قائم مقام چیئرمین سینیٹ سیدال خان ناصر نال ڈی جی ایف آئی اے اَتے سیکرٹری ہاؤسنگ اینڈ ورکس دی وَکھو وَکھ ملاقات

اسلام آباد۔ 6 دسمبر (اے پی پی) قائم مقام چیئرمین سینیٹ سیدال خان ناصر نال وفاقی تحقیقاتی ادارے (ایف آئی اے) دے ڈائریکٹر جنرل اَتے سیکرٹری وزارتِ ہاؤسنگ اینڈ ورکس وَکھو وَکھ ملاقاتاں کیتیاں، جِتھاں ادارہ جاتی امور، جاری منصوبیں اَتے قومی سطح تے درپیش چیلنجز بارے تفصیل نال ڳالھ مہاڑ تھئی۔ سینیٹ سیکرٹریٹ توں جاری بیان موجب وفاقی تحقیقاتی ادارے دے ڈائریکٹر جنرل قائم مقام چیئرمین سینیٹ کوں ادارے دی مجموعی کارکردگی، جاری تحقیقات اَتے قومی سلامتی نال جُڑئے مختلف پہلوواں بارے تفصیلی بریفنگ ݙتی۔ ڈی جی ایف آئی اے اڄوکیاں کارروائیاں، کریک ڈاؤنز، خصوصی تحقیقاتی مہم، جدید ڈیجیٹل ٹیکنالوجی دے استعمال اَتے عوامی شکایتاں دے وقتی حل کیتے چاتے ڳئے اقدامات توں آگاہ کیتا۔ اُنہاں سائبر کرائم، سرحد پار مجرمانہ سرگرمیاں، منی لانڈرنگ، انسانی سمگلنگ اَتے ٻئے سنگین جرائم دے خلاف جاری کارروائیاں تے وی روشنی پاتی۔ قائم مقام چیئرمین سینیٹ سیدال خان ناصر ایف آئی اے دی کارکردگی دی تعریف کریندیں آکھیا جو شفاف تحقیقات، پروفیشنل ازم اَتے قومی اداریں دا مضبوط ہووݨ مُلکی سلامتی کیتے ضروری اے۔ اُنہاں جدید تحقیقاتی تکنیکاں دے ودھارے، استعداد کار وِچ ودھکی اَتے عالمی سطح تے ودھدے جرائم دا مقابلہ کرݨ کیتے مؤثر اَتے مربوط حکمتِ عملی اپناوݨ تے زور ݙتا۔ سیدال خان ناصر قانون نافذ کرݨ آلے اداریں کیتے پُوری پارلیمانی مدد دا یقین ݙویندے آکھیا جو ایف آئی اے جیھے ادارے شفاف حکمرانی، داخلی سلامتی اَتے انصاف دے مؤثر نظام دے مضبوط ستون ہِن۔سیکرٹری وزارتِ ہاؤسنگ اینڈ ورکس قائم مقام چیئرمین سینیٹ نال ملاقات وِچ وزارت دے مختلف ترقیاتی منصوبیں، نویاں سکیمز، سرکاری املاک نال جُڑئے حکومتی اقدامات اَتے جاری و مُکݨ دے نیڑے منصوبیں بارے تفصیلی بریفنگ ݙتی۔ سیدال خان ناصر آکھیا جو ترقیاتی منصوبیاں دی وقتی تکمیل نہ صرف عوامی سہولت کیتے ضروری اے بلکہ ایں نال قومی خزانے دے نقصان، غیر ضروری تاخیر اَتے وسائل دے ضیان کوں وی روکیا ونڄ سڳدے۔ اُنہاں زور ݙتا جو حکومت دے جاری منصوبیں وِچ شفافیت، معیار اَتے تیزی کوں یقینی بݨایا ونڄے تاں جو عوام اَتے سرکاری محکمیں ݙوہیں کوں وقتی فیدہ پُڄےاَتے ترقیاتی سرگرمیاں دے نتیجے وِچ مُلک اڳوں ودھے۔ سیدال خان ناصر وزارتِ ہاؤسنگ کوں ہدایت کیتی جو سارے منصوبیں دی نگرانی، معیار اَتے رفتار تے خاص توجہ ݙیندیں طے شدہ ٹائم لائن دے اندر منصوبے مکمل کیتے ونڄن تاں جو قومی ترقی دا سفر تکھے جاری رہ سڳے۔