وزیر داخلہ دا بحیرہ عرب اچ کامیاب انسداد منشیات آپریشن تے پاک بحریہ دی پیشہ ورانہ صلاحیتاں دا اعتراف

اسلام آباد۔ 8 دسمبر(اے پی پی)وفاقی وزیر داخلہ و نارکوٹکس کنٹرول محسن نقوی بحیرہ عرب اچ کامیاب انسداد منشیات آپریشن تے پاک بحریہ دی پیشہ ورانہ صلاحیتاں دی تعریف کریندے آکھیے جو آپریشنز اچ 30 لکھ ڈالر مالیت دی 1500 کلو گرام منشیات ضبط کرݨ ہک وݙی کامیابی اے، پاک بحریہ اپݨی روایتی مہارت اتے مستعدی ݙکھیندے ہوئیں منشیات دی اے وݙی کھیپ پکڑی اے جیڑھا ہک قابل تحسین کارنامہ اے۔ محسن نقوی ایں کامیاب کاروائی تے نیول چیف اتے آپریشن اچ حصہ گھنݨ آلے ‘یمامہ’ جہاز دے عملے کوں خصوصی مبارکباد ݙتی اے۔ انہاں جہاز دے افسراں اتے جواناں کوں خراج تحسین پیش کریندے آکھیے جو اے کامیاب آپریشن پاک بحریہ دے پروفیشنل ازم دا ثبوت اے اتے پوری قوم کوں بحریہ دے انہاں جانبازاں تے ماݨ اے ڄیڑھے سمندری سرحداں دی حفاظت دے نال نال غیر قانونی سرگرمیاں کوں روکݨ اچ وی موثر کردار ادا کریندے پئن۔ وزیر داخلہ آکھیے جو منشیات دے خلاف اے کاروائی پاکستان کوں منشیات توں پاک کرݨ دے قومی عزم دی عکاسی اے، پاک بحریہ سمندر اچ تھیوݨ آلی غیر قانونی سرگرمیاں کوں روکݨ واسطے ہر ویلے تیار اے اتے اینڄھے آپریشنز ملکی سلامتی اتے معاشرے کوں منشیات دی لعنت توں بچاوݨ واسطے کلیدی حیثیت رکھدن۔