حکومت ہاکی دے ودھارے کیتے سنجیدہ اقدامات کریندی پئی اے، وقتی ونڄا مقام واپس گھنسوں، عبدالرحمن خان کانجو

ملتان۔ 27 نومبر(اے پی پی) وزیر مملکت توانائی و عوامی امور عبدالرحمن خان کانجو آکھیے جو حکومت پاکستان قومی کھیݙ ہاکی دی بحالی اَتے ودھارے کیتے خصوصی اَتے سنجیدہ اقدامات کریندی پئی اے، ماضی اچ پاکستان عالمی سطح تے لمبے عرصے تئیں ہاکی اچ آپݨی بادشاہت قائم رکھی  تاں جو نامناسب حالات اَتے عدم توجہ پاروں اِے کھیݙ آپݨے مقام توں محروم تھی ڳئے۔ موجودہ حکومتی کوششاں پاروں امید اے جو ہاکی ہک واری ول آپݨا ونڄا مقام ضرور حاصل کریسی ۔انہاں اے ڳالھ کانجو ہاؤس اچ ہاکی اکیڈمی دے کوآرڈینیٹر اسپورٹس ڈیپارٹمنٹ ملتان سفیر حسین نقوی، سابق کپتان شہباز احمد اَتے اظہر شاہ نال ملاقات کریندے آکھی ۔ سفیر حسین نقوی وزیر مملکت کوں بریفنگ ݙیندے ݙسایا جو ڈسٹرکٹ اسپورٹس آفیسر ملتان عدنان نعیم دی اڳواݨی اچ ملتان ہاکی اکیڈمی جنوبی پنجاب اچ ہاکی دی بحالی کیتے بھرپور کردار ادا کریندی پئی اے، انہاں آکھیا جو آسٹرو ٹرف تے نینگراں کوں صحت مند ماحول اچ کوالیفائیڈ کوچز دی نگرانی اچ تربیت ݙتی ویندی پئی اے تاں جو پاکستان دا قومی کھیݙ ݙو واری عالمی سطح تے مضبوط بنیاداں تے کھڑا تھی سڳے، عبدالرحمن خان کانجو اسپورٹس ڈیپارٹمنٹ اَتے ہاکی اکیڈمی دیاں کاوشاں دی تعریف کریندے آکھیے جو حکومت ہر ممکن تعاون کریسی ۔ انہاں آوݨ آلے مہینے تھیوݨ آلے ہاکی ایونٹ اچ بطور مہمان خصوصی شرکت دا یقین ݙیوائے۔ ملاقات دے اختتام تے سفیر حسین نقوی وزیر مملکت کوں اسپورٹس ڈیپارٹمنٹ ملتان ولوں یادگاری سووینئر پیش کیتے۔