وفاقی وزیر اورنگزیب کھچی نیشنل لائبریری اچ انڈونیشین بک کارنر دا افتتاح کر ݙتا

اسلام آباد۔ 27 نومبر(اے پی پی)وفاقی وزیر برائے قومی ورثہ و ثقافت اورنگزیب خان کھچی نیشنل لائبریری آف پاکستان اچ انڈونیشین بک کارنر دا افتتاح کیتے جیڑھا پاکستان اَتے انڈونیشیا وچال ثقافتی تعاون کوں مضبوط بݨاوݨ کیتے ہک اہم قدم اے۔ تقریب اچ نیشنل لائبریری آف پاکستان اَتے نیشنل لائبریری آف انڈونیشیا وچال مفاہمت دی یادداشت (ایم او یو) تے وی دستخط کیتے ڳئے۔ وفاقی وزیر اورنگزیب کھچی آکھیا جو انڈونیشین کارنر دے افتتاح نال ݙوہیں ملک ایں سال سفارتی تعلقات دے 75 سال پورے تھیوݨ دا جشن منیندے پئن، پاکستان اَتے انڈونیشیا باہمی احترام، سانجھیاں قدراں اَتے ثقافت و تعلیم سودھا بین الاقوامی فورمز تے دیرینہ تعاون دی بنیاد تے قائم مضبوط رشتے رکھدن، انڈونیشین کارنر ݙوہیں ملکاں دے عوام وچال رابطے ودھاوݨ کیتے اہم ثابت تھیسی اتے پاکستان اچ انڈونیشیا دی ادب، ثقافت اَتے فکری روایات تئیں سوکھی رَسائی ݙیسی۔ وفاقی وزیر آکھیا جو ݙوہیں لائبریریاں وچال طے تھیوݨ آلا ایم او یو کتاباں دے تبادلے، سانجھیاں ثقافتی سرگرمیاں، تربیت اَتے تحقیقی سانجھ کوں ودھیسی۔ انہاں انڈونیشین سفارت خانے دے تعاون اَتے نیشنل لائبریری آف پاکستان دیاں بین الاقوامی ثقافتی رابطیاں دے فروغ کیتے کاوشاں کوں سراہیا۔ انڈونیشیا دے سفیر لیفٹیننٹ جنرل (ر) چندرا ورسینانتو سکوچو تقریب نال خطاب کریندے ہوئیں آکھیا جو انڈونیشین کارنر ݙوہیں دوست ملکاں دے عوام دے وچال باہمی سمجھ کوں ٻیا تکڑا کرݨ اچ مدد ݙیسی، ایں کارنر اچ انڈونیشیا دی سیاست، معیشت، سکیورٹی، ثقافت، سیاحت، خارجہ پالیسی، کھاݨیاں دیاں روایات اَتے قومی ترقی بارے کتاباں اَتے مواد شامل اے، ݙوہیں قومی لائبریریاں دا اے معاہدہ ادارہ جاتی تعاون دے ہک نویں دور دا آغاز اے،امید اے جو ایں سانجھ سانڳے ݙو طرفہ تعلقات مزید مضبوط تھیسن۔ سفیر چندرا ورسینانتو سکوچو وزارت قومی ورثہ و ثقافت اَتے نیشنل لائبریری آف پاکستان دا شکریہ ادا کیتے اَتے سابق و موجودہ لائبریری قیادت دیاں خدمات کوں سراہیا۔ تقریب اچ چیئر آسیان کمیٹی و سفیر تھائی لینڈ رونگ وڈی ویرابتر، آسیان ملکاں دے سفیر و ہائی کمشنرز، نیشنل لائبریری آف انڈونیشیا دے پرائم سیکرٹری جوکو سانتوسو، نیشنل لائبریری آف پاکستان دے ڈائریکٹر جنرل محمد علی شہزاد مظفر اَتے ٻئے معزز مہماناں شرکت کیتی۔