یو اے ای دے سفیر وزیر خزانہ کوں ݙسایا جو معاشی تعاون اچ ودھارا انہاں دیاں اوّلین ترجیحات اچ شامل اے، انہاں ݙو طرفہ تجارتی حجم ودھاوݨ، پاکستانی کاروباری اداریں اَتے ٹیکنالوجی کمپنیاں کوں یو اے ای اچ آپݨی موجودگی ودھاوݨ، اَتے یو اے ای دے مزید سرمایہ کاراں کوں پاکستان گھن آوݨ اچ گھاٹی دلچسپی دا اظہار کیتے ۔ انہاں زراعت، انفراسٹرکچر، مائننگ، بندرگاہواں، مالیاتی خدمات اَتے ورچوئل اثاثیں سودھےمُختلف شعبیں اچ جاری سرگرمیاں دا حوالہ وی ݙتا۔سفیر پاکستانی شہریاں کیتے یو اے ای حکومت دی اہم ویزا سہولتی اصلاحات تے وی بریفنگ ݙتی، انہاں ݙسایا جو روزانہ تقریباً 500 ویزے پراسیس تھیندے پئِن اَتے آن لائن ویزا پراسیسنگ، پاسپورٹ تے سٹیمپنگ دے بغیر ای ویزا، اَتے پاکستانی اداریں نال بہتر سسٹم ٹو سسٹم لنکیجز جیھے نویں اقدامات تے عملدرآمد کیتا ویندا پئے تاں جو کاروباری لوکاں اَتے ٻئے مسافراں کیتے سفر کوں مزید سوکھا بݨایا ونڄ سڳے، پاکستان اچ نویں قائم شدہ یو اے ای ویزا سینٹر وی پراسیسنگ اچ تیزی گھن آوݨ اچ معاون تھیسی ۔وزیر خزانہ ایں پیش رفت دا خیر مقدم کریندے آکھیا جو یو اے ای عالمی سطح تے سرمایہ کاری، تجارتی نمائشاں اَتے ٹیکنالوجی ایکسپوز دا وݙا مرکز اے اَتے ایں تناظر اچ بہتر سفری سہولتاں کاروباری رابطیں کوں ودھاوݨ کیتے ٻہوں اہم ہِن، ملاقات اچ دفاعی تعاون، تربیتی تبادلیں اَتے ݙوہیں ملکاں وچال تاریخی عسکری رابطیں تے وی ڳالھ مہاڑ تھئی ۔ یو اے ای دے سفیر آپݨی مدت تعیناتی دے دوران انہاں تعلقات کوں مزید مضبوط بݨاوݨ دے عزم دا اظہار کیتے