مہاجرین دی سمگلنگ ہک عالمی چیلنج اے، مسئلے دا حل بین الاقوامی تعاون اَتے وقتی معلومات دے تبادلے نال ہی ممکن اے، طلال چوہدری

اسلام آباد۔ 28 نومبر(اے پی پی) پاکستان اچ تارکین وطن دی سمگلنگ روکݨ کیتے بین الاقوامی سطح تے وݙی پیشرفت کریندے وزارت داخلہ اسلام آباد اچ ہک اعلیٰ سطحی بین الاقوامی کانفرنس دا انعقاد کیتے جیں اچ30 ملکاں دے نمائندیں، عالمی اداریں اَتے شراکت دار تنظیماں شرکت کیتی۔کانفرنس نال خطاب کریندے وزیرمملکت داخلہ طلال چوہدری آکھیا جو مہاجرین دی سمگلنگ ہک عالمی چیلنج اے اَتے ایں مسئلے دا حل صرف مربوط حکمت عملی، بین الاقوامی تعاون اَتے وقتی معلومات دے تبادلے نال ہی ممکن اے۔ انہاں آکھیا جو پاکستان غیر قانونی ہجرت مکاوݨ کیتے عالمی برادری دے نال مونڈھے نال مونڈھا جوڑ تے کھڑے اَتے خطے اچ محفوظ اَتے قانونی ہجرت دے ودھارے کیتے ہمیشہ پرعزم رہسی۔طلال چوہدری آکھیا جو انسانی سمگلنگ دے منظم نیٹ ورکس کوں بھنݨ کیتے عالمی سطح تے مشترکہ اقدامات اَتے تعاون ٻہوں ضروری تھی چُکیے۔ انہاں دا آکھݨ ہئی جو ایں کانفرنس اچ 30 ملکاں دے نمائندیں دی شرکت پاکستان کیتے ہک وݙی سفارتی کامیابی اے جو عالمی سطح تے پاکستان دے اہم کردار دا اعتراف اے۔اے کانفرنس وزارت داخلہ اقوام متحدہ دے دفتر انسداد منشیات و جرائم (یو این او ڈی سی) اَتے بین الاقوامی ادارہ مہاجرت (آئی او ایم) دے سانجھ نال اَتے بین الاقوامی شراکت داری دے تحت منعقد کیتی ڳئی۔ کانفرنس دے دوران انسانی سمگلنگ دے خلاف مؤثر اقدامات، بہترین تجویزاں اَتے عالمی سطح تے اپنائی ویندیاں حکمت عملیاں دا تبادلہ وی کیتا ڳیا۔ بین الاقوامی شراکت داراں انسانی سمگلنگ دے خلاف پاکستان دیاں کوششاں دی تعریف کریندے تعاون جاری رکھݨ دا یقین ݙیوائے۔ کانفرنس توں پہلے وزیرمملکت داخلہ طلال چوہدری اقوام متحدہ دے دفتر انسداد منشیات و جرائم دے علاقائی نمائندہ افغانستان، وسطی ایشیا، ایران اَتے پاکستان ڈاکٹر اولیور اسٹولپ نال ملاقات وی کیتی جیں اچ انسانی اسمگلنگ مکاوݨ ، ادارہ جاتی اصلاحات اَتے مستقبل دے لائحہ عمل تے ڳالھ مہاڑ کیتی ڳئی