سپیکر قومی اسمبلی سردار ایاز صادق دا پارلیمنٹ لاجز دا اچانک دورہ

اسلام آباد۔ 5 دسمبر (اے پی پی) سپیکر قومی اسمبلی سردار ایاز صادق سویرے پارلیمنٹ لاجز دا اچانک دورہ کیتا اَتے زیرِ تعمیر 104 اضافی فیملی سوئٹس اَتے سرونٹ کوارٹرز دے تعمیری کم دا جائزہ ڳھدا۔ قومی اسمبلی سیکرٹریٹ موجب اضافی فیملی سوئٹس اَتے سرونٹ کوارٹرز دا منصوبہ کئی سالاں توں لَٹکیا ہویا ہئی، کئی سالاں توں زیر التوا منصوبے تے کم دا آغاز سپیکر سردار ایاز صادق دا خصوصی اقدام اے۔ سردار ایاز صادق سپیکر دا عہدہ سنبھالݨ توں بعد ایں منصوبے کیتے وزیراعظم میاں محمد شہباز شریف توں فنڈ مختص کرݨ دی درخواست کیتی جیں تے وزیراعظم میاں محمد شہباز شریف ایں منصوبے کیتے فنڈز جاری کرݨ دی ہدایت کیتی۔ وزیراعظم دی ہدایت تے وزارت خزانہ اضافی فیملی سویٹس اَتے سرونٹ کوارٹرز کیتے فنڈز جاری کیتے۔ پارلیمنٹ لاجز دے دورے دے دوران سپیکر سردار ایاز صادق منصوبے کوں جلدی مکمل کرݨ اَتے کم دے معیار تے کوئی سمجھوتہ نہ کرݨ دی ہدایت کیتی۔ ایں موقع تے سپیکر آکھیا جو اضافی فیملی سوئٹس منصوبے اچ تاخیر پاروں اراکینِ پارلیمنٹ کوں رہائش دے سلسلے اچ اوکھ دا سامݨا اے ۔ سپیکر سردار ایاز صادق کوں سی ڈی اے ولوں اضافی فیملی سوئٹس اَتے سرونٹ کوارٹرز منصوبے تے تفصیلی بریفنگ ݙتی ڳئی۔ سی ڈی اے سپیکر قومی اسمبلی کوں منصوبے کوں جون 2026ء تئیں مکمل کرݨ دا یقین ݙیوائے۔ یاد رہے جو اے منصوبہ 2011 اچ شروع تھیا اَتے 2013 اچ مکمل تھیوݨا ہئی پر کُجھ وجوہات دی بناء تے منصوبہ کئی سال تاخیر دا شکار رہیا۔ سپیکر سردار ایاز صادق دیاں خصوصی ہدایتاں اَتے نگرانی نال منصوبہ چھیکڑی مرحلیں اچ داخل تھی ڳئے۔