افغانستان نال جنگ بندی برقرار نئیں رہی، سکیورٹی چیلنجز نال سنجیدگی نال نِمٹیا ویسی، ترجمان دفتر خارجہ

اسلام آباد۔ 28 نومبر(اے پی پی) پاکستان آکھیے جو افغانستان نال جنگ بندی برقرار نئیں رہی کیوں جو افغان سرزمین کوں استعمال کریندے ہوئیں پاکستان اچ دہشت گرد تنظیماں دے حملے جاری ہِن، جنگ بندی مفاہمت دا مقصد خالصتاً اینڄھے حملیاں کوں روکݨا ہا۔ دفتر خارجہ دے ترجمان طاہر حسین اندرابی جمعہ کوں پریس بریفنگ اچ ذرائع ابلاغ کوں ݙسایا جو پاکستان افغانستان جنگ بندی دا مطلب روایتی جنگ بندی نئیں جیڑھی کہیں جنگ یا تنازعہ دی صورتحال دے بعد نافذ کیتی ڳئی ہووے، ایںدا مطلب اے ہے جو افغان حمایت یافتہ دہشت گرد پراکسی پاکستان اچ کوئی دہشت گرد حملہ نا کریسن۔ انہاں آکھیا جو ایں جنگ بندی دے بعد وݙے دہشت گرد حملے تھئن، ݙتھا ونڄے تاں جنگ بندی برقرار نئیں رہی کیوں جو جنگ بندی ٹی ٹی پی، ایف اے کے اَتے افغان شہریاں ولوں افغان سرزمین دا استعمال پاکستان دے خلاف دہشت گردانہ حملے بند کرݨ دے بارے ہئی۔ ترجمان آکھیا جیکر افغان شہری حملے کریندے پئِن جیویں جو انہاں اسلام آباد اَتے ٻنھاں جاہیں تے حملے کیتن تاں اساں جنگ بندی بارے زیادہ پر امید نئیں تھی سڳدے۔ افغانستان توں کہیں وی حملے دے خطرے انہاں آکھیا جو پاکستانی سکیورٹی فورسز پُوری طرح ہوشیار ہِن۔ انہاں آکھیا جو اساݙی فوجی تیاری مضبوط اے، ساکوں جنہاں سکیورٹی چیلنجز دا سامݨا اے انہاں نال سنجیدگی نال نِمٹیا ویسی جیںدی پاکستان اہلیت رکھدے۔ ترجمان سعودی عرب ولوں کہیں وی ثالثی دی پیشکش بارے انہاں آکھیا جو او انڄھی کہیں ٹھوس پیشکش توں واقف کائنی ول وی اساں ثالثی دا خیرمقدم کریسوں۔ ترجمان افغانستان توں دہشت گردی دا شکار تھیوݨ آلے ملکاں وچال ہَم آہنگی خاص طور تے تاجکستان اچ حملے بارے آکھیا جو انہاں سارے ملکاں کولو انہاں مسئلیاں تے ڳالھ مہاڑ اَتے ہَم آہنگی دا ہک مضبوط طریقہ کار اے، ایں کیتے علاقائی ملک باخبر ہیں۔ انہاں آکھیا جو پاکستان سارے ݙو طرفہ اَتے کثیر جہتی فورمز تے انہاں رابطیاں تے عمل کریندا پئے اَتے آوݨ آلے ݙین٘ہہ اچ اینڄھی مشترکہ کوآرڈینیشن کوں ودھاوݨ دی لوڑھ اے۔ افغان طالبان دے ایں بیان تے جیںدے اچ تاجکستان اچ حملے کیتے ”کُجھ عناصر“ تے الزام لایا ڳئے، طاہر حسین اندرابی آکھیا جو اساں وی ایہو آہدے ہیں جو انہاں عناصر کوں کنٹرول کرو اَتے اے عناصر افغان سرزمین تے موجود ہِن۔ ایں توں پہلے ترجمان دفتر خارجہ واشنگٹن اچ فائرنگ دے واقعے دی مذمت کیتی اَتے اوکوں دہشت گردی دا بھیانک فعل قرار ݙیتا۔ انہاں پاکستان ولوں امریکہ نال یکجہتی کیتی۔ ترجمان آکھیا جو پاکستان ݙو دہاکیاں توں افغانستان نال واضح تعلق نال اینڄھے دہشت گردی واقعیاں کوں برداشت کیتے، اے واقعہ دنیا بھر اچ دہشت گردی دے پریشان کُن ولا اُبھرݨ دا اشارہ ݙیندے۔ انہاں تاجکستان اچ ترائے چینی شہریاں دے قتل دی وی مذمت کیتی اَتے زور ݙتے جو افغان سرزمین کوں دہشت گردی کیتے استعمال نئیں تھیوݨا چاہیدا۔ ترجمان طالبان دی سرپرستی اچ افغانستان توں کم کرݨ آلے گروہاں دے خلاف ٹھوس اَتے قابل تصدیق کارروائی دا وی مطالبہ کیتے۔ انہاں ایں ڳالھ دا اعادہ کیتا جو پاکستان اقوام متحدہ دی سلامتی کونسل دیاں متعلقہ قرارداداں اَتے کشمیری عوام دیاں امنگاں دے مطابق تنازعہ جموں و کشمیر دے پرامن، منصفانہ اَتے پائیدار حل کیتے پُرعزم اے اَتے او کشمیری عوام دی منصفانہ جدوجہد اچ انہاں دی اخلاقی، سیاسی اَتے سفارتی حمایت جاری رکھیسی۔