میجر شبیر شریف شہید دی بے مثال بہادری اَتے فرض دی لازوال لَگن قومی فخر دی ابدی علامت، قوم دی خدمت کرݨ آلے لوکاں کیتے مشعل راہ اے، فوجی قیادت

راولپنڈی۔ 6 دسمبر (اے پی پی) چیف آف ڈیفنس فورسز فیلڈ مارشل سید عاصم منیر، چیف آف نیول سٹاف ایڈمرل نوید اشرف اَتے چیف آف ایئر سٹاف ایئر چیف مارشل ظہیر احمد بابر سدھو پاکستان دیاں مسلح فوجاں وَلوں میجر شبیر شریف شہید نشان حیدر دی 54ویں یوم شہادت تے اُنہاں کوں زبردست خراج عقیدت پیش کریندیں آکھیا جو اُنہاں دی بے مثال بہادری اَتے فرض دی لازوال لَگن قومی فخر دی ابدی علامت اے۔ آئی ایس پی آر توں جاری پریس ریلیزموجب میجر شبیر شریف، جِنھاں کوں 1965ء دی جنگ وِچ بہادری تے ستارۂ جرات نال وی نوازیا ڳیا ، کوں 1971ء دی جنگ وِچ ہِک واری ول سلیمانکی ہیڈ ورکس دے نیڑے ہِک ٻہوں اہم سٹریٹجک پوزیشن کوں محفوظ بݨاوݨ دی ذمہ واری ݙتی ڳئی۔ 5/6 دسمبر دی رات اُنہاں غیر معمولی بہادری نال اپݨی کمپنی دی قیادت کیتی، دشمن نال ہَتھ نال ہَتھ دی لڑائی کیتی اَتے حملہ کرݨ آلے 4 جاٹ رجمنٹ دے کمانڈر میجر نرائن سنگھ کوں جہنم وِچ پُڄا ݙتا۔ 6 دسمبر دے ݙینھ اُنہاں دشمن دے کئی جوابی حملیں کوں ناکام بݨایا اَتے خود اڳوں ودھݨ آلے ٹینکاں کوں تباہ کیتا۔ اُو قابض کیتی ڳئی پوزیشن کوں مضبوطی نال وٹھی رکھیا اَتے مسلسل حملیں دا ݙٹ تے مقابلہ کریندیں اُو ویلھے شہید تھی ڳئے جَڈاں اُنہاں تے ہِک بھارتی ٹینک دا گولا آپِیا۔ فوجی قیادت آکھیا جو شعلیں وِچ میجر شبیر شریف شہید دی غیر معمولی قیادت، وطن نال بے پناہ وابستگی اَتے عظیم قربانی پاکستان آرمی دیاں اُوچیاں روایتاں دی عکاسی کریندی اے۔ اُنہاں دا آکھݨ ہئی جو میجر شبیر شریف شہید دی بہادری اڄ وی قوم دی خدمت کرݨ آلے لوکاں کیتے مشعل راہ اے۔ فوجی قیادت آکھیا جو مسلح افواج پاکستان دی خودمختاری اَتے سلامتی دی حفاظت کیتے جان قربان کرݨ آلے سارے شہیداں دا پورا احترام کریندی اے اَتے اُنہاں دا شکریہ ادا کریندی اے، اُنہاں دی بہادری اَتے استقامت دی میراث قوم وِچ ہمیشہ جیندی رَہسی۔