قوم مسلح افواج، سپہ سالار تے ڈی جی آئی ایس پی آر نال مکمل اظہارِ یکجہتی کریندی اے، بیرسٹر دانیال چوہدری

راولپنڈی۔ 8 دسمبر(اے پی پی)وفاقی پارلیمانی سیکرٹری برائے اطلاعات و نشریات بیرسٹر دانیال چوہدری آکھیے جو قوم مسلح افواج، سپہ سالار اتے ڈی جی آئی ایس پی آر نال مکمل اظہارِ یکجہتی کریندی اے، افواجِ پاکستان دیاں قربانیاں کوں متنازعہ بݨاوݨ کہیں وی صورت برداشت نا کیتا ویسی۔ راولپنڈی اچ افواجِ پاکستان نال اظہارِ یکجہتی کیتے کڈھی ونڄݨ آلی ریلی دے بعد میڈیا نال ڳالھ مہاڑ کریندے ہوئیں انہاں آکھیا جو مُلک اچ بے بنیاد بیانیے اتے انتشار کھنڈاوݨ دیاں کوششاں قومی سلامتی واسطے نقصان دہ ہن، پاک فوج دے خلاف منفی مہم چلاوݨ آلے عناصر دراصل دشمن قوتاں دا بیانیہ اڳو تے ودھیندے پئن، دہشت گرداں نال کہیں وی سطح تے مذاکرات ممکن کائنی اتے نہ ریاست ایںدی اجازت ݙے سڳدی اے۔ انہاں آکھیا جو پاکستان تے ایںدے دشمناں وچال مضبوط کندھ پاک فوج اے، اتے مسلح افواج دیاں قربانیاں دا مذاق اݙاوݨ آلیاں واسطے ایں مُلک اچ کوئی ڄاہ کائنی، قوم ہک مٹھ اے تے اپݨی فوج نال کھڑی اے۔