انڈونیشیا دے صدر 8 اَتے 9 دسمبر کوں اسلام آباد دا سرکاری دورہ کریسن، ترجمان دفتر خارجہ

اسلام آباد۔ 7 دسمبر(اے پی پی) وزیراعظم محمد شہباز شریف دی دعوت تے جمہوریہ انڈونیشیا دے صدر پرابووو سوبیانتو8 اَتے 9 دسمبر کوں اسلام آباد دا سرکاری دورہ کریسن۔ اُو اہم وزیراں اَتے سینئر حکام تے مشتمل اعلی سطح دے وفد دے نال آسن ۔ ترجمان دفتر خارجہ توں جاری بیان موجب اے صدر پرابووو سوبیانتو دا پاکستان دا پہلا دورہ ہوسی۔ انڈونیشیا توں آخری صدارتی دورہ 2018 وِچ صدر جوکو ویدودو کیتا ہئی۔ اے دورہ ایں لحاظ نال وی خاص اہمیت رکھیندے جو ایں سال پاکستان اَتے انڈونیشیا وچال سفارتی تعلقات دے قیام دی 75ویں سالگنڈھ منائی ویندی پئی اے۔اپݨے قیام دے دوران صدر پرابووو سوبیانتو وزیراعظم نال وفد دی سطح تے مذاکرات کریسن اَتے صدرِ پاکستان آصف علی زرداری نال وی ملاقات کریسن۔ چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر وی صدر پرابووو سوبیانتو نال ملاقات کریسن۔دورے دے دوران ݙوہیں مُلک تجارت، سرمایہ کاری، دفاع، صحت، آئی ٹی، موسمیاتی تبدیلی، تعلیم، ثقافت سودھے مختلف شعبیں وِچ تعاون دے ودھارے اَتے علاقائی و عالمی سطح تے شراکت داری کوں مزید مضبوط بݨاوݨ تے جامع ڳالھ مہاڑ کریسن۔ ایں موقع تے کئی مفاہمتی یادداشتاں (MoUs) تے دستخط کیتے ونڄݨ دا وی امکان اے۔ صدر پرابووو سوبیانتو دا اے دورہ ݙُو طرفہ تعلقات کوں مزید مضبوط کرݨ اَتے سانجھے مفاد تے مبنی تعاون کوں وَدھا ݙیوݨ دا اہم موقع ݙیسی