غیر قانونی امیگریشن بارے اساݙی واضح پالیسی اے، پاک امریکا تعلقات مضبوط بݨاوݨ کیتے پُرعزم ہیسے، انسداد منشیات کیتے امریکی تکنیکی مدد دا خیر مقدم کریسوں، وزیر داخلہ محسن نقوی

اسلام آباد۔ 6 دسمبر (اے پی پی) وفاقی وزیر داخلہ محسن نقوی آکھیا جو غیر قانونی امیگریشن بارے اساݙی واضح پالیسی اے، پاک امریکا دے تعلقات کوں مزید مضبوط بݨاوݨ کیتے پُرعزم ہِیسے، انسداد منشیات کیتے امریکی تکنیکی مدد دا خیر مقدم کریسوں۔ وزیراعظم محمد شہباز شریف دی ہدایت تے نیشنل نارکاٹکس کوآرڈینیشن سینٹر جلدی قائم کیتا ویسی۔ وزارت داخلہ توں جاری بیان موجب وزیر داخلہ اے ڳالھیں قائم مقام امریکی سفیر نیٹلی بیکر نال ملاقات وِچ کیتیاں۔ ایں موقع تے انسداد منشیات اَتے سکیورٹی دے شعبے وِچ ݙُو طرفہ تعاون ودھاوݨ تے ڳالھ مہاڑ تھئی، غیر قانونی امیگریشن روکݨ کیتے رَل تے اقدامات کرݨ، منشیات روکݨ اَتے انٹیلیجنس سانجھا کرݨ کیتے تعاون ودھاوݨ تے اتفاق کیتا ڳیا۔ امریکی سفیر انسداد منشیات اَتے غیر قانونی امیگریشن روکݨ کیتے ہر ممکن تکنیکی مدد دی پیشکش کیتی۔ وزیر داخلہ محسن نقوی آکھیا جو غیر قانونی امیگریشن دے حوالے نال اساݙی واضح پالیسی اے، ایئرپورٹس تے ہر ممکن حد تئیں منشیات دے کیسز دی نشاندہی پہلی ترجیح اے۔ مُلک دے سارے ایئرپورٹس تے جدید ترین سکیننگ مشیناں لاتیاں ویندیاں پئن۔ محسن نقوی آکھیا جو انسدادِ منشیات کیتے زیرو ٹالرنس پالیسی تے سختی نال عمل کریندے پیوں ، اڄ وی افغانستان توں منشیات ڈھیر ملکاں وِچ پُڄدی پئی اے اَتے نینگر نسل کوں تباہ کریندی پئی اے۔ وزیر داخلہ آکھیا جو انسداد منشیات کیتے امریکا دی تکنیکی مدد دا خیر مقدم کریسوں۔ پاک امریکا تعلقات خطے وِچ امن و استحکام ودھاوݨ کیتے ٻہوں اہم ہِن، اساں اِنہاں پراݨے تعلقات کوں مزید مضبوط بݨاوݨ کیتے پُرعزم ہِیسے محسن نقوی آکھیا جو وزیراعظم محمد شہباز شریف دی ہدایت تے نیشنل نارکاٹکس کوآرڈینیشن سینٹر جلدی قائم کیتا ویسی۔ ملاقات وِچ اے این ایف دی کارکردگی اَتے مُلک وِچ جاری آپریشنز بارے تفصیل نال بریفنگ ݙتی ڳئی، جیندے وِچ ݙسایا ڳیا جو سالانہ کاؤنٹر نارکاٹکس مہم دے تحت 134 ٹن منشیات، 75 غیر ملکیاں سودھے 2001 ملزماں اَتے 12.797 بلین ڈالر مالیت دی منشیات ضبط کیتی ڳئی۔ بلوچستان، کے پی اَتے سندھ وِچ 110 افغان شہری گرفتار کر تے 40,659 ایکڑ رقبہ کلیئر کیتا ڳیا اَتے پاپی فری سٹیٹس کوں برقرار رکھیا ڳیا۔ ایں موقع تے قائمقام امریکی سفیر نیٹلی بیکر اے این ایف دی کارکردگی دی تعریف کریندیں آکھیا جو پاکستان نال تعلقات کوں خاص اہمیت ݙیندوں ، ہر شعبے وِچ تعاون جاری رکھیسوں۔ وفاقی سیکرٹری داخلہ، ڈی جی اے این ایف، ڈائریکٹر انفورسمنٹ، امریکی سفارت خانے دے نمائندے اَتے ٻئے حکام وی ملاقات وِچ شامل ہن۔