پاکستان، متحدہ عرب امارات نال آپݨے برادرانہ تعلقات کوں قدر دی نگاہ نال ݙیکھدے، سید یوسف رضا گیلانی

اسلام آباد۔ 27 نومبر(اے پی پی) چیئرمین سینیٹ سید یوسف رضا گیلانی آکھیے جو پاکستان متحدہ عرب امارات (یو اے ای) دے نال آپݨے برادرانہ تعلقات کوں قدر دی نگاہ نال ݙیکھدے، جیڑھے سانجھے اعتماد، سانجھیاں مذہبی و ثقافتی قدراں اَتے سیاسی، معاشی، سماجی اَتے پارلیمانی تعاون دی ݙہاکیں تے مبنی مضبوط بنیاداں تے اُسارئے گئِن، انہاں اے ڳالھ اسلام آباد اچ متحدہ عرب امارات دے سفیر سالم محمد سالم البواب الزعابی کوں ملاقات اچ آکھی۔ملاقات اچ سانجھی دلچسپی دے امور اَتے ݙوہیں ملکاں وچال پراݨے برادرانہ تعلقات کوں مزید مستحکم بݨاوݨ دے عزم کوں دوہرائے ، چیئرمین سینیٹ سید یوسف رضا گیلانی متحدہ عرب امارات دی قیادت اَتے عوام کیتے دِلی نیک تمناواں دا اظہار کیتے۔چیئرمین سینیٹ اسلام آباد اچ منعقدہ بین الپارلیمانی اسپیکرز کانفرنس (ISC) اچ متحدہ عرب امارات دی خصوصی شرکت اَتے فعال کردار دی تعریف کریندے آکھیا جو امارات دی بھرپور شمولیت نال کانفرنس دی ڳالھ مہاڑ مزید مؤثر بݨی اَتے علاقائی یکجہتی دے ودھارے دے پُختہ عزم کوں اُجاگر کیتے، چیئرمین سینیٹ مستقبل دے حوالے نال ہک پلیٹ فارم دے طور تے آئی ایس سی دے کردار تے زور ݙتا، جیڑھا عالمی چیلنجاں نال سانجھے طور تے نِبݨݨ کیتے پارلیمانی رہنماواں کوں ہک سِر کریندے۔چیئرمین سینیٹ ݙوہیں ملکاں وچال اڄوکے سالاں اچ ودھدی سفارتی سرگرمیاں دا خیر مقدم کریندے ایں کوں ݙوہیں ملکاں دی قیادت دے وژن دا مظہر قرار ݙتا، انہاں آکھیا جو اپریل 2025 اچ شیخ عبداللہ بن زاید النہیان دے دورہ پاکستان اَتے شیخ خالد بن محمد بن زاید النہیان دے پہلے دورے پاکستان اَتے امارات دی دوستی کوں مزید مضبوط کیتے ، انہاں آکھیا جو پاکستان صدر امارات اَتے حکمران ابوظہبی شیخ محمد بن زاید النہیان دے آوݨ آلے دورہ پاکستان دا منتظر اے۔سید یوسف رضا گیلانی آکھیا جو 2025 اچ ݙوہیں ملکاں دی سانجھی تجارت 10.1 بلین امریکی ڈالر تئیں پُڄ ڳئی اے جیڑھی ہک مثبت پیش رفت اے، انہاں تجارت، توانائی، ٹیکنالوجی، سیاحت اَتے انفراسٹرکچر دے شعبیں اچ تعاون ودھاوݨ اَتے اماراتی سرمایہ کاری اچ وادھے تے زور ݙتا۔ متحدہ عرب امارات دے سفیر پاکستان کوں ہک اہم معاشی شراکت دار قرار ݙیندے تجارت اَتے سرمایہ کاری اچ پیش رفت ودھاوݨ تے مکمل رضامندی ظاہر کیتی، انہاں چیئرمین سینیٹ دی بطور وزیراعظم پاکستان خدمات دا حوالہ ݙیندے آکھیا جو انہاں دے دور اچ پاکستان۔امارات تعلقات مزید مضبوط تھئن۔پارلیمانی سفارت کاری دی اہمیت کوں اُجاگر کریندے چیئرمین سینیٹ پاکستان-یو اے ای فرینڈشپ گروپ اَتے پارلیمانی کمیٹیاں وچال سانجھے تحقیقی پروگراماں دی تجویز ݙتی، انہاں علاقائی سلامتی، قابل تجدید توانائی اَتے تعلیمی تعاون تے ݙو طرفہ ورچوئل سیمینارز کراوݨ دی وی سفارش کیتی۔چیئرمین سینیٹ سید یوسف رضا گیلانی متحدہ عرب امارات دے سفیر نال ڳالھ مہاڑ کریندے آکھیا جو پاکستان اَتے بھارت وچال کشیدگی دی اصل وجہ جموں و کشمیر دا پراݨہ جھیڑا اے، اَتے جنوبی ایشیا اچ پائیدار امن و استحکام اُو ویلھے تئیں ممکن کائنی جݙاں تئیں اقوام متحدہ دیاں قرارداداں اَتے کشمیری عوام دیاں خواہشاں موجب ایں مسئلے دا منصفانہ حل نی لبھیا ویندا، انہاں خبردار کیتے جو ایں مسئلے دے حل اچ تاخیر علاقائی سلامتی کیتے سنگین خطرہ بݨی ہوئی اے۔چیئرمین سینیٹ آکھیا جو متحدہ عرب امارات اچ رہݨ آلی پاکستانی کمیونٹی ݙوہیں ملکاں وچال مضبوط پُل دا کردار ادا کریندی اے، انہاں امارات اچ پاکستانی شہریاں دی مسلسل معاونت تے اماراتی حکومت دا شکریہ ادا کیتے تے آکھیا جو ویزا اچ نرمی نال روزگار، اعلیٰ تعلیم اَتے عوامی رابطیں دے موقع مزید ودھسن۔ملاقات دے دوران دفاعی تعاون، تربیتی پروگرامز، سانجھیاں مشقاں اَتے دفاعی پیداوار اچ جاری سانجھ تے اطمینان دے نال نال سانجھے مفاد دے سارے معاملات تے نیڑے دی سانجھ جاری رکھݨ دے عزم کوں دوہرایا ڳئے، متحدہ عرب امارات دے سفیر چیئرمین سینیٹ سید یوسف رضا گیلانی دی میزبانی تے شکریہ ادا کریندے ہوئیں ہر شعبے اچ ݙو طرفہ تعاون کوں مزید ودھارا ݙیوݨ دے عزم دا اظہار کیتے۔انہاں بین الپارلیمانی اسپیکرز کانفرنس دے کامیاب انعقاد تے وی چیئرمین سینیٹ کوں مبارکباد پیش کیتی۔ ملاقات دے دوران رُکن پنجاب اسمبلی ملک وسیم مظہر راؤ، مشیر چیئرمین سینیٹ و سفیر بین الپارلیمانی اسپیکرز کانفرنس مصباح کھر اَتے سینئر ڈائریکٹر جنرل پروٹوکول طارق بن وحید وی موجود ہن۔