سپریم کورٹ دے فیصلیں موجب سزا یافتہ بندہ سیاسی فیصلیں دا مجاز نی ہوندا، جِتھاں قانونی کارروائی دی لوڑھ ہووے اُتھاں مُلکی قوانین موجب اقدامات کیتے ویسن۔ وفاقی وزیر قانون اعظم نذیر تارڑ دی وفاقی وزیر اطلاعات عطااللہ تارڑ دے نال پریس کانفرنس

اسلام آباد۔ 4 دسمبر (اے پی پی) وفاقی وزیر قانون و انصاف اعظم نذیر تارڑ آکھیے جو سپریم کورٹ دے فیصلیں موجب سزا یافتہ بندہ سیاسی فیصلیں دا مجاز نی ہوندا، جِتھاں قانونی کارروائی دی لوڑھ ہووے اُتھاں مُلکی قوانین موجب اقدامات کیتے ویسن۔ اے ڳالھ انہاں وفاقی وزیر اطلاعات عطااللہ تارڑ دے نال پریس کانفرنس توں خطاب کریندے آکھی۔ وفاقی وزیر قانون اعظم نذیر تارڑ مُلک دی موجودہ سیاسی و آئینی صورتحال، جیل ملاقاتاں دے قواعد، دفاعی تعیناتیاں اَتے تحریک انصاف دی اڄوکی پالیسیاں متعلق امور تے تفصیلی ڳالھ مہاڑ کیتی۔وفاقی وزیر قانون آکھیا جو سوشل میڈیا پلیٹ فارمز آپݨیاں بین الاقوامی پالیسیاں دے تابع ہِن اَتے حکومت غیر ضروری یا غیر سنجیدہ بیاناں توں پرہیز کریندی اے۔ انہاں آکھیا جو جِتھاں قانونی کارروائی دی لوڑھ ہووے، اُتھاں مُلکی قوانین موجب اقدامات کیتے ویسن۔ وزیر قانون وزیراعلیٰ خیبر پختونخوا ولوں بانی تحریک انصاف نال ملاقات دی خواہش کوں غیر آئینی قرار ݙیندے آکھیا جو سپریم کورٹ دے فیصلیں موجب کوئی سزا یافتہ بندہ سیاسی فیصلیں دا مجاز نی ہوندا۔ انہاں آکھیا جو ماضی اچ ایں نوعیت دے معاملیں اچ امیدواراں دے ٹکٹس وی کالعدم قرار ݙتے ڳئے جنہاں کوں بعد اچ آزاد امیدوار قرار ݙتا ڳیا ہئی۔اعظم نذیر تارڑ جیل قوانین دی وضاحت کریندے آکھیا جو قیدی سیاسی ڳالھ مہاڑ کرݨ دا مجاز نی اَتے ملاقاتاں سپرنٹنڈنٹ جیل دی نگرانی اچ تھیندن۔ انہاں آکھیا جو ملاقات دی تفصیلات عام نی کیتیاں ونڄ سڳدیاں اَتے جے سپرنٹنڈنٹ کوں ایہو جیہا خطرہ ہووے جو ڳالھ مہاڑ امن و امان تے اثرانداز تھی سڳدی اے تاں او ملاقات روک ݙیوݨ دا اختیار رکھیندے۔ انہاں آکھیا جو وکیل اَتے موکل دی ڳالھ مہاڑ ذاتی نوعیت دی ہوندی اے پر سیاسی ایجنڈا تشکیل ݙیوݨ دی اجازت کہیں کوں نی ݙتی ونڄ سڳدی۔ہک سوال دے جواب اچ وفاقی وزیر دفاعی تعیناتیاں متعلق قیاس آرائیاں کوں بے بنیاد قرار ݙیندے آکھیا جو گزریل سال تھیوݨ آلی اصلاحات دے تحت اعلیٰ عسکری عہدیں دی سروس دی مدت تِرائے سالاں توں ودھا تے پنج سال کرݙتی ڳئی اے اتے تقرری دی گنجائش وی موجود اے۔ انہاں آکھیا جو ساریاں تقرریاں مکمل طور تے آئینی و قانونی طریقہ کار دے مطابق کیتیاں ویسن اَتے ایں حوالے نال کوئی ابہام موجود کائنی۔اعظم نذیر تارڑ آکھیا جو پنجاب اَتے وفاق ہکو نظام دا حصہ ہِن اَتے ݙوہیں حکومتاں آپݨے سیاسی قیادت توں رہنمائی گھندن۔ انہاں آکھیا وفاق اَتے صوبے دے درمیان ہم آہنگی موجود اے۔ انہاں آکھیا جو مریم نواز اَتے نواز شریف دی جیل اچ ملاقاتاں دے دوران سختیاں تحریک انصاف دی سابقہ حکومت آپ عائد کیتن اَتے قانونی ملاقات دے حق دے حصول اچ وی تاخیر کیتی ڳئی ہئی جیں دے باوجود عدالت ایں شرط دے نال اجازت ݙتی ہئی جو ملاقات دیاں تفصیلات میڈیا تے نہ ݙتیاں ونڄن۔وفاقی وزیر تحریک انصاف دی سیاسی حکمت عملی تے ڳالھ کریندے آکھیا جو پارٹی آپ اسمبلیاں بھنیاں ، آپ انتخابات دا بائیکاٹ کیتا اَتے آپ ہی اندرلی سطح تے غلطیاں کیتیاں۔ انہاں آکھیا جو سپریم کورٹ ولوں تشکیل ݙتی ڳئی مذاکراتی کمیٹی اچ حکومت اَتے اپوزیشن دے درمیان الیکشن دی تاریخ تے اتفاق تھی چکیا ہئی پر اوں کوں اچانک ویٹو کرتے مذاکراتی عمل کوں متاثر کیتا ڳیا۔ انہاں آکھیا جو قانون ساریں کیتے ہکوجیہا اے اَتے اوں دی خلاف ورزی تے ریاست کارروائی کرݨ دی پابند اے۔ انہاں آکھیا جو جیل حکام قانون دے تحت ہی اقدامات کریندے پِن اَتے کوئی بندہ کتنا ہی وݙا کیوں نہ ہووے، آئین دے آرٹیکل 25 دے تحت سَارے برابر ہِن۔