کِہیں وی ملک دی ترقی کیتے ضروری اے جو اوندے ادارے مضبوط، غیر جانبدار اَتے انصاف دے اصولاں تے قائم ہوون”، صدر آصف علی زرداری دا انسداد بدعنوانی دے عالمی ݙینھ تے سنیہا

اسلام آباد۔ 9 دسمبر(اے پی پی)صدر مملکت آصف علی زرداری آکھیے جو کہیں وی ملک دی ترقی کیتے ضروری اے جو اوندے ادارے مضبوط، غیر جانبدار اَتے انصاف دے اصولاں تے قائم ہوون۔ پاکستان ویلھے دے نال احتساب دے نظام کوں بہتر بݨاوݨ کیتے اقدامات کیتن، اڄ اساں دنیا نال رَل تے اقوام متحدہ دا انسداد بدعنوانی دا ݙینھ منیندے پئے ہیں، اے ݙینھ یاد ݙویندے جو بدعنوانی دے خلاف جدوجہد حکومتاں، سول سوسائٹی، میڈیا اَتے ہر شہری دی سانجھی ذمہ داری اے۔ اے ڳالھ انہاں انسداد بدعنوانی دے عالمی ݙینھ تے آپݨے سنیہے اچ آکھی۔ صدر مملکت آکھیا جو اڄ دا ݙینھ یاد ݙویندے جو بدعنوانی دے خلاف جدوجہد حکومتاں، سول سوسائٹی، میڈیا اَتے ہر شہری دی سانجھی ذمہ داری اے، بدعنوانی عوام دا اعتماد کمزور کریندی اے، اداریاں دی کارکردگی تے اثر پیندی اے اَتے وسیلے انہاں لوکاں تئیں نئیں پُڄچݨ ݙیندی جنہاں کوں انہاں دی سَب توں زیادہ لوڑھ ہوندی اے، اے ترقی دی رفتار کوں سست کر ݙیندی اے، قانون دی بالادستی تے یقین گھٹیندی اے اَتے بنیادی سرکاری خدمتاں کوں وی متاثر کریندی اے۔ صدر مملکت آکھیا جو کہیں وی ملک دی ترقی کیتے ضروری اے جو اوندے ادارے مضبوط، غیر جانبدار اَتے انصاف دے اصولاں تے قائم ہوون، مختلف مالی بے ضابطگیاں، اختیارات دے غلط استعمال اَتے سرکاری زمیناں تے ناجائز قبضیاں دے کیس اچ سرکاری رقم لوکاں توں واپس ڳھدی ڳئی اے۔ انہاں آکھیا جو انہاں کارروائیاں نال متاثرہ شہریاں کوں ریلیف مِلیا اَتے کئی اداریاں کوں انہاں دے اثاثے واپس ملے، اے مثالاں ثابت کریندن جو جݙاں ادارے ایمانداری نال کم کرن اَتے آپݨے قانونی دائرے اچ رہون تاں چنڳے نتیجے آندن۔ صدر مملکت آکھیا جو اے ضروری اے جو احتساب دے ادارے سیاسی وابستگیاں توں اُتے رہون، کہیں نال امتیازی سلوک نہ کرن اَتے آپݨی کارروائیاں کوں صرف قانون اَتے شفاف طریقہ کار دے مطابق چلاون۔ صدر آصف علی زرداری آکھیا جو شفافیت، پیشہ ورانہ معیار اَتے اخلاقی طرز عمل ہی اداریاں دی ساکھ بݨیدن، جیڑھے ادارے انہاں اصولاں کوں اپنا گِھندن او نہ صرف بدعنوانی کوں روکیندن ٻھل عوام دا اعتماد وی مضبوط کریندن۔ صدر مملکت آکھیا جو ایں موقع تے میں سارے سرکاری ملازمین، پیشہ ور لوکاں اَتے شہریاں توں اپیل کرینداں جو او ایمانداری اَتے چنڳی حکمرانی دے عزم کوں پکا کرن، ایمانداری تے قائم اساݙا سانجھا عزم پاکستان دے اداریاں کوں مضبوط کریسی اَتے قومی استحکام اَتے ترقی دے سفر اچ مدد ݙیسی۔ صدر مملکت آکھیا جو میں شفافیت اَتے احتساب کیتے کم کرݨ آلی ساریاں تنظیماں دی کامیابی کیتے دعا گو ہیں اَتے امید رکھینداں جو او پاکستان اچ ھک صاف اَتے بدعنوانی توں پاک معاشرہ قائم کرݨ کیتے اپݨیاں کوششاں جاری رکھسن۔