اسلام آباد۔ 28 نومبر (اے پی پی) پاکستان امریکا دے دارالحکومت واشنگٹن ڈی سی اچ فائرنگ دے واقعے دی شدید مذمت کیتی اے جئیں اچ مبینہ طور تے ہک افغان شہری ملوث اے۔ ترجمان دفتر خارجہ ولوں جمعہ کوں جاری بیان اچ لقمہ اجل بݨݨ آلے سپاہی دے اہل خانہ نال ہمدردی اَتے زخمیاں دی جلدی اَتے مکمل صحت یابی کیتے نیک تمناواں دا اظہار کیتا ڳیا۔ بیان اچ متاثرہ …
پاکستان دی واشنگٹن ڈی سی اچ فائرنگ دے واقعے دی مذمت
مزید خبراں
اسلام آباد۔ 28 نومبر (اے پی پی) پاکستان امریکا دے دارالحکومت واشنگٹن ڈی سی اچ فائرنگ دے واقعے دی شدید مذمت کیتی اے جئیں اچ مبینہ طور تے ہک افغان شہری ملوث اے۔ ترجمان دفتر خارجہ ولوں جمعہ کوں جاری بیان اچ لقمہ اجل بݨݨ آلے سپاہی دے اہل خانہ نال ہمدردی اَتے زخمیاں دی جلدی اَتے مکمل صحت یابی کیتے نیک تمناواں دا اظہار کیتا ڳیا۔ بیان اچ متاثرہ خانداناں دے نال نال امریکا دی حکومت اَتے عوام نال وی ہمدردی دا اظہار کیتا ڳیا ۔ بیان دے مطابق اے ٹارگٹڈ حملہ بلاشبہ دہشت گردی دی کارروائی اَتے امریکا دی سرزمین تے ہک گھناؤݨا حملہ اے۔ پچھلی ݙو دہائیاں توں پاکستان ایہو جیہے بے شمار دہشت گردی دے واقعیاں دا سامݨا کیتے جِنہاں دا واضح تعلق افغانستان نال اے۔ ترجمان دفتر خارجہ آپݨے بیان اچ ٻیا آکھیا جو اے واقعہ بین الاقوامی دہشت گردی توں سامݨے آوݨ آلے چیلنجاں دی نشاندہی کریندے اَتے ایں خطرے نال نبڑݨ کیتے عالمی تعاون کوں ودھاوݨ دی ضرورت تے زور ݙیندے۔ اے واقعہ عالمی سطح تے دہشت گردی دے ہک پریشان کُن رجحان دی واپسی دا اشارہ ݙیندا پئے، ایں کیتے عالمی برادری کوں ایں صورتحال دا نوٹس گھنݨا چاہیدا اَتے انسداد دہشت گردی اچ سانجھی کوششاں کوں مضبوط کرݨا چاہیدے۔ بیان دے مطابق پاکستان دہشت گردی دے مشترکہ چیلنج نال نبڑݨ کیتے امریکا اَتے وݙی عالمی برادری دے نال رَل تے کم کرݨ کیتے پرعزم اے۔
