صدر مملکت آصف علی زرداری دا تھائی لینڈ دے قومی ݙینھ تے پیغام

اسلام آباد۔ 5 دسمبر (اے پی پی) صدر مملکت آصف علی زرداری تھائی لینڈ دے قومی ݙینھ تے آپݨے پیغام اچ آکھیے جو میں تھائی لینڈ دے جنوبی صوبیں اچ اڄوکی تباہ کن چھل توں بعد ایں اوکھے ویلھے اچ تھائی لینڈ دی حکومت اَتے عوام دے نال پاکستان دی ہمدردی اَتے یکجہتی دا اظہار کرݨ چاہندں۔ ایوان صدر دے پریس ونگ توں جاری بیان موجب آپݨے پیغام اچ صدر مملکت آصف علی زرداری آکھیے جو قیمتی جانی ضیان اَتے ݙاہ لکھ توں ودھ خانداناں تے پووݨ آلا اثر ایں ڳالھ دی یاد ݙیوائی اے جو موسمیاتی تبدیلی دے چیلنجز توں نبڑݨ کیتے علاقائی اَتے عالمی تعاون دی فوری لوڑھ اے۔ انہاں آکھیا جو جنوبی اَتے جنوب مشرقی ایشیا دنیا دے ٻئے کئی خطیں دے مقابلے اچ موسمیاتی تبدیلی توں زیادہ تکڑا متاثر تھیندا پئے، پاکستان وی موسمیاتی تبدیلی دے ودھدے اثرات دا سامݨا کریندا پئے اَتے ایں نال نبڑݨ دی صلاحیت اچ ودھارے کیتے تھائی لینڈ اَتے خطے دے ٻئے مُلکاں دے نال رَل  تے کم کرݨ کیتے پُرعزم اے۔صدر مملکت آکھیا جو میں تھائی لینڈ دی حکومت اَتے عوام کوں انہاں دے قومی ݙینھ تے دلوں مبارخ پیش کرینداں، پاکستان اَتے تھائی لینڈ کئی ݙہاکیں توں آپسی احترام اَتے سانجھے مفادات دی بُنیاد تے دوستانہ تعلقات رکھیندن۔ پاکستان تھائی لینڈ دے نال آپݨی پراݨی وابستگی کوں قدر دی نظر نال ݙیکھدے اَتے آپسی مفاد دے سارے شعبیں اچ تعاون ودھاوݨ کیتے پُرعزم اے، علاقائی اَتے عالمی فورمز تے اساݙی شمولیت ٻہوں سارے امور تے سانجھی سمجھ دی عکاسی کریندی اے۔ انہاں آکھیا جو اساں خطے اچ امن، ترقی اَتے استحکام دے ودھارے کیتے تھائی لینڈ دیاں کوششاں دی قدر کریندوں ، پاکستان مذاکرات، اقتصادی رابطیں اَتے عوامی سطح تے رابطیں کوں ودھاوݨ اچ تھائی لینڈ دے تعمیری کردار دی تعریف کریندے ، اساں خطے اچ ہم آہنگی اَتے اجتماعی فلاح کیتے جاری اقدامات دی حمایت جاری رکھیسوں۔ صدر مملکت آصف علی زرداری آکھیا جو اڄ تھائی لینڈ دے قومی ݙینھ تے پاکستان دے عوام تھائی قوم دے نال پائیدار امن، خوشحالی اَتے ترقی دیاں نیک خواہشات اچ شریک ہاں، پاکستان سانجھیاں ترجیحات اَتے مضبوط دوستی دی بُنیاد تے ہک بہتر مستقبل دی تعمیر کیتے تھائی لینڈ دے نال مزید نیڑے تعاون چاہندے