فنِ تعمیر کہیں وی قوم دی ثقافت اَتے سنڄاݨ کوں بݨاوݨ وِچ بنیادی کردار ادا کریندے، احسن اقبال

لاہور۔ 6 دسمبر (اے پی پی) وفاقی وزیر منصوبہ بندی، ترقی و اصلاحات احسن اقبال آکھیے جو فنِ تعمیر کہیں وی قوم دی ثقافت اَتے سنڄاݨ کوں بݨاوݨ وِچ بنیادی کردار ادا کریندے ۔ پاکستان کنے گہری اَتے زرخیز تہذیبی وراثت موجود اے جیں کوں محفوظ کرݨ، ودھاوݨ اَتے جدید ترقی دے رُجحانات نال ہم آہنگ کرݨ ویلھے دی اہم لوڑھ اے۔ اُو ایکسپو سنٹر وِچ منعقدہ تقریب توں خطاب اَتے میڈیا نال ڳالھ مہاڑ کریندے پئے ہن۔وزیر منصوبہ بندی آکھیا جو پاکستان دی تاریخ خود اِیندی قومی سنڄاݨ دا آئیندار اے، ایں کیتے ضروری اے جو تاریخی ورثے کوں محفوظ بݨا تےآوݨ آلی نسلاں کوں اپݨیاں تہذیبی جڑاں نال جوڑیا ونڄے۔ اُنہاں آکھیا جو کراچی دیاں تاریخی عمارتاں تاں موجود ہِن، پر شہر دی تاریخی سنڄاݨ آہستہ آہستہ مُکدی پئی اے، ایں کیتے روایات دے تحفظ اَتے جدید طرزِ تعمیر دے مِیل کوں اختیار کرݨا ہوسی۔ اُنہاں آکھیا جو موسمیاتی تبدیلی پاکستان سودھے دنیا دے ہر پاسے کیتے وݙا چیلنج بݨ چُکی اے، ایں کیتے مستقبل دیاں تعمیراں وِچ ماحول دوست ڈیزائن اَتے گرین آرکیٹیکچر کوں اپناوݨا ہوسی۔اُنہاں آکھیا جو دنیا وِچ ہݨ حکومتاں معیشت نی چلیندیاں بلکہ مضبوط نِجی شعبہ ترقی دا محور بݨدے۔ مِلی جُلی حکومت جَݙاں اقتدار سنبھالیا تاں معیشت ڈیفالٹ دے نیڑے ہائی، لیکن آہستہ آہستہ اصلاحات دے ذریعے صورتحال بہتر تھئی۔ اُنہاں دعویٰ کیتا جو کہیں مُلک اِیندے اتنا تکھے مہانگ تے قابو نی پاتا جِتنا تکھے پاکستان پاتے ، سٹاک مارکیٹ دی اُچائی سرمایہ کاراں دے اعتماد دی بحالی دی علامت اے۔وفاقی وزیر آکھیا جو کوئی وی قوم مضبوط معیشت توں بغیر لَمبی مدت تئیں مضبوط دفاع برقرار نی رکھ سڳدی۔ شہیداں دے ٹٻراں کوں خراجِ تحسین پیش کریندیں اُنہاں آکھیا جو پاکستانی ماواں وطن کیتے اپݨے پُتر قربان کیتن، اَتے جَݙاں وی لوڑھ پئی قوم بھارت کوں بھرپور جواب ݙتے۔اُنہاں آکھیا جو فوج دہشت گردی دے خاتمے کیتے پُوری طرح سرگرم اے، اَتے خیبر پختونخوا حکومت کیتے ضروری اے جو صوبے وِچ امن دی بحالی کوں پہلی ترجیح ݙیوے۔