خیبرپختونخوا حکومت دی توجہ صوبے دے عوام دی چنڳائی دی بجائے دھرنے تے ہے، جے اے دھرنے ݙیندے رہیے تاں صوبے تے توجہ کَون ݙیسی؟ عطاء اللہ تارڑ

نوشہرہ ۔ 28 نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو خیبرپختونخوا حکومت دی توجہ صوبے دے عوام دی فلاح و بہبود دی بجائے دھرنے تے ہے، جے اے دھرنے ݙیندے رہیے تاں صوبے تے توجہ کَون ݙیسی؟ خیبرپختونخوا حکومت غیر قانونی مطالبہ کریندی پئی اے، بانی پی ٹی آئی میگا کرپشن کیس اچ سزا یافتہ ہِن، کݙاہیں کہیں سیاسی قیدی کوں اتنیاں مراعات حاصل کائنی تھیاں جتنیاں بانی پی ٹی آئی کوں حاصل ہِن، کُوڑے بیانیے کوں شکست تھیسی۔اختیار ولی خان دی والدہ دی وفات تے تعزیت دے بعد میڈیا نال ڳالھ مہاڑ کریندے وفاقی وزیر اطلاعات آکھیا جو اختیار ولی خان پارٹی دا اوکھے ویلھے ساتھ ݙتا، انہاں اوکھےے دور اچ صوبائی سیٹ جِتی، خیبرپختونخوا اچ انہاں دی سنڄاݨ اے، انہاں ہمیشہ اصولاں دی سیاست کیتی اے، ایم ایس ایف دے ویلھے توں او مسلم لیگ (ن) نال وابستہ ہِن، او میڈیا اچ پارٹی دی توانا آواز ہِن، انہاں نہ صرف مُلکی پالیسی دے حوالے نال آپݨا کردار ادا کیتا بلکہ مُلکی سالمیت اَتے مُلکی مفاد کوں ہمیشہ اڳُوں رکھ تے ڳالھ کیتی۔وفاقی وزیراطلاعات آکھیا جو خیبرپختونخوا حکومت صوبے اچ لوکاں دی فلاح و بہبود دی بجائے دھرنے تے توجہ ݙیندی پئی اے، جے اے دھرنے ݙیندے رہیے تاں صوبے تے توجہ کَون ݙیسی؟ خیبرپختونخوا حکومت گورننس، صحت دے نظام کوں بہتر کرن، نویں سڑکاں اَتے چنڳیاں پالیسیاں دی بجائے احتجاج تے توجہ مرکوز کر رکھی اے، وزارت اعلیٰ دا منصب وݙی باری ذمہ واری ہُوندے ، ایں منصب تے رہݨ آلا شخص صوبے اچ نہ رہے اَتے زیادہ ویلھا جیل دی کندھ دے ٻاہر کھڑا ہووے تاں صوبے دی تعمیر و ترقی تے کَون توجہ ݙیسی، اِے رویہ ٻہوں افسوسناک اَتے قابل مذمت اے۔انہاں آکھیا جو خیبرپختونخوا حکومت کوں امن و امان اَتے دہشت گردی مکاوݨ تے توجہ ݙیوݨی چاہیدی اے۔ وفاق دہشت گردی دے خلاف اَتے امن و امان قائم کرݨ کیتے رَل تے کم کرݨ دی ڳالھ کیتی پر انہاں دی اوں سِمَت توجہ کائنی، خیبرپختونخوا حکومت غیر قانونی مطالبہ کریندی پئی اے جو انہاں دے لیڈر نال ملاقات کروائی ونڄے، جیل مینوئل دے خلاف مطالبات کیتے ویندے پِئن، کیا جیل رولز ول ول ملاقات دی اجازت ݙیندِن؟ تساں آپݨے صوبے دی خدمت کرو، تعلیم، صحت اَتے لاء اینڈ آرڈر تے فوکس کرو پر تہاکوں توفیق کائنی، تساں چار چار گھنٹے دھرنا ݙیندے او، اِے صرف ٹک ٹاک دی حکومت اے جیڑھے لائکس کیتے کم کریندے پئن۔وفاقی وزیرعطاء اللہ تارڑ آکھیا جو افسوسناک ڳالھ اے جو ہک غیر قانونی ڈیمانڈ رکھی ڳئی اے جو لیڈر نال ملاقات کروائی ونڄے، تہاݙے لیڈر مُلک کیتے کوئی کم کائنی کیتا، جݙاں او وزیراعظم ہئی تاں معیشت تاں انہاں ٻوڑ ݙتی، ایں دے نال پاکستان دے دوست ملکاں نال تعلقات وی خراب کروائے، بانی پی ٹی آئی میگا کرپشن کیس اچ سزا یافتہ ہِن، بانی پی ٹی آئی کوں 190 ملین پاؤنڈ دے میگا کرپشن کیس اچ سزا تھئی، ایں دا جواب انہاں کنے کائنی، بانی پی ٹی آئی سیاسی قیدی کائناں بلکہ کرپشن کیس اچ سزا یافتہ مجرم ہِن، ریاست مدینہ دا ناں گھن تے سیاست اچ مذہب کوں استعمال کرݨ دی کوشش کیتی ڳئی۔عطاء اللہ تارڑ آکھیا جو بانی پی ٹی آئی القادر یونیورسٹی اچ ٻہوں وݙا ڈاکہ ماریے، کݙاہیں وی کہیں سیاسی قیدی کوں جیل اچ اتنیاں مراعات حاصل کائنی تھیاں جتنیاں بانی پی ٹی آئی کوں حاصل ہِن، او وی وی آئی پی قیدی ہِن، دعوے نال آکھداں جو کہیں وی سیاسی قیدی کوں اتنیاں سہولتاں میسر کائنی تھیاں جتنیاں بانی پی ٹی آئی کوں میسر ہِن، ول انہاں دی غیر قانونی ڈیمانڈ اے جو اساݙی ملاقات کرائی ونڄے، تہاݙی ملاقات کائنی تھی سڳدی کیوں جو اِے غیر قانونی ڈیمانڈ اے، جیل مینوئل اَتے قانون اچ کتھاں گنجائش اے جو تساں ملاقات کریسو تاں ہی صوبے دے معاملات چلیسو۔پی ٹی آئی دی رہنما مبینہ طور تے انڈین میڈیا تے افغانستان دے میڈیا کوں ایکٹو کیتا اَتے افواہیں کھنڈائیاں ڳئیاں، بھارت اَتے افغان سرزمین توں پاکستان دے خلاف منفی پروپیگنڈا کیتا ویندا پئے، بانی پی ٹی آئی نال ملاقات کیتے سوشل میڈیا تے ہتھکنڈے استعمال کیتے ویندے پئن۔ پی ٹی آئی دے سوشل میڈیا اکاؤنٹ ہولڈرز ہݨ بھارتی سوشل میڈیا ہینڈلرز دی حمایت گھندے پئن، سوشل میڈیا تے لوکاں کوں بے وقوف بݨایا ویندا پئے اِے صرف اَتے صرف انہاں دا پریشر پاوݨ اَتے ملاقات کرݨ دے ہتھکنڈے ہِن، مُلک اچ قانون اَتے آئین موجود اے جو وی ہوسی، آئین و قانون موجب ہوسی۔انہاں آکھیا جو خیبرپختونخوا غیور عوام دا صوبہ اے، او پاکستان نال محبت کرݨ آلے لوک ہِن، پختوناں ایں مُلک دی سالمیت کیتے وݙیاں قربانیاں ݙتن، صوبائی حکومت انہاں دی فلاح و بہبود کیتے کم کرے اَتے انہاں دا حق ادا کرے، صوبے دے معاملات اچ بہتری گھن آوے پر اِے ٹک ٹاک حکومت اے اَتے بزدار پلس گھن آیا ڳئے جیں کوں کجھ کائنی پتہ، او ہݨ جیل اچ ملاقات کیتے ڈرامے اَتے ڈھونگ رچیندا پئے، انہاں دی پارٹی انڈیا اَتے افغانستان دے میڈیا کوں استعمال کریندی پئی اے، انٹرنیشنل میڈیا کوں وی پتہ ہووݨا چاہیدے جو بانی پی ٹی آئی میگا کرپشن کیس اچ سزا یافتہ ہِن اَتے قید ہِن، انہاں کنے عدالت اچ کوئی دفاع کائنی، انہاں دے وکلاء تاریخ تے تاریخ گھندن، فارن فنڈنگ توشہ خانہ توں گھن تے 190 ملین پاؤنڈ تئیں انہاں کنے کوئی جواب کائنی، اڄ اے آکھدن جو سیاسی قیدی اے، سیاسی قیدی ایہو جیہے ہوندن جنہاں مُلک اچ ایہو جیہا وݙا ڈاکہ ماریے؟وفاقی وزیر اطلاعات آکھیا جو اساں سمجھدے ہاسے جو بزدار ہک نااہل وزیراعلیٰ ہئی پر موجودہ وزیراعلیٰ خیبرپختونخوا بزدار پلس نِکلیا، پاکستان دا میڈیا اَتے سوشل میڈیا پاکستان دے نال کھڑے، پی ٹی آئی دے سوشل میڈیا اکاؤنٹ ہولڈرز ہݨ بھارتی سوشل میڈیا ہینڈلرز دی حمایت گھندے پئن۔ وفاقی وزیر اطلاعات آکھیا جو اے آکھدن جو فلاں کائناں تاں پاکستان کائناں، ایہو جیہے نعرے تے انہاں کوں شرم آوݨی چاہیدی اے، اساں تاں آکھدے ہاسے جو پاکستان کیتے اساݙی جان وی حاضر اے، اِے انڈین اَتے افغانستان میڈیا استعمال کرگھنن انہاں دی ڈیمانڈ غیر قانونی اے اَتے ایں تے عمل کائنی کیتا ونڄ سڳدا۔ہک سوال دے جواب اچ وفاقی وزیر اطلاعات آکھیا جو مُلک توں ٻاہر بیٹھے ٻہوں سارے لوک آپݨے ایجنڈے تے کم کریندے پئن، او چاہندن مُلک اچ انتشار کھنڈے، پی ٹی آئی دی رہنما کوں غلط ٹویٹ تے نوٹس بھجوایا، این سی سی آئی کوں درخواست ݙتی، انہاں او ٹویٹ ڈیلیٹ کیتی، مُلک دشمنی، کُوڑ بولݨ، حقائق دے خلاف تصویراں لاوݨا اَتے بعد اچ معافی منگ گھنݨا انہاں دا وتیرہ بݨ چُکیے، مُلک دشمنی جیں وی کیتی اے انہاں کوں اے صلہ مِلدے جو اڄ جیل اچ بَند شخص بھوڳیندا پئے ۔ وزیراطلاعات آکھیا جو پاکستانی سوشل میڈیا بھارت نال جنگ دے دوران اہم کردار ادا کیتا اَتے پاکستان دے بیانیے کوں اڳُوں گھن تے چَلیے، کُوڑ دے بیانیے کوں شکست تھیسی۔ ہک ٻئے سوال دے جواب اچ وزیر اطلاعات آکھیا جو بانی پی ٹی آئی کوں جیل اچ ورزش دا سامان اَتے بہترین خوراک میسر اے۔ انہاں آکھیا جو وزیراعلیٰ دا کم صوبے کوں بَند کرݨا کائنی بلکہ عوام دی خدمت کرݨا ہوندے، وزیراعظم محمد شہباز شریف ݙاہ سال اچ پنجاب دا نقشہ بدال ݙتا،جے پی ٹی آئی حکومت ایویں ویلھا ضائع کیتا اَتے ایہو کم کریندی رہی تاں لوک ہک ݙینھ انہاں دا گریبان وٹھیسن