قرآن حکیم دا پیغام سارے عالم تئیں پُڄاوݨ اساں ساریں دی سانجھی ذمہ واری اے، وفاقی وزیر مذہبی امور سردار محمد یوسف

اسلام آباد۔ 27 نومبر(اے پی پی) وفاقی وزیر مذہبی امور سردار محمد یوسف آکھیے جو قرآن حکیم دے ذریعے اساں ساری دنیا کوں امن، سلامتی اَتے بھرپی دا پیغام ݙے سڳدوں ، قرآن حکیم دا پیغام سارے عالم تئیں پڄاوݨ اساں ساریں دی سانجھی ذمہ واری اے۔اے ڳالھ انہاں اتھاں کنوینشن سینٹر اچ پاکستان دے پہلے عالمی مقابلہ حسن قرات دے چار ݙینھ توں جاری رہݨ آلے مقابلیں دے مُکݨ تے آکھی۔ انہاں آکھیا جو عالمی مقابلہ حسن قرات دی تکمیل تے اللہ دا شکر ادا کریندوں، اللہ تعالیٰ اساکوں اے موقع عطا کیتے جو 24 نومبر توں شروع تھی تے 27 نومبر کوں اِے مقابلے مُک ڳئے۔ انہاں آکھیا جو دنیا دے 37 ملکاں توں قرا حضرات تشریف گھن آئے جنہاں قرآن حکیم دی انتہائی خوش الحانی نال تلاوت کیتی۔ قرآن حکیم اچ ارشاد اے جو قرآن کوں ٹھہر ٹھہر تے پڑھیا ونڄے۔انہاں آکھیا جو پاکستان کوں عالمی مقابلہ حسن قرات کراوݨ دا اعزاز حاصل تھیے ،انشاءاللہ اِے سلسلہ جاری رہسی۔ انہاں آکھیا جو قرآن کریم دی عظمت اَتے اہمیت اساں بیان نی کرسڳدے، قرآن حکیم سرچشمہ ہدایت اَتے اساݙی نجات دا وسیلہ اے جیڑھا اساکوں دنیا اَتے آخرت دیاں کامیابیاں نال ہمکنار کرسڳدے۔انہاں آکھیا جو چیف کوآرڈینیٹر اَتے چیف جج قاری سید صداقت علی دیاں کاوشاں قابل تحسین ہِن۔ انہاں آکھیا جو ایران، مصر اَتے کویت دے ججاں وی مقابلے اچ منصف دے فرائض سرانجام ݙتے، انہاں آکھیا جو وزارت مذہبی امور نظام صلاۃ دے قیام کیتے کم شروع کرݙتے ، علماء اَتے مشائخ کونسل قائم کیتی ڳئی اے جیں نال پاکستان سودھے دنیا دے مسلماناں کوں فیدہ پُڄسی۔ انہاں آکھیا جو قرآن دا پُوری انسانیت کیتے پیغام پُڄاوݨ اساں ساریں دی سانجھی ذمہ واری اے، قرآن حکیم دے ذریعے اساں ساری دنیا اچ امن، سلامتی اَتے بھرپی دا پیغام پڄا سڳدوں۔