پاکستان ہِک ذمہ وار ریاست اے، اِیندے سارے ادارے، مسلح فوجاں سَودھے ، قومی سلامتی دے مضبوط ستون ہِن، ترجمان دفتر خارجہ

اسلام آباد۔ 7 دسمبر (اے پی پی) پاکستان ہِک ذمہ وار ریاست اے، اَتے اِیندے سارے ادارے، جیندے وِچ مسلح فوجاں وی شامل ہِن، قومی سلامتی دے مضبوط ستون ہِن جیڑھے مُلک دی خودمختاری اَتے علاقائی سالمیت دے تحفظ کیتے ہمیشہ پُرعزم رَہندن۔ مئی 2025ء دے جھیڑے پاکستانی مسلح فوجاں دی پیشہ ورانہ صلاحیت اَتے مادرِ وطن دے دفاع دے عزم کوں واضح طور تے ثابت کیتا۔ کوئی وی پراپیگنڈا ایں حقیقت کوں جھٹلا نی سڳدا۔بھارتی وزیرِ خارجہ دے اڄوکے بیان متعلق میڈیا دے سوالاں دے جواب وِچ ترجمان دفترخارجہ طاہر اندرابی آکھیا جو پاکستان بھارتی وزیرِ خارجہ دے ٻہوں اشتعال انگیز، بے بنیاد اَتے غیر ذمہ دارانہ بیان کوں مسترد کریندے اَتے اِیندی زور دی مذمت کریندے۔اُنہاں آکھیا جو بھارتی قیادت دی وَلوں پاکستان دے ریاستی اداریں اَتے قیادت کوں بدنام کرݨ دیاں کوششاں ہِک ایجھی پراپیگنڈا مہم دا حصہ ہِن جِیندا مقصد بھارت دے خطے وِچ عدم استحکام کھنڈاوݨ آلے اقدامات اَتے پاکستان وِچ اِیندی ریاستی سرپرستی وِچ تھیوݨ آلی دہشت گردی توں توجہ ہٹاوݨ اے۔ ایجھے اشتعال انگیز بیانات بھارت دی علاقائی امن، استحکام اَتے ہم آہنگی توں لاتعلقی کوں ظاہر کریندن۔اُنہاں آکھیا جو پاکستانی مسلح فوجاں بارے گُمراہ کُن بیانات ݙیوݨ دی بجائے بھارت کوں چاہیدے جو اُو اپݨی فسطائی اَتے ہندوتوا سوچ دا جائزہ گھِنے، جِیندی وجہ توں پورے مُلک وِچ ہجومی تشدد، قانون توں ٻاہر قتل، من مرضی دے مقدمے، اَتے جائیداداں و عبادت گاہواں کوں ڈھاوݨ دا بازار گرم کر رکھیے۔