بانی پی ٹی آئی نال جیل مینوئل دے مطابق ملاقاتاں کرایاں ویندیاں پئن، وزیر مملکت برائے داخلہ

اسلام آباد۔ 27 نومبر(اے پی پی)وزیر مملکت برائے داخلہ سینیٹر طلال چوہدری آکھیے جو بانی پی ٹی آئی نال جیل مینوئل دے مطابق ملاقاتاں کرایاں ویندیاں پئن، ہک انہاں دی لیگل ٹیم اَتے ہک انہاں دی فیملی ملاقات کریندی اے۔ خمیس کوں ایوان بالا دے اجلاس اچ سینیٹر فیصل جاوید دے نکتہ اعتراض دے جواب اچ وزیر مملکت برائے داخلہ آکھیا جو جیل دا آپݨا مینوئل ہوندے جیںدے مطابق ملاقاتاں کرائی ویندی اے، بانی پی ٹی آئی نال وی ایں مینوئل دے تحت ملاقاتاں کرائی ویندی اے، انہاں نال ہک انہاں دی لیگل ٹیم ملاقات کریندی اے اَتے ہک انہاں دی فیملی ملاقات کریندی اے۔ انہاں آکھیا جو عدالت بانی پی ٹی آئی نال ملاقاتاں تے ہک اوورسائٹ رکھی ہوئی اے، کوئی وی اہلکار نئیں چاہندا جو او عدالتی احکامات دی خلاف ورزی کر تے آپݨی نوکری توں ہتھ دھووے، ایندے علاوہ انہاں کوں ہر سہولت ݙتی ویندی اے جیںدے اچ دیسی ککڑ، 6 وݙیاں بیرکس، ایکسرسائز مشیناں دے علاوہ انہاں دا آپݨا کُک اے، آپݨا ٹی وی اے اَتے ہک فزیو وی اے۔ انہاں آکھیا جو چار لوک مفت سڑکاں تے ٻیھ تے ڈرامہ کریندن اَتے ہݨ تاں اے ضمنی انتخابات وی ہر ڳئِن۔