روسی میڈیا دے اعلیٰ سطح وفد دا اے پی پی دا دورہ، اے پی پی اَتے سپوتنک نیوز ایجنسی وچال میڈیا تعاون دے معاہدے تے دستخط

اسلام آباد، 28 نومبر (اے پی پی) روسی میڈیا دے ہک اعلیٰ سطح وفد  “روسیا سیگودینیا” دے ڈائریکٹر بین الاقوامی تعاون ویسیلی پشکوو دی اڳواݨی وچ ایسوسی ایٹڈ پریس آف پاکستان (اے پی پی) دے ہیڈ کوارٹر دا دورہ کیتا۔ اے وفد، روس دے سفارت خانے دے پریس اتاشی ایگور کولیسنیکوف دے وفد کوں اے پی پی دے منیجنگ ڈائریکٹر محمد عاصم کھچی اَتے ایگزیکٹو ڈائریکٹر جنرل خارجی تشہیر وِنگ دی محترمہ رابعہ عادل استقبال کیتا۔ ملاقات اچ ایم ڈی اے پی پی محمد عاصم کھچی وفد کوں اے پی پی دے پیشہ ورانہ کم کار تے بریفنگ ݙِتی اَتے ہک دستاویزی فلم ݙکھائی جیہڑی اے پی پی دے کم کوں اڳونہا کریندے اے۔ ایں موقع تے ݙوہاں فریقاں ہک تاریخی مفاہمت دی یادداشت (ایم او یو) اُتے سائن کیتے جیڑھا اے پی پی اَتے سپوتنک نیوز ایجنسی وچال میڈیا دے شعبے اچ تعاون دی راہ کݙھیندے۔ وفد دے اڳواݨ ویسیلی پشکوو اے پی پی دے کم کاراں اچ ٻہوں دلچسپی ݙکھائی اَتے ݙوہاں ملکاں دے وچال میڈیا دے شعبے اچ تعاون ودھاوݨ دا عزم دوہرایا جیندے اچ نجی میڈیا دا شعبہ وی شامل اے، تاں جو ݙوہاں ملکاں وچال ودھ فائدہ مند ساڄھے داری تھی سڳے۔

انہاں ریڈیو، موسیقی، ثقافت، آرٹ، ادب، اَتے لوکاں توں لوکاں دے رابطے اچ تعاون دے امکان کوں وی اڳونہا کیتے۔ انہاں آکھیا جو پاکستان ہک ٻہوں مہمان نواز ملک اے، اَتے اِتھاں ہووݨ ہک وݙی خوشی دی ڳالھ اے۔ ایم ڈی اے پی پی عاصم کھچی وفد کُوں متعلقہ شعبیاں اچ اے پی پی دے پورے تعاون دی یقین دہانی کرائی اَتے میڈیا دے شعبے اچ اڳو تے تعاون ودھاوݨ دا عہد کیتا۔ ملاقات اچ تعاون دے ممکنہ شعبیاں تے ڳالھ مہاڑ کیتی ڳئی، جیندے اچ وزارت اطلاعات دے حکام اَتے نجی میڈیا دے نمائندے شریک ہن۔ اے دورہ پاکستان اَتے روس وچال میڈیا دے تعلقات کُوں مضبوط کرݨ اچ ہک اہم سنگ میل اے، جیندے اچ ݙوہاں پاسوں میڈیا اَتے ایں بارے تعاون ودھاوݨ دے عزم کوں دوہرایا۔