چولستان ڈیزرٹ ریلی پاکستان دی ایڈونچر ٹوورازم، ثقافتی سنڄاݨ اَتے مُلک دے مثبت تاثر کوں عالمی سطح تے اُجاگر کرݨ دا موثر ذریعہ اے، وفاقی وزیر طارق فضل چوہدری

اسلام آباد۔ 6 دسمبر (اے پی پی) وفاقی وزیر پارلیمانی امور طارق فضل چوہدری ٹوورازم ڈویلپمنٹ کارپوریشن پنجاب اَتے پاکستان ٹوورازم ڈویلپمنٹ کارپوریشن دیاں سانجھیاں کوششاں دی تعریف کریندیں آکھیا جو چولستان ڈیزرٹ ریلی پاکستان دی ایڈونچر ٹوورازم، ثقافتی سنڄاݨ اَتے مُلک دے مثبت تاثر کوں عالمی سطح تے اُجاگر کرݨ دا موثر ذریعہ اے۔ اے ڳالھیں اُنہاں ٹوورازم ڈویلپمنٹ کارپوریشن پنجاب اَتے پاکستان ٹوورازم ڈویلپمنٹ کارپوریشن دے 21ویں چولستان ڈیزرٹ ریلی 2026 دی تیاریاں دے سلسلے وِچ اسلام آباد وِچ منعقدہ سانجھے پروگرام “ٹوورازم آؤٹ ریچ” دے تحت تقریب توں بطور خاص مہمان خطاب کریندیں کیتیاں۔ اے پروگرام صوبائی حکومت دے وژن “میگنیفیسنٹ پنجاب” دے تحت منعقد کیتا ڳیا۔ چولستان ڈیزرٹ ریلی جو 4 توں 8 فروری 2026 تئیں بہاولپور دے چولستان صحرا وِچ تھیسی، سالاں توں صرف ہِک موٹر سپورٹس ایونٹ نی رہیا بلکہ ہِک بھرپور ثقافتی اَتے سیاحتی فیسٹیول دے طور تے اُبھریے جیندے وِچ غیر مُلکی سفارت خانے، ڈرائیورز، میڈیا اَتے عوام دی وݙی تعداد شامل تھیندی اے۔ اے ریلی جنوبی پنجاب دی ثقافت، ورثے، ایڈونچر سپورٹس اَتے معاشی امکانات اُجاگر کرݨ دا اہم پلیٹ فارم بݨ چُکی اے۔ طارق فضل چوہدری آکھیا جو ایجھے ایونٹس سرمایہ کاری، روزگار اَتے عوامی رابطے ودھاوݨ وِچ اہم کردار ادا کریندن۔ ٹوورازم ڈویلپمنٹ کارپوریشن پنجاب دے منیجنگ ڈائریکٹرعاصم رضا آکھیا جو پنجاب وِچ ٻہوں سیاحتی موقع ہِن اَتے ٹی ڈی سی پی انہاں موقعیں کوں قومی اَتے بین الاقوامی سطح تے ودھاوݨ کیتے ہِک جامع حکمت عملی تے عمل کریندا پئے ۔ اُنہاں موجب تھل اَتے چولستان ڈیزرٹ ریلیز جنوبی پنجاب کوں ہِک اُبھرݨ آلی ونٹر ٹوورازم ڈیسٹی نیشن دے طور تے نمایاں کیتے۔ پاکستان ٹوورازم ڈویلپمنٹ کارپوریشن دے منیجنگ ڈائریکٹر آفتاب الرحمان رانا چولستان ریلی دے انعقاد وِچ ٹی ڈی سی پی دی قیادت دی تعریف کریندیں آکھیا جو غیر ملکی سفارت خانیں دی بھرپور شمولیت پاکستان دی ٹورازم ڈپلومیسی کوں تکڑا بݨیندی پئی اے۔