پاکستان تاجکستان اچ دہشت گرد حملے اچ چینی شہریاں دی ہلاکت تے چین اَتے تاجکستان نال تعزیت اَتے یکجہتی دا اظہار کریندے، ترجمان دفتر خارجہ

اسلام آباد۔ 28 نومبر (اے پی پی) پاکستان افغانستان دے نال آپݨی سرحد دے نیڑے تاجکستان اچ ہک گھناؤنے دہشت گرد حملے اچ چینی شہریاں دی قیمتی جاناں دے ضیاع تے عوامی جمہوریہ چین دی حکومت اَتے عوام دے نال نال تاجکستان دی حکومت اَتے عوام نال آپݨی گہری تعزیت اَتے مضبوط یکجہتی دا اظہار کیتے۔ ترجمان دفتر خارجہ ولوں جاری بیان اچ آکھیا ڳیا جو پاکستان چینی شہریاں تے تھیوݨ آلے ایں بزدلانہ حملے دی واضح لفظاں اچ مذمت کریندے۔ ایں واقعے اچ مسلح ڈرونز دا استعمال افغانستان توں آوݨ آلے خطرے دی سنگینی اَتے ایںدے پَچھوں کم کرݨ آلے لوکاں دی ݙِھٹائی کوں واضح کریندے۔ بیان دے مطابق ہک پڑوسی دے طور تے جیڑھا ولا ولا افغان سرزمین توں دہشت گردی دے حملیاں دا شکار تھیے، پاکستانی عوام چینی دوستاں اَتے تاجک شراکت داراں دے ݙُکھ کوں پُوری طرح سمجھدے اَتے شریک اے۔ ترجمان آپݨے بیان اچ ٻیا آکھیا جو پاکستان مسلسل ایں ڳالھ تے زور ݙیندا رہیے جو افغان سرزمین آپݨے پڑوسیاں یا کہیں ٻئے ملک دے خلاف دہشت گردی کیتے استعمال نئی تھیوݨی چاہیدی، دہشت گرد عناصر ولوں افغان سرزمین دا ولا ولا استعمال اَتے افغان طالبان حکومت دی سرپرستی اچ انہاں دی مسلسل موجودگی پورے خطے اَتے وݙی عالمی برادری کیتے پریشانی دا باعث اے۔ بیان دے مطابق افغان سرزمین توں دہشت گرد گروپاں، انہاں دی حوصلہ افزائی کرݨ آلیاں، سہولت کاراں اَتے مالی معاونت کرݨ آلیاں دے خلاف ٹھوس اَتے قابل تصدیق کارروائی ایں ودھدے ہوئے خطرے نال نبڑݨ دا ہکو راہ اے، پاکستان آپݨے سانجھے پڑوس اچ امن، استحکام اَتے سلامتی کوں فروغ ݙیوݨ کیتے چین، تاجکستان اَتے ٻئے علاقائی شراکت داراں دے نال رَل تے کم کریندا راہسی۔