ملکی تعمیرو ترقی ساݙا شیوہ اے، عوام نال کیتے ڳئے وعدے پورے کریسوں، پاک فوج کوں برا آکھݨ آلیں دا ذہنی فتورعوام دے سامݨے عیاں تھی چکیے ، عطا اللہ تارڑ

لاہور۔ 7 دسمبر (اے پی پی) وفاقی وزیر اطلاعات و نشریات عطا اللہ تارڑ آکھیے جو پاک فوج توں اساݙا دشمن خوفزدہ اے، چیف آف ڈیفنس فورسز فیلڈ مارشل سید عاصم منیر دا دشمن تے خوف طاری اے، جِیں فوج اپݨے توں پنج گُنا وݙے دشمن کوں بُری طرح ہرایا ہووے، اُوں کوں بُرا آکھݨ آلے لوکاں کوں شرم آوݨی چاہیدی اے۔ مسلم لیگ (ن) مُلک وِچ تعمیر و ترقی دا وݙا ڄال وِچھایا، اڄ مُلک دے ہر حصے وِچ محمد نواز شریف اَتے مسلم لیگ (ن) دے ترقیاتی منصوبیں دی جھلک نمایاں اے، مُلکی تعمیر و ترقی اساݙا شیوا اے۔ اے ڳالھیں انہاں یونین کونسل 240 شبیر چوک بھٹہ نمبر 2نزد باگڑیاں اچ ترقیاتی کماں دے افتتاح دے موقع تے عوامی اجتماع توں خطاب کریندے آکھیاں ۔ ایں موقع تے ساجدہ فاروق تارڑ، رکن صوبائی اسمبلی میاں عمران جاوید، مقامی سیاسی و سماجی رہنماواں سودھے شہریاں دی کثیر تعداد موجود ہئی۔۔اُنہاں آکھیا جو وݙی ستم ظریفی اے جو پی ٹی آئی گزریل 12 سالاں وِچ خیبر پختونخوا کوں کھنڈر بݨا ݙتا، کے پی وِچ نہ نویں سکول بݨئے، نہ کالج اَتے نہ یونیورسٹیاں قائم تھیاں، جَݙاں جو محمد شہباز شریف محمد نواز شریف دے وژن دے تحت پاکستان دا پہلا اَتے جدید کڈنی اینڈ لیور انسٹیٹیوٹ قائم کیتا جِتھاں ہِک ہزار ٹرانسپلانٹ کامیابی نال تھی چُکن۔عطا اللہ تارڑ آکھیا جو بزدار پلس دی حکومت دا جلسہ اڄ عوام ایں کیتے مسترد کرݙتا جو جیل وِچ قید ذہنی مریض 190 ملین پائونڈ دا ڈاکہ ماریا، ایں شخص مُلک دی معیشت کوں تباہ کیتا، اے شخص ہسپتال اَتے فلاحی منصوبیں دے فنڈز تئیں کھا ڳیا۔ 9 مئی کوں حملے کرݨ اَتے شہیداں دیاں یادگاراں کوں ڈھاوݨ توں وݙا کوئی جرم نی تھی سڳدا۔وفاقی وزیر اطلاعات آکھیا جو مسلم لیگ (ن) دی قیادت ہمیشہ عوامی خدمت کیتے سرگرم رہی اے، قائد محمد نواز شریف اَتے وزیراعظم محمد شہباز شریف دے وژن موجب مُلکی ترقی اساݙا شیوا اے، اڄ عوام نال کیتے ڳئے سارے وعدے پورے کیتے ویندے پئِن۔اُنہاں آکھیا جو تحریک انتشار آلے کُوڑ مریندن جو مُلک وقتی ڈیفالٹ کر ویسی، لیکن اللہ تعالیٰ دے کرم اَتے وزیراعظم محمد شہباز شریف دی قیادت وِچ اساں نہ صرف ایں مُلک کوں ڈیفالٹ تھیوݨ توں بچایا بلکہ ترقی دی راہ تے ٹورݙتا، اڄ مُلکی معیشت بہتری آلے پاسے ٹردی پئی اے ، زرمبادلہ دے ذخیرے وِچ ودھکی تھئی اے، مہانگ وِچ واضح کمی آئی اے جِیں کوں عالمی مالیاتی ادارے وی منیندے پئن۔ اُنہاں آکھیا جو ہݨ کِہیں کوں وی ترقی دے ایں سفر کوں روکݨ اَتے مُلکی سلامتی نال کھیڈݨ دی اجازت نی ݙتی ونڄ سڳدی۔اُنہاں ݙسیا جو ترقیاتی سکیماں تے شفاف انداز وِچ کم کیتا ویندا پئے تاں جو فنڈز دا صحیح استعمال یقینی بݨایا ونڄ سڳے، ایجھے منصوبے نہ صرف شہری سہولتاں وِچ ودھارا کریسن بلکہ مقامی معیشت تے وی چنڳا اثر پیسن۔ اُنہاں مزید آکھیا جو عوام دی بہتری اَتے سہولت کیتے حکومت ہر ممکن وسائل استعمال کریسی اَتے منصوبیں دی وقتی تکمیل یقینی بݨیسی۔ ایں موقع تے وفاقی وزیر اطلاعات و نشریات فیتا کَٹ تے ترقیاتی منصوبیں دا افتتاح وی کیتا۔