صدر مملکت آصف علی زرداری دا فن لینڈ دے 108ویں یوم آزادی دے موقع تے پیغام

اسلام آباد۔ 5 دسمبر (اے پی پی) صدر مملکت آصف علی زرداری فن لینڈ دے 108ویں یوم آزادی دے موقع تے صدر الیگزینڈر اسٹب دے ناں آپݨے مبارخ دے پیغام اچ ݙوہیں مُلکاں وچال دوستی، تعاون اَتے آپسی تعلقات دے ودھارے دے عزم دا اعادہ کیتے۔ ایوان صدر دے پریس ونگ توں جاری بیان موجب صدر مملکت آصف علی زرداری آپݨے پیغام اچ آکھیا جو او حکومت پاکستان دے عوام اَتے آپݨے ولوں صدر اسٹب اَتے فن لینڈ دے عوام کوں یوم آزادی دیاں خوشی بھریاں تقریباں تے دلوں مبارخ پیش کرینداں۔ انہاں آکھیا جو آزادی دے بعد توں فن لینڈ تعلیم، ٹیکنالوجی، نویں جدت، تحقیق، بایوٹیکنالوجی اَتے جنگلات دے تحفظ سودھے ٻہوں سارے شعبیں اچ نمایاں ترقی حاصل کیتی اے جݙاں جو عالمی خوشحالی انڈیکس اچ لگاتار اَٹھ سال پہلے پوزیشن حاصل کرݨ فن لینڈ دے عوام دی صلاحیّت اَتے تخلیقی طاقتاں دا ثبوت اے۔ انہاں آکھیا جو پاکستان فن لینڈ دے نال آپݨے تعلقات کوں ٻہوں قدر دی نظر نال ݙیکھدے اَتے ݙوہیں مُلک اہم بین الاقوامی امور تے ہکوجیہا موقف رکھیندن۔ انہاں مزید آکھیا جو جمہوریت دا ودھارا اَتے معاشی آزادی ݙوہیں مُلکاں دیاں سانجھیاں اقدار ہِن۔ انہاں کاروباری سرگرمیاں دے ودھارے، تعلیم، ماحولیات، ڈیجیٹلائزیشن، کان کنی اَتے ٹیلی کمیونی کیشنز دے شعبیں اچ تعاون دے وسیع امکانات دی نشاندہی کریندے آکھیا جو ݙوہیں مُلکاں وچال سیاسی، تجارتی اَتے عوامی رابطیں دے ودھارے کیتے پُرعزم اے۔ انہاں آکھیا جو پاکستان اَتے فن لینڈ دے دوستانہ تعلقات مزید مضبوط تھیسن